LECTURAS DEL JUEVES SANTO

LECTURAS DEL JUEVES SANTO – MISA VESPERTINA DE LA CENA DEL SEÑOR

PRIMERA LECTURA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha   12, 1-8. 11-14

Tupã Ñandejára he’i Moisés ha Aarónpe Egíptope:

Ko mes ha’éta hína peẽme guarã, áño pegua mes tenondegua. Peje opa Israel guápe: “Ko mes pegua ára 10hápe, opa óga jára to ñongatu peteĩ ovecha ra’y térã kavara ra’y hóga guápe guarã. Peteĩ óga pegua imbovy ramo ho’upa haguã, to me’ẽ hembyre hóga yke rehe oĩvape. Ojeporavo haguã upe mymba, to ñema’ẽ mbovýpa umi ogagua ha mbovýpa ho’u jepi peteĩ teĩ. Ta upéva ovecha ra’y térã kavara ra’y mácho imarã’ỹva ha hi’áño peteïva. Peñongatu ára 14 peve ha opa Israelgua tojuka oguahẽvo ka’aru pytũ.

Pemona huguykuépe mokõive óga rokẽ yke rehe pe’uhápe upe mymba, avei hembe’y yvategua. Upe pyharépe voi to je’u ho’o jehesy pyre, mbujape ha pohãñana iróva reheve. Upe mbujape to jejapo trígo ku’i oñembovu’ỹvagui.

Upéicha pe’u: jeku’a jopýpe, pende py rehegua pende py rehe ha yvyra jekoha pende pópe. Ha pe’u pya’e, Tupã Ñandejára Páskua, niko hína. Che ahasáta upe pyharépe Egipto rupi ha ajukapáta Egiptogua ra’y ypykue, taha’e kuimba’e térã mymba.

Upéicha ainupãta Tupã gua’ukuéra Egipto guápe. Che hína pende Jára! Upe tuguy oĩva pende róga rokẽ rehe, ha’éta mba’e rechaukaha ha ahasakuévo ahasáta henonde rupi ha ndoike mo’ãi pende jukávo porojukahára, ainupã ramo Egíptope. Ko ára hína mandu’arã peëme ha pemboaretéta chéve peẽ ha pene ñemoñare. Pemboarete  ko ára tembiapoukapy ramo opa árape guarã peẽme ha pene ñemoñarépe”.

Tupä Ñandejára Ñe’ẽ.

SALMO ÑEMBOHOVÁI  115, 12-13. 15-16c. 17-18

Opavave: Mba’éicha piko ikatúta amoengovia Tupã Ñandejárape ha’e ipy’a porãite hague rehe che ndive?

Mba’éicha piko ikatúta amoengovia Tupã Ñandejárape

ha’e ipy’a porã ite hague rehe che ndive?

Upe kópa ñane renohẽva vy’a’ỹgui

amopu’ãne ha hérape añembo’éne. O.

Tupä Ñandejára ombyasy ohechávo omano umi hese ojeroviáva.

Tupä Ñandejára, che niko ne rembiguái!

Ne rembiguái membyre hína che!

Nde upe che jora va’ekue iñapytĩmby aikohágui. O.

Ahepyme’ẽta ndéve che mba’e kuave’ẽ reheve.

Nde rérape, che Jára, añembo’éta.

Ajapóne umi mba’e ha’eva’ekue Tupã Ñandejárape

opa hetãygua renondépe. O.

SEGUNDA LECTURA:

Ñahendúta Tupã Ñandejára Ñe’ẽ San Pablo ohai va’ekue ikuatia peteïhápe Corinto guápe  11, 23-26

Tupã Ñandejára che mbo’e va’ekue ko’ã mba’e che ambohasa hína peëme. Upe pyhare Ñandejára Jesús oñemoñuhãta hápe voi, ohupi va’ekue ipópe mbujapépe, ha omomba’e guasu rire Tupã Ñandejárape, omboja’o ha he’i: “Kóva ha’e che rete, oñeme’ẽva pende rehehápe. Kóva pejapo, che rehe pene mandu’ahápe”.

