LECTURAS DEL JUEVES SANTO
1 abril, 2026LECTURAS VIGILIA PASCUAL EN LA NOCHE SANTA
3 abril, 2026VIERNES SANTO CELEBRACIÓN DE LA PASIÓN DEL SEÑOR
PRIMERA LECTURA:
Ko’ágã ñahendúta Tupã Ñandejára ñe’ẽIsaías arandukápe oĩ háicha 52, 13 __ 53. 12
Che rembiguái oñakã rapu’ãta, ojehupi ha oñemoĩta yvate.
Heta oñemondýi va’ekue ohecha ramo ichupe, ndojoguavéigui yvypórape, upéicha avei, ichupe ohechávo opa tetã opytáta ijurujái ha mburuvicha guasu kuéra iñe’ẽngúta.
Ohecha ha oikuaátagui upe ohendu’ỹva’ekue, araka’eve.
Máva piko ogueroviáta upe rohenduka va’ekue?
Mávape piko Tupä Ñandejára oikuaauka ipokatu?. Okakuaa mba’e rokýicha henondépe ha yvyra rapóicha yvy perõme.
Ha’e naiporãi ha ndoguerekói mba’eve ñama’ẽse haguã hese.
Ojeapo’i ha ojejei ichugui, opa mba’e hasy ichupe, jeiko asy rehe ojepokuaa, ojejere ichugui ndo jehechaséigui ichupe. Roguereko ijaheipy ramo ha ndo rojapói mba’eve ramo. Ha’e katu ogueraha ijape rehe ñane mba’asy ha ogueropu’aka opa mba’e hasýva ñandéve.
Ñande ñaimo’ã, Tupä Ñandejára oinupã hague ichupe, omboepoti ha omotĩndy hague. Ha’e ojekutu ñane tĩ atãngue rehe, ñane rembiapo vaikue rehe oñemongu’ipa.
Ho’a hi’ári pe ñenupã oguerúva ñandéve py’a guapy, ha ijekutukue rupi jakuéra ñande. Ovecha okañýva’ekuéicha, jaikóva’ekue ñane akã rehe, Tupä Ñandejára katu omoĩ ijati’ýre ñane rembiapo vaikue.
Oñeñemboharáivo hese, ha’e oñemomirĩnte, ha nde’íri mba’eve.
Ojereraha ovecha ra’ýicha ojejuka haçuáme, ha’e katu okirirĩnte ha ndo jejuru pe’ai, ovecháicha oñeñapĩ ramo.
Ojereraha jepokuapy, hekope’ỹ oñembojovake, ha avave ndo jepy’apýi hese. Ojehapo’o ko yvýgui, ha ojejuka, che retãgua rembiapo vaikue rehe.
Oñeñotỹ mba’e vai apoha apytépe, hembiapo vaíva yke rehe ityvy oñemoĩ, ndojapói ramo jepe ivaíva ha ijurúgui nosẽi japu.
Jeiko asýpe, Tupä Ñandejára ojopyse va’ekue ichupe.
Ha oñeme’ẽ hague rehe jeiko asýpe tembiapo vaikue rehe, oikove pukúta ha ohechata iñemoñare. Tupä Ñandejára rembipota oikóta ha’e rupi.
Heta ite oiko asy rire, ohechata ára sakã, ha ovy’áta oikuaávo.
Tupä Ñandejára rembiguái marangatu oipe’áta ivaívagui hetápe, oguerahátagui ijape rehe umíva reko vaikue. Upéva rehe Tupä Ñandejára omohendáta ichupe karai guasu kuéra apytépe.
Poguasu ndive oikéta mba’e ñemboja’ópe, oñeme’ẽ hague rehe omano haguã, oñemoĩ iñangaipáva apytépe. Ha’e katu ohupi ijati’ýre yvypóra angaipa, ha oñembo’e hembiapo vaíva rehe.
Tupã Ñandejára Ñe’ẽ.
SALMO ÑEMBOHOVÁI 31, 2. 6. 12-13. 15-17. 25
R.Che Ru, nde pópe amoĩ che rekove.
