Ñahendu Jesús Ñe’ẽ. Domingo 19 de enero

Escucha el evangelio y la reflexión en: https://youtu.be/VW7U0VKaGHg?feature=shared

Domingo II Tiempo Ordinario Ciclo A                                                Juan 1, 29 – 34.

            Upe ára ko’ẽme, Juan ohecha Jesúspe oñembojáva oúvo hendápe. Upépe osẽ he’i: Péina ápe ou hína Ñandejára ovecha ra’y oipe’átava opavavégui ipekádo. Ha’e hína upe che mandu’a hague peẽme ku ha’érõ guare: “Che rire oúta peteĩ tuichavéva chehegui, ha’e oikove haguére che aikove mboyve.”  Chete voi ndaikuaái vaekue mávanepa ha’e. Péicharõ jepe, pomongarai aikóvo ýpe, opa Israelgua oikuaa haguã mávapa ha’e.

            Che ahecha vaekue Espíritu Santo oguejýva yvágagui ku pykasúicha ha opyta hi’ári.  Upérõ, che ndaikuaái vaekue mávapa ha’e. Upe che mbou va’ekue chéve pomongarai haguã ýpe, ha’e he’i vaekue chéve: “Upe rehecháva Espíritu Santo oguejyha hi’ári, upévata hína upe oporomongaraíva Espíritu Sántope”.  Chete voi ahecha va’ekue, ha aikuaa porã Tupã Ra’yha ha’e.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande rapicha imba’e porãva oñanduka ñandéve py’aguapy ha vy’a. Umi imarangatu ha ojeroviáva ohenduka ñandéve ñe’ẽ porã, ñanerekombo’e, oñembo’e ñande rehe ha ñanendive, ñanepytyvõ. Umíva rupive ñañandu Ñandejaraite voi ohasaha ñande rekove rupi, opoko ñande rehe, ñande pe’a heta mba’e vaígui ha ñande rovasa. Umi ñande rapicha marangatu renondépe ikatu ñande avei já’e: “Péina ápe Tupã rembijokuái, Ñandejára ojevaleha ñande rovasa haguã”.

Jesús niko ou kuri Juan rendápe oñemongaraiuka haguã, upéva mboyve oñemongeta hikuái, oime oñondive. Ha omongarai rire Jesúspe Juan ohecha hese oguejyha upe Ñandejára Espíritu. Oñandu ha’eha añete upe Tupã remimbou, oúva ovecha ra’ýicha, imánso ha imba’e porãva, oúva py’aguapýpe ojehe’a hapicha kuéra ndive. Ha upéva upe oñandu ha ohecháva Hesu rehe Juan Bautista omombe’u opavavépe, ikatu haguãicha opavave ohechakuaa Hesu ha’eha upe Tupã ra’y, oñemboúva yvy ári ñande rovasa ha ñande pe’a haguã aña poguýgui.

Ha upévante niko upe ñande jajapo vaerãva: Ñamombe’únte vaerã mba’éichapa Ñandejára imba’e porã ñane ndive. Natekotevẽiete ñañe’ẽkuaa térã katu ñane arandu eterei. Upe tekotevẽva oiko haguã ñande hegui Ñandejára rembijokuái hina jahechakuaánte upe Tupã rembiapo ha imba’e porã ñande rekovépe ha ñande rapicha ñande rogagua ha ñande jeregua rekovépe.

Upévante ñamombe’u vaerã opavavépe. Ha upéva ha’éta tuicha ñepytyvõ ñande rapicha kuéra peguarã. Mba’épa che reindy ha nde che irũ umi mba’e porã Ñandejára ome’ẽva ndéve ha ojapóva nde rekovépe, ikatúva remombe’u nde ave.

Pa’i Alberto Luna.