LECTURAS DEL MARTES SANTO

LECTURAS DEL MARTES SANTO:

Primera lectura:

Ko’ágã ñahendúta Tupã Ñandejára ñe’ẽ Isaías arandukápe oĩ háicha     49, 1-6

Pehendu tetãnguéra yguasu mbyte pegua, pejapysaka tetã mombyry guáva!

Tupã Ñandejára che renói yvy ári aju mboyve, che sy rye guive che réra rehe imandu’a.

Che jurúgui ojapo kyse puku rãimbe, ipópe che mo’ã, che apo hu’y akuáicha ha che moĩ ihu’y ryrúpe.

He’i chéve: “Nde Israel, che rembiguái, nde rehe ajerovia”.

Che katu ha’e che pype: “Reínte añeha’ã ra’e, ha che kane’õ rei mba’everã”.

Tupä Ñandejára katu oñangareko che rehe, ha Tupä Ñandejára ome’ẽ chéve

che rembiapokue repy.

Ha ko’ágã oñe’ẽ Tupã Ñandejára, upe che apo va’ekue che sy rye guive hembiguairã, che rehe ae Jacob ojevy haguã ha’e gotyo ha Israel oñemoĩ ijyke rehe.

Che katu tuicha mba’e Tupã Ñandejára renondépe, ha Tupã Ñandejára che mombarete.

Tupã Ñandejára he’i chéve: “Ndaha’éi  che rembiguairãnte roipotáva remoĩ jevy haguã hekópe

Jacob ñemoñare ha ojevy haguã umi hembýva Israélgui.

Romoingóta uvei tetãnguéra resapehárõ, ikatu haguã yvy jere kuévo oñesẽ jejopy vaígui”

SALMO ÑEMBOHOVÁI      71, 1-4a. 5-6ab. 15. 17

Opavave: Amoherakuãne, nde ore renohẽha rojejopy vaihagui.

Tupã Ñandejára, nde rehe niko ajeheka, ani che rejátei añemotĩ.

Nde, nde reko jojágui che renohẽ ko ajejopy vaihágui,

Che rendu kena, che pe’a jejopy vaígui. O.

Eikókena chéve guarä che reñangarekoha, ha nde che renohẽ jejopy vaígui.

Nde hína upe che rehe reñangarekóva ha upe che mo’ãva.

Tupä Ñandejára, che pe’a umi hembiapo vaíva po guýgui. O.

Nde rehénte voi ajerovia Tupä Ñandejára che mitã guive ajerovia, nde rehénte voi ajeko.

Che sy ryépe aime ramo guare  upe guivéma voi nde rehe ajeko. O.

Opa árape amoherakuãne, reme’ẽha oréve teko joja

ore renohẽha rojejopy vaihagui jepe ko’ã mba’e ndaijái che akãme.

Tupä Ñandejára, che mitã rusu guive niko nde che reko mbo’e

ko’ágã peve amombe’u umi mba’e tuichaite nde rejapo va’ekue.O.

EVANGELIO

Marandu porã Ñandejára Jesucrísto  rekove ha hemimbo’e San Juan omombe’u háicha   13, 21-33. 36-38

Upe árape ko’ã mba’e he’ipa rire, Jesús oñandu tuicha oguapýva hese, ha he’i opavave ohendu haguã:

Añetehápe ha’e peë, peteïva pende apytégui che moñuhãta hína.

Umi hemimbo’ekuéra omañamba ojuehe, ha’e kuéra ndoikuaaígui mávarepa oñe’ẽ. Pe hemimbo’e Jesús ohayhuvéva oguapy hína Jesús yke rehe okarupa aja hikuái, ha Simón Pedro oñatõi ichupe oporandu haguã Jesúspe mávarepa oñe’ẽ hína. Oñembojave ha’e Jesús rehe ha oporandu ichupe:

Che Jára, máva piko hína?

Jesús he’i ichupe:

Amoakỹta peteï mbujape pehẽngue ha upe ame’ẽvape, upéva hína.

Upete omoakỹ peteï mbujape pehẽngue ha ombohasa Judas, Simón Iscariote ra’ýpe. Ha Judas ipojáivo pe mbujape pehẽngue rehe, aña oike ipy’apýpe. Jesús he’i ichupe:

Upe rejapótava kena pya’e ejapo.

Ha avave umi mesápe oguapýva okaru, ndoikuaái mba’e rehepa Jesús oñe’ẽ ichupe péicha. Ha Judas pópe oĩgui viru ryru, oĩ oimo’ãva Jesús he’i hague ichupe oho haguã ojogua oñekotevẽva pe areterã, térã ome’ẽ haguã mboriahúpe.

Ha Judas ho’u pe mbujape pehẽngue, ha upéi osẽ oho. Pyharéma Upéma ramo .

Judas osẽ rire oho, Jesús he’i:

Ko’ágã che, yvypóraicha aju va’ekue ko yvy ári, ajehechauka che tuichaha. Ha che rupi Tupã Ñandejára ojehechauka ha’e tuichaha. Ha che, yvypóraicha aju va’ekue, ahechauka ramo mba’éichapa Tupã Ñandejáratuicha, Tupã Ñandejára avei ohechaukáta mba’éichapa che tuicha che. Ha voiete péicha ojapóta.

Che ra’ykuéra, nda che are mo’ã véima pene ndive. Peẽ che rekáta ágã, ha ha’e haguéicha umi moakãhára  kuérape ha’e avei peëme ko’ágã: Che ahatahápe peẽ ndaikatúi peho.

Simón Pedro oporandu Jesúspe:

Che Jára, mamo piko rehóta?

Jesús he’i ichupe:

Che ahatahápe ndaikatúi ko’ágã reju che ndive. Upe rirénte rejúta.

Pedro he’i ichupe:

Che Jára, mba’e rehe piko ndaikatu mo’ãi aha nde ndive ko’ágã? Che niko aime amano haguã nde rehe.

Jesús he’i ichupe:

Añete piko ere remanóne haguã che rehe? Añete guánte ha’e ndéve: gállo osapukái mboyve, eréta nda che kuaaiha mbohapy jevy.

Ñandejára Jesucrísto  Ñe’ẽ.