Tupä Ñandejára, ne rendápe niko aguahẽ,
Ani rejátei añemotĩ.
Nde pópe amoĩ opa che rekove,
Che Jára, Tupä añetetéva nde upe che pytyvötava. R.
Che rayhu’ỹva opukapa che rehe,
che róga jere rupi oikóva oñembohory che rehe.
Umi che kuaáva okyhyjepa che hegui,
ha umi oka rehe che recháva okañymba che hegui.
Ku amano ramo guáicha tesaráipe aiko. R.
Tupä Ñandejára, nde rehe ajerovia.
Ndéve ha’e nde che Jaraha,
ha opa che rekove nde pópe oĩha.
Ani che rejátei ha’a umi che rayhu’ỹva
ha che ári oikóva pópe. R.
SEGUNDA LECTURA:
Ñahendúta Tupä Ñandejára Ñe’ẽ ojehaiva’ekue Hebreoskuérape 4, 14-16; 5, 7-9
Che pehenguekuéra:
Jesús, Tupä Ra’y, hína ñande Pa’i Guasu oike va’ekue yvágape. Upéva rehe akói ñane mbarete va’erã ñande jeroviápe.
Jesús, ñande Pa’i Guasu, ikatu ñande poriahuvereko ñane kangyhápe, ha’e voi niko ojepy’a ra’ãva’ekue ñandéicha. Ha’e ndo guerekóinte mba’eveichagua angaipa. Ñañemboja, aipo ramo, jerovia reheve Tupä Ñandejára ñande rayhu etéva guapyhápe, ha’e ñande poriahuvereko haguã ha ipy’a porãgui ha ñane pytyvõ haguã ñaikotevẽ jave.
Jesucrísto, oĩ aja ko yvy ári, tesay ha heta jerure asýpe oñembo’eva’ekue Tupä Ñandejárape, ipu’akáva oipe’a haguã ichupe manógui. Ha iñe’ã rendúgui Tupä Ñandejára ohendu ichupe. Aipo ramo, Cristo, Tupä Ra’y ramo jepe, jehasa asýpe oikuaa mba’épa he’ise ñe’ẽ rendu. Ha upéicha rupi heko porã añetémarõ, oiko ichugui opa ára guarã pysyrõhára iñe’ẽ rendúva guivépe.
Tupä Ñandejára Ñe’ẽ.
ACLAMACION Flp 2, 8-9
R. Romomba’e guasu ndéve Jesucrísto
Jesús oñemomirĩ ha iñe’ẽ rehendu omano meve, omano kurusu rehe.
Upéva rehe Tupä Ñandejára ohupi ichupe yvatete opavavégui, ha ome’ẽ ichupe herarã opa téragui tuichavéva.
R. Romomba’e guasu ndéve Jesucrísto.
EVANGELIO
Ñandejára Jesucristo jehasa asy San Juan omombe’u háicha 18, 1_19, 42
Upe ramo kóicha Jesús oñembo’epa rire, osẽ oho hemimbo’e kuéra ndive ysyry Cedrón mboypýri. Upépe oĩ peteï kokue, ha Jesús hemimbo’e kuéra ndive oike pype. Judas, upe omoñuhãtava ichupe, oikuaa avei pe kokue. Upépe niko Jesús oñemboatýmiva voínte hemimbo’ekuéra ndive. Judas oguahẽ upépe, ñorairõhára aty Romagua hapykuéri.
Hendivekuéra avei oho ñorairõhára Tupao pegua, pa’i ruvicha kuéra ha umi fariseo omondóva. Kyse ipópe oguahẽ hikuái, ha tata’y rendýpe hápe ohesape. Jesús niko oikuaapáma mba’épa ojehúta ichupe. Upéva rehe osẽ ohuguãitĩvo ha oporandu ichupekuéra:
J: –Mávape piko peheka?
O: Ha’ekuéra he’i ichupe:
F. –Jesús, Nazaret guápe.
O: Jesús he’i ichupekuéra:
J: –Che hína upéva.
