LECTURAS DEL MIÉRCOLES SANTO

LECTURAS DEL MIÉRCOLES SANTO:

Primera lectura:

Ko’ágã ñahendúta Tupã Ñandejára Ñe’ẽ Isaías arandukápe oĩ háicha                      50, 4-9a

Tupä Ñandejára che reko mbo’e amokyre’ỹ haguã che ñe’ẽme ikane’õvape.

Ára ko’ẽ rehe oñe’ẽ che apysápe ahendu haguã hemimbo’e.

Tupã Ñandejára oipe’a che apysa, che ndajokói ichupe ha ndaguevíri.

Amoĩ che ape che nupãsévape ha che rendyva’óvagui ndajehekýiri.

Che rova pete ha che rova rehe ondyvúvagui che rova namokañýi.

Tupã Ñandejára upe che pytyvõva.

Upéva rehe nañandúi ajehova api ramo, añemohatã itáicha, aikuaa rupi

nañemotĩ mo’ãiha.

Aguĩ oĩ upe osẽva che rehehápe, mávapa oguereko he’i va’erã che rehe?

Jaha ñañombojovake!

Oguerekóva he’i va’erã che rehe, toñemboja ha te’i!

Tupã Ñandejára upe che pytyvõva, mávapa che moĩ vaíta.

Tupä Ñandejára Ñe’ẽ.

SALMO ÑEMBOHOVÁI                69, 8-10. 21-22. 31. 33-34

Opavave:Tupã Ñandejára, ne mborayhu tuichágui ehendu che ñembo’e.

Nde rehehápe niko heta mba’e ahasa, ha ñemotĩ mante ha’u.

Che ryke’ykuéra mba’eve ndoikuaaséi che hegui,

che rógape okaragua ramo aiko.

Nde tupao ahayhúgui che piru che kã,

ha nde rehe oñeñe’ẽ vai ramo, che rehe oñeñe’ẽ hína. O.

Atĩ, che py’a yvy rehe ho’a, che kangypa ha ndaikuaái ajapótava.

Opa rupi aheka che rechakuaami va’erã,

Ha máva piko opena che rehe?

Pohã vai omoĩ hikuái che rembi’úpe, ha che yuhéivo ome’ẽ chéve vinágre. O.

Tupã Ñandejára réra aropurahéine.

Amoherakuãne ha’e tuichaha.

Imboriahúva tohecha ha tovy’a, ikyre’ỹne umi Tupä Ñandejárarehe ojeroviáva.

Tupä Ñandejára ojapysaka imboriahúva rehe, ha nomboykéi umi iñapytĩmby oikóva. O.

ACLAMACIÓN

Orepysyrõmina, ore ruvicha guasu, nde Rúpe ne ñe’ërendúva, ejererahava kurusúpe

peteï ovecha ra’y ojereraha háichaojejuka haguã.

EVANGELIO

Ko’ágã ñahendúta Ñandejára Jesucrísto  rekove ha hemimbo’e San Mateo omombe’u háicha

                                               26, 14-25

Upe ramo peteĩ umi 12 Jesús remimbo’ekuérava, hérava Judas Iscariote, oho umi pa’i ruvichakuéra rendápe. He’i ichupekuéra:

Mbovýpa peme’ẽta chéve aity ramo Jesús pende pópe?

Ha ha’e kuéra ome’ẽ ichupe 30 pira pire pláta guigua. Ha upe guive, Judas oheka oikóvo mba’éichapa oitýta Jesúspe ipópekuéra.

Pe oñepyrũha árape arete oje’uhápe mbujape oñembovu’ỹva, Jesús remimbo’e kuéra ou hendápe ha oporandu ichupe:

Mamópa reipota rombosako’i ndéve Páskua remboarete haguã?

Ha’e he’i ichupekuéra: Ta peho  ma’ẽra rógape, ha peje ichupe: “Ore Mbo’ehára he’iuka  ndéve kóicha: ‘Che ára oguahẽ potáma, ha ahasase nde rógape Páskua arete, che remimbo’ekuéra ndive”.

Hemimbo’ekuéra ojapopa Jesús he’i haguéicha, ha ombosako’i hikuái Páskua omboarete  haguã.

Upe pyharépe, Jesús oguapy mesápe umi 12 hemimbo’ekuéra ndive; ha ho’u aja hikuái hembi’u, Jesús he’i ichupe kuéra:

Añetehápe ha’e peëme, peteïva pende apytégui che moñuhãta hína.

Upéva tuicha oguapy hese kuéra, ha oñepyrũ oporandu ichupe:

Che Jára, ndachéi mba’épa hína?

Jesús he’i ichupekuéra:

Pe imbujape pehẽngue omohe’õva che rembi’úpe, upéva che reitýta. Che, yvypóraicha aju va’ekue, amano va’erã voínte, he’i háicha Tupã Ñandejára Ñe’ẽ. Ha to jererekóke pe che reitýva umi che rehe ija’e’ỹva pópe. Iporãve va’erã mo’ã ichupe ohecha’ỹ rire ára resa.

Upépe oñe’ẽ Judas pe oitýtava ichupe hína, ha he’i:

Mbo’ehára, ndachéi mba’épa hína?

Jesús he’i ichupe: Ndéma niko ere.

Ñandejára Jesucrísto  Ñe’ẽ.