Upéicha avei, ojekarupa rire, ohupi pe kaguy ryru ha he’i: “Ko kaguy ryru hína pe ñe’ẽme’ẽ pyahu oñemboajéva che ruguy rupi. Péicha pejapo va’erã jepi, che rehe pene mandu’ahápe”. Aipo ramo, ou peve Tupã Ñandejára, peë peromandu’a imano, pe’u jave jepi ko mbujape, ha pey’u ko kaguy.

Tupã Ñandejára Ñe’ẽ.

ACLAMACIÓN  Jn 13, 34

R. Romomba’e guasu ndéve Jesucrísto .

Ko tembiapoukapy ipyahúva aheja peëme:

Pejoayhúkena. Ha che pohayhu háicha pejoayhu avei peë.

Romomba’e guasu ndéve Jesucrísto .

EVANGELIO

Marandu porã Ñandejára Jesucrísto  rekove ha hemimbo’e San Juan omombe’u háicha 13, 1-15

Upe árape Páskua arete mboyve, Jesús oñandu oguahẽmaha ára ha’e ohejávo ko yvy oho haguã oñemboaty  Túva ndive. Ha’e ohayhu mante va’ekue umi ichupe omoirũ va’ekuépe ko yvy ári, ha péicha ohayhu ichupe kuéra ipaha ite peve.

Pyhare Jesús okaru jave hemimbo’e kuéra ndive, aña omoinge Judas, Simón Iscariote ra’y, akãme omoñuhã haguã Jesúspe. Jesús oikuaa Túva omoĩ hague opa mba’e ipo guýpe. Ha’e oikuaa ou hague Tupã Ñandejára rendágui ha Tupä rendápe jevy ohotaha.

Upéva rehe, opu’ã meságui oipe’a ijahoja ha oñapytĩ iku’a rehe peteĩ toálla. Upéi omoĩ y peteï ña’ëme ha oñepyrũ ombojepyhéi hemimbo’ekuérape, ha upéi omokã pe toálla iku’a rehe oĩvape.

Oñembojávo Pédrore ombojepyhéi haguã ichupe, ha’e he’i Jesúspe: Che Jára, nde piko che mbojepyhéita chéve?

Jesús he’i ichupe: Ko’ágã ndereikuaa porãi mba’épa ajapo, upe rirénte rehechakuaáta.

Pedro he’i ichupe: Mba’eveichave ramo ndaheja mo’ãi ndéve rejohéi chéve che py.

Jesús he’i ichupe: Ndajohéi ramo nde py, mba’eve ndereguereko mo’ãvéima che ndive.

Simón Pedro he’i ichupe upépe: Péicha ramo che Jára ani che py añónte ejohéi chéve. Ejohéi avei chéve umi che po ha upéi che akã.

Jesús katu he’i ichupe: Ojahu ramóva niko ipotĩmba, ha ojepyhéinte oikotevẽ. Ha peë niko pene potĩ, oĩ ramo jepe peteï ipotĩ’ỹva.

Jesús he’i: “Oĩ ramo jepe peteï ipotĩ’ỹva”, oikuaágui mávapa pe omoñuhãtava ichupe.

Ombojepyheipa rire ichupekuéra, Jesús omoĩ jevy ijape rehe ijahoja ha upéi oguapy jevy mesápe, ha he’i ichupe kuéra:

Pehechakuaápa peë mba’épa he’ise upe japóva pende rehe? peẽ niko peje chéve “Mbo’ehára” ha “Ore Jára”, ha añeteguánte peje. Upéva niko che.

Upéva rehe, che pene Mbo’ehára ha pende Jára ajohéi ramo peëme pende py, peẽ avei pejohéi va’erã ojupe pende py. Che ahechauka peẽme mba’épa pejapo va’erã, peë pejapo haguã avei che ajapo haguéicha pende rehe.

Ñandejára Jesucrísto  Ñe’ẽ.