O: Judas, pe omoñuhãva Jesúspe, oĩ hína umi ou va’ekue apytépe. Ha upe Jesús he’ívo ichupekuéra “Che hína upéva”, oguevipa hikuái ha ho’apa yvýpe. Jesús oporandu jevy ichupeKuéra:
J: –Mávape piko peheka?
O: Ha ha’e kuéra he’i.
F: –Jesús, Nazaret guápe.
O: Jesús he’i jevy ichupe kuéra:
J: –Ha’éma niko peëme cheha upéva. Chéve che reka ramo, peheja ko’ãvape toho.
O: Kóicha ojehu oiko haguã Jesús voi he’i haguéicha: “Che Ru, umi chéve reme’ẽva’ekuégui niko noñehundíri peteïnte jepe”. Upépe, Simón Pedro oharývo ikyse puku ha onambi’o peteï Malco héravape, pa’i guasu rembijokuáiva. Jesús katu he’i Pédrope:
J: –Emoinge jevy nde kyse puku hyrúpe. Nde piko reimo’ã naimeiha ahasa asy haguã che Ru omoĩ haguéicha chéve?
O: Upéi umi ñorairõhára Ramagua huvicha ndive, ha umi judío ñorairõhára kuéra Tupao pegua, omoakãsã Jesúspe ha oipokua ichupe hikuái. Anás rógape raẽvete ogueraha ichupe hikuái. Caifás, ojupi va’ekue upe áñope pa’i guasu ramo niko omenda va’ekue peteïva Anás rajy rehe. Caifás voi upe he’iva’ekue umi judío kuérape iporãveha peteïnte omano ramo opavave rehe.
Simón Pedro ha peteï umi Jesús remimbo’éva, oho Jesús rapykuéri. Upe ambuévape oikuaa pa’i guasu, upéva rehe oike Jesús ndive pa’i guasu rógape. Pedro katu opyta okápe, pe okẽme. Upéi osẽ pe Jesús remimbo’e oñe’ẽ haguã pe kuña okẽ rerekua ndive, ha omoinge Pédrope. Pe kuña okẽ rerekua oporandu Pédrope:
K: –Nde nga’u piko nda ha’éi Jesús remimbo’e peteï?
O: Pedro he’i ichupe:
S: –Nahániri, nda ha’éi .
O: Ha ro’ýgui upe ramo, umi tembiguái ha umi ñorairõhára kuéra Tupao pegua ojatapy ha ojepe’e hína upépe. Pedro avei upépe ojepe’e ijapytépe kuéra.
Pe pa’i guasu oñepyrũ oporandu Jesúspe hemimbo’e kuéra rehe ha umi mba’e ha’e ombo’évare. Jesús he’i ichupe:
J: –Che niko opavave rovakénte voi añe’ẽva, ha ambo’éva umi judío kuéra tupaópe, ha umi judío kuéra ijatyhápe, Tupaópe. Araka’eve nda’éiva mba’eve ñemiháme. Mba’e rehe piko reporandu chéve ko’ã mba’e rehe? Eporandu umi che rendúva’ekuépe ha ha’e kuéra to mombe’u ndéve mba’e rehépa añe’ẽ ichupe kuéra. Ha’e kuéra niko oikuaa mba’épa ha’e ichupe kuéra.
O: Péicha oñe’ẽvo, peteïva umi ñorairõhára Tupao pegua tuicha ohovapete Jesúspe, ha he’i ichupe:
F: –Péicha piko ñambohováiva pa’i guasúpe?
O: Jesús he’i ichupe:
J: –Oime rire ha’e oimeraẽ mba’e hendape’ỹ, ere chéve. Nda’éi rire mba’eve ivaíva, piko maerã che rovapete?
O: Upépe, Anás omondo Jesúspe ipokuapy pa’i guasu Caifás rendápe.
Upe aja, Pedro ojepe’ente hína okápe. Oporandu ichupe hikuái:
K: –Nde nga’u piko nda ha’éi Jesús remimbo’e peteï?
O: Pedro katu he’i ichupe:
S: –Nahániri, nda ha’éi .
O: Upéi peteïva umi pa’i guasu rembiguáiva ha upe Pedro onambi’o va’ekue pehẽngue, oporandu Pédrope:
F: –Che nga’u piko ndo rohechai ra’e upe kokuépe?
