LECTURAS DEL LUNES SANTO

LECTURAS DEL LUNES SANTO:

Primera lectura:

Ko’ágã ñahendúta Tupã Ñandejára ñe’ẽ Isaías arandukápe oĩ háicha    42, 1-7

“Kóina ápe che rembiguái, che amo’ãva, che rembiporavo che mbovy’áva.

Ipype amoĩ che espíritu ogueraha haguã teko joja opa tetãme.

Ndosapukái mo’ãi, ndoporoja’o mo’ãi, nohenduka mo’ãi iñe’ẽ okaha rehe, nomopẽ mo’ãi takuapi ojepepýmava,

nombogue mo’ãi tataindy hendy’ímava.

Ojapóta heko itépe upe heko jojáva.

Ndopytu’umo’ãi ha naikangymo’ãi omoĩ meve yvy ári teko joja.

Tetã mombyrygua ojapysakáta hemimbo’e rehe.

Péicha he’i Tupã Ñandejára ojapo ha oipyso va’ekue yvága, ojapo va’ekue yvy ha opa mba’e ichugui osẽva, omopytuhẽva opa yvypóra pype oikóvape:

Che, nde Jára, rohenói ha rogueraha nde pógui, nde rupi amoĩ haguã teko joja.

Che rohenói aipotágui rehechauka che ñe’ẽ me’ẽyvypórakuérape ha resape tetãnguérape.

Rehesape’a haguã ohecha’ỹvape, renohẽ haguã jepokuahágui umi oikóvape iñapytĩmby ha koty ypytũgui umi pytũmbýpe oikóvape.

Tupã Ñandejára Ñe’ẽ.

SALMO ÑEMBOHOVÁI    27, 1-3. 13-14

Opavave: Tupã Ñandejára upe che rekove ohesapéva, ha upe che pytyvõva.

Tupã Ñandejára upe che rekove ohesapéva, ha upe che pytyvõva.

Mávagui piko akyhyjéta?

Tupã Ñandejára oñangareko che rehe,

Máva piko che mongyhyjéta? O.

Opu’ãvo che rehe umi iñañáva, umi che rehe ija’e’ỹva

oñemoĩvo che rehe, ha’e kuéra jevýnte umi oñepysãnga ha ho’áva. O.

Oñemboheta ramo  jepe ñorairõhárakuéra

ha che mongora, ndakyhyjéi chéne ichuguikuéra.

Ondyry ramo jepe che rehe hikuái, nda che py’atarovái chéne. O.

Aikuaa Tupä Ñandejára imba’e porãtaha che ndive aikove aja pukukue.

Pejerovia Tupä Ñandejára rehe ha ani pene kangy.

Pende py’a guasúke ha pejerovia Tupä Ñandejára rehe. O.

EVANGELIO

Marandu porã Ñandejára Jesucrísto  rekove ha hemimbo’e San Juan omombe’u háicha  12, 1-11

Upe ára rupi Páskua arete 6 ára oguahẽ mboyve Jesús oho Betániape, Lázaro ku ha’e omoingove jevy va’ekue oikohápe. Upépe oñemboaty hikuái pyhare okaru haguã Jesús rérape.

Marta ogueroja tembi’u mesápe ha Lázaro oguapy oĩ umi oguapýva mesápe okaru haguã Jesús ndive. María ogueru peteĩ hyru mba’e ryakuã porã nardo etégui ojejapóva ha oñohẽmbaite Jesús pýre. Upéi omokã umi ipy hi’ávape. Ha pe mba’e ryakuã porã omoenyhẽmba pe óga ryepy. Upépe Judas Iscariote, pe omoñuhãtava hína Jesúspe, he’i:

Mba’e rehe piko noñeme’ẽi ra’e ko mba’e ryakuã porã 300 pláta pehẽngue rehe oñepytyvõ haguã mboriahúpe?

Judas nde’íri péicha ojepy’apýgui imboriahúva rehe. Ichupe oñeme’ẽ pe viru ryru ha’e oñangareko haguã hese, ha upégui ha’e omondáva jepi. Jesús he’i ichupe:

Eheja. Oñongatu niko hína kuri añeñotỹ ramo guarã. Imboriahúva niko oĩta pende apytépe opa árape, chéve katu Nahániri mo’ãi.

Heta oĩ ohendúva Jesús oĩha Betániape. Upéva rehe, oho hikuái upépe ohecha haguã Jesúspe ha Lázarope avei, ku Jesús omoingove jevy va’ekue. Upéma ramo, umi pa’i ruvicha kuéra oñemoĩ peteï ñe’ẽme ojuka haguã Lázarope avei. Ha’e rupi oĩ heta ojehejáva ichugui kuéra ojerovia haguã Jesús rehe.

Ñandejára Jesucrísto  Ñe’ẽ.