O: Ha Pedro he’i jevy “Nahániri”, ha upévo gállo osapukái.
Ogueraha hikuái Jesúspe Caifás rógagui mburuvicha Romagua rógape. Ko’ẽ potáguima hína, umi judío kuéra ndoikéi pe mburuvicha guasu rógape ani haguã oñemongy’a, péicha ramo niko ha’e kuéra ndaikatu mo’ãi oĩ karuhápe pyhare Páskua jave. Upéva rehe Pilato osẽ oñe’ẽ haguã ichupe kuéra. Oporandu ichupe kuéra:
P: –Mba’e ivaíva piko peje ko kuimba’e ojapo hague?
O: He’i ichupe umi judío kuéra:
F: –Ndojapói rire ivaíva niko ndorogueru va’erãi mo’ã ndéve.
O: Pilato he’i ichupekuéra:
P: –Peraha peë, ha pejapo hese pende léi he’iháicha.
O: Umi judío moakãhára kuéra katu he’i ichupe:
F: –Ore niko ndoroguerekói ore pópe rojukauka haguã avavépe.
O: Ha péicha ou ojehu pe Jesús he’i hagueichaite mba’éichapa ojejukáta. Pilato oike jevy hógape ha ohenói Jesúspe. Oporandu ichupe:
P: –Nde piko hína umi judío kuéra ruvicha guasu?
O: Jesús he’i ichupe:
J: –Upéva piko reporandu chéve nde reikuaaségui, térãpa oje’égui ndéve reporandu haguã ?
O: Pilato he’i ichupe:
P: –Che nga’u piko judío? Ne retãgua voi ha umi pa’i ruvicha kuéra niko umi nde reruva’ekue nde reja che pópe. Mba’e mba’éiko rejapo?
O: Jesús he’i ichupe:
J: –Che nda ha’éi mburuvicha guasu tetã yvy ári pegua. Péicha rire niko, aguereko va’erã mo’ã oñorairõva che rehe ani ha’a judío kuéra pópe. Nahániri, che nda ha’éi mburuvicha guasu avaveichagua.
O: Upépe Pilato oporandu ichupe:
P: –Mburuvicha guasu piko nde aipo ramo?
O: Jesús he’i ichupe:
J: –Ndéma niko ere, che mburuvicha guasuha. Che niko aju va’ekue ko yvy ári ha’e haguã umi mba’e añeteguáva. Ha opa umi oikóva añete guápe, che rendu.
O: Pilato he’i ichupe:
P: –Ha mba’e piko pe añetegua?
O: Ko’ã mba’e oporandu rire Jesúspe, Pilato osẽ jevy oñe’ẽ umi judío kuéra ndive. He’i ichupe kuéra:
P: –Che niko ndajuhúi ko kuimba’e ojapo hague mba’eve ivaíva. Páskua arete jave niko che apoímiva voínte peëme peteï oñemoakãsãva oho rei haguã. Peipotápa apoi peëme judío kuéra ruvicha guasu?
O: Ha opavave upépe oñemoĩ osapukái:
F: –Upévape Nahániri. Epoi Barrabásgui.
O: Barrabás niko peteï kuimba’e hembiapo vai va’ekue.
Upéma ramo, Pilato heta omboepotiuka Jesúspe. Umi ñorairõhára oñopẽñuatĩgui peteï akãngora ha omoĩ iñakã rehe, ha omoĩ ijape rehe ao pytã. Upéi oñemboja hendápe ha he’i ichupe:
F: –Víva judío kuéra ruvicha guasu.
O: Ha ohovapete ichupe hikuái.
Pilato osẽ jevy okápe, ha he’i:
P:–Pema’ẽke. Aguerúta peëme ko’ápe pehecha haguã nda juhuiha hese mba’eve ivaíva.
Ha osẽ Jesús okápe, iñakã rehe pe ñuatĩ oñeñopẽva’ekue ojuehe, ha upe ao pytã ijape rehe. Pilato he’i:
P: –Na’ápe hína ko kuimba’e.
O: Umi pa’i ruvicha kuéra ha ñorairõhárakuéra Tupao pegua ohechávo Jesúspe, oñepyrũ osapukái:
F: –Emosãingo kurusu rehe. Emosãingo kurusu rehe.
O: Pilato he’i ichupekuéra:
P: –Peraha ha pemosãingo kurusu rehe peë. Che ndajuhúi hese mba’eve ivaíva ojapo hague.
O: Umi judío moakãhárakuéra he’i ichupe:
F:–Ore léi he’iháicha ramo niko ha’e omanova’erã. He’i niko ijehe Tupä ra’yha.
O: Ohendúvo ko’ã mba’e, ko’ýte Pilato okyhyje. Oike jevy hógape ha oporandu Jesúspe:
P: –Mamogua piko nde?
O: Jesús katu nde’íri ichupe mba’eve.
Pilato he’i ichupe:
P: –Ndeere mo’ãi piko chéve mba’eve? Ndereikuaái piko che pópe oĩha romosãingo haguã kurusu rehe, térã apoi haguã nde hegui?
O: Upépe Jesús he’i ichupe:
J: –Mba’eve ndaikatúi va’erã mo’ã rejapo che rehe Tupä Ñandejára ndo hejái rire ndéve. Upéva rehe, upe nde pópe che reru va’ekue hembiapo vaive hína nde hegui.
O: Upe guive Pilato oheka mba’éichapa ikatu opoi Jesúsgui. Umi judío kuéra katu osapukái ichupe:
P: –Repoi ramo ichugui, nde ndaha’e mo’ãi Roma pegua mburuvicha guasu irũ. Oimeraẽ he’íva ijehe ha’e mburuvicha guasuha, upéva opu’ã hína Roma pegua mburuvicha guasúre.
O: Pilato ohendúvo upéva oguenohẽ Jesúspe okápe, ha oho oguapy mbojovakehára oguapyhápe, hebréo ñe’ẽme hérava Gabatá ha he’iséva ita oñemboguapy haguépe. Upéva ojehu pe ára Páskua mboyve, asaje pyte rupíma. Upévo Pilato he’i umi judío kuérape:
P: –Na’ápe pende ruvicha guasu.
O: Ha’e kuéra katu osapukái:
F: –Tomano, tomano. Emosãingo kurusu rehe.
O: Pilato oporandu ichupe kuéra:
P: –Pende ruvicha guasu piko amosãingóta kurusu rehe?
O: Ha umi pa’i ruvicha kuéra he’i ichupe:
F: –Mburuvicha guasu Roma pegua, ha’e añónte ore ruvicha guasu.
O: Upéma ramo, Pilato oheja ipópe kuéra Jesús oñemosãingo haguã kurusu rehe, ha ogueraha ichupe hikuái.
Jesús osẽ pe távagui ikurusu ijape rehe oho haguã “Akã kãngue Renda” gotyo, hebréo ñe’ẽme hérava Gólgota. Upépe omosãingo ichupe hikuái kurusu rehe. Hendive avei oñemosãingo mokõi kuimba’e, peteï mokõive ijyképe, Jesús katu mbytépe. Pilato omoĩka pe kurusu akã rehe ñe’ẽ he’íva kóicha: “Jesús Nazaretgua, judíokuéra ruvicha guasu”. Heta oĩva’ekue judío ohecháva mba’épa he’i pe kurusu akã rehe. Pe Jesús oñemosãingo hague niko namombyrýi pe távagui, ha upéi ave, oĩ hebréo, latín ha griégo ñe’ẽme. Upéva rehe umi pa’i ruvicha kuéra he’i Pilátope:
F: –Ani emoĩ: “judío kuéra ruvicha guasu”, emoĩ uvei “He’íva ijehe judío kuéra ruvicha guasuha”.
O: Pilato katu he’i ichupe kuéra:
P: –Pe amoĩ haguéicha, upéicha opytáta.
O: Umi ñorairõhára kuéra omosãingo rire Jesúspe kurusu rehe, omboaty Jesús aokue ha omboja’o irundy hendápe, peteï teĩme guarã. Peteï ijao katu ndoguerekói oñemobovyvyha, peteï pukúpente ojepyaha va’ekue. Upéva rehe umi ñorairõhára kuéra he’i ojupe:
F:–Ani ñamondoro. Jaity hese po’a ha jahecha mávapepa opytáta.
O: Péicha ojehu oiko haguã Ñandejára Ñe’ẽme he’i háicha: “Che ao rehe oñomboja’o hikuái, ha che ahoja rehe oity po’a”. Peicha ite ojapo umi ñorairõhára kuéra.
Jesús kurusu ypýpe oĩ isy, isy kypy’y, María Cleofás rembireko ha María Magdalena. Jesús ohecha isýpe ha ijyke rehe pe hemimbo’e ha’e ohayhu etéva. Ha he’i isýpe:
J: –Na upépe ne memby.
O: Upéi he’i hemimbo’épe:
J: –Naupépe nde sy.
O: Upe guive, pe Jesús remimbo’e ogueraha hendive hógape Jesús sýpe.
Ko’ã mba’e rire, Jesús oikuaáma opa mba’e oguahẽmaha hu’ãme, ha oiko haguã Ñandejára Ñe’ẽme he’i háicha, he’i:
J: –Che y’uhéi.
O: Upe rupi oĩ peteï mbayru henyhẽva kaguyry reheve. Upépe omoakỹ hikuái peteï espónja, ha oñapytĩ rire peteï yvyra apýre omboja ijuru rehe. Jesús ho’u pe kaguyry, ha upéi he’i:
J: –Ko’ápe opáma.
O: Páskua arete mboyve upéma ramo, ha umi judio kuéra ndoipotái avave retekue opyta osãingo kurusu rehe pytu’uha ára jave. Upéva upe ára niko arete ndetuichávata hína. Upéva rehe oho he’i hikuái Pilátope ohetyma mopẽ haguã umi kurusu rehe osãingóvape ha upéi oñemboguejy haguã upégui. Umi ñorairõhára kuéra oho ha ohetyma mopẽ umi mokõi oñemosãingo va’ekue Jesús yke rehe. Oñembojávo Jesús oĩháme katu, ohecha hikuái ha’e omanóma hague. Upéva rehe nohetyma mopẽi ichupe. Peteïva umi ñorairõhára katu oikutu ichupe ijyképe ikyse yvukúpe, ha upégui osẽ tuguy ha y.
Upe omombe’úva ko’ã mba’e niko ha’ete voi ohecha va’ekue ha añetegua he’i. Ha’e oikuaa añetegua amombe’uha, opavave peë avei perovia haguã. Ko’ã mba’e niko ojehu va’kue ojehu haguã Ñandejára Ñe’ẽme he’íva: “Peteïnte jepe ikãngue nomopẽi ichugui”. Ha Ñandejára Ñe’ẽme he’i avei ambue hendápe: “Omaña va’erã hikuái upe ojekutu va’ekue rehe”.
Ko’ã mba’e rire, José táva Arimateagua, oho ojerure Pilátope ogueraha haguã Jesús retekue. José niko Jesús remimbo’e va’ekue, ñemiháme péicha oiko okyhyjégui umi judio kuéra moakãhára kuéragui. Pilato ome’ẽ Josépe Jesús retekue, ha ogueraha ha’e. Nicodemo, upe peteï pyhare oho va’ekue Jesús rendápe, avei oho, ha ogueraha 30 kílo rupi pohã Jesús retekue ombalsama haguã. Ha péicha, José ha Nicodemo ojokuapa ite Jesús retekue aópe, oñemonambava’ekue hese pohã. Péicha voínte judiokuéra ojapo opa omanóva rehe oñeñotĩ mboyve. Pe Jesús oñemosãingo haguépe kurusu rehe oĩ peteï kokue, ha upe kokuépe oĩ peteï itakua ojejo’o pyahúva, avave oñeñotỹ’ỹ haguépe gueteri. Hi’aguãgui pe itakua ha oñepyrũtamagui pytu’uha ára, upépe omoĩ hikuái Jesús retekue.
Ñandejára Jesucrísto Ñe’ẽ.