LECTURAS DEL DOMINGO DE RAMOS

LECTURAS DEL DOMINGO DE RAMOS

Primera lectura:

Ko’ágä ñahendúta Tupä Ñandejára ñe’ẽ Isaías arandukápe oĩ háicha                                                                   50, 4-7

Tupä Ñandejára che reko mbo’e amokyre’ỹ haguã che ñe’ẽme ikane’õvape.

Ára ko’ẽ rehe oñe’ẽ che apysápe ahendu haguã hemimbo’e.

Ñandejára oipe’a che apysa, che ndajokói ichupe ha ndaguevíri.

Amoĩ che ape che nupãsévape ha che rendyva’óvagui ndajehekýiri.

Che rova pete ha che rova rehe ondyvúvagui che rova namokañýi.

Tupä Ñandejára upe che pytyvõva.

Upéva rehe nañandúi ajehova api ramo, añemohatã itáicha, aikuaa   

rupi nañemotĩ mo’ãiha.

Tupä Ñandejára Ñe’ẽ.

SALMO ÑEMBOHOVÁI    21, 8-9. 17-18a. 19-20. 23-24

R.Che Jára, Che Jára, mba’e rehe piko che reja che añorei.

Umi che recháva oñembohory che rehe,

oñembohova vai, oñemohembe jere, he’i kuévo:

Tupä Ñandejára rehe niko ojerovia, tove toipytyvõ ichupe.

Tupä Ñandejára ichupe ohayhu ramo toipe’a ichupe ivaívagui. R.

Mondaha atýra jaguáicha che mongora.

Che po ha che pýpe che kutu hikuái.

Umi che kãngue ojekuaapa. R.

Che ao rehe oñomboja’o che ahoja rehe oity po’a.

Tupä Ñandejára, ani reñemomombyry che hegui,

nde niko upe che mombaretéva, eju che pytyvõ. R.

Nde rehe che mandu’áta che ryke’ykuérape,

ha rogueropurahéita ijatyhápe hikuái.

Peë Tupä Ñandejára rehe pejeroviáva, pemomba’e guasu ichupe!

Jacob ñemoñarekuéra, pembotuicha ichupe!

Israel guáva guive,peñesũ henondépe! R.

Segunda lectura:

Ñahendúta Tupä Ñandejára Ñe’ẽ San Pablo ohai va’ekue Filipos guápe                                                          2, 6-11

Cristo niko, Tupä Ñandejára va’ekue, opáichavo nahakate’ỹi Itupä reko rehe, opoi va’ekue uvei pe imba’évagui ha oiko tembiguái ramo.

Oikóvo oiko háicha opa yvypóra, ou yvy ári ñandeichagua yvypóra ramo. Oñemomirĩ ijupe voi, iñe’ẽ rendúvo omano meve osãingohápe kurusu rehe.

Upéva rehe Tupä Ñandejára ohupi ichupe yvateve opavavégui, ha ome’ẽ ichupe upe téra oĩva opa téra ári, ikatu haguãicha Jesús réra renondépe, oñesũ opavave oĩva yvágape, yvýpe ha yvy guýpe ha opavave ohechakuaa haguã Jesucrísto  Ñandejaraha, Tupä pe Túva oñemomba’e guasu haguã.

Tupä Ñandejára Ñe’ẽ.

ACLAMACIÓN            Flp 2, 8-9

R. Romomba’eguasu ndéve Jesucrísto

Oñemomirĩ ha iñe’ẽ rehendu omano meve, omano kurusu rehe.

Upéva rehe Tupä Ñandejára ohupi ichupe yvateve opavavégui, ha ome’ẽ ichupe herarã peteï opa téragui tuichavéva.

R. Romomba’e gusu ndéve Jesucrísto.

Evangelio:

Ko’ágä ñahendúta Ñandejára Jesucrísto  rekove

ha hemimbo’e San Mateo omombe’u háicha. Pejapysaka porãtapa hese?                                   

27, 1-2. 11-54

Upe ramo Ko’ẽ mbávo, umi pa’i ruvicha ha umi moakãhára  oñemoĩ peteï ñe’ẽme ojuka haguã Jesúspe. Ogueraha Jesúspe ipokuapy ha omoĩ Pilato, mburuvicha Roma pegua, pópe.

Ogueraha hikuái Jesúspe pe mburuvicha Roma pegua renondépe ha ha’e oporandu ichupe:

Nde piko hína judío kuéra ruvicha guasu?

Jesús he’i ichupe:

Ndéma niko ere.

Ha umi pa’i ruvicha ha umi moakãhára  omoĩ vaisévo ichupe katu Jesús nde’íri mba’eve. Upéma ramo  Pilato he’i ichupe:

Nerehendúi piko umi mba’e vai eta he’íva nde rehe hikuái?

Jesús katu nde’íri mba’evete, ha Pilato ndoikuaái mba’épa he’íta.

Pilato he’i Jesús ojejuka haguã

Páskua arete jave, mburuvicha Romagua opoímiva peteï umi oñemoakãsã   ha yvyrakuápe ojerekóva, opavave oipotáva ojepoi. Oĩ Upéma ramo  yvyrakuápe peteï kuimba’e herakuã guasúva hérava Barrabás. Ha opavave oñemboatývo, Pilato oporandu ichupe kuéra:

Mávaguipa peipota apoi peëme: Barrabás térãpa Jesús, pe Mesías oje’eha?

Pilato ohecha kuaáma judío kuéra omoĩ hague Jesús ipópe ndaija’éigui hese hikuái. Ha oguapy aja ha’e pe oporombojovakehápe, hembireko he’iuka  ichupe: “Ani ejapo mba’eve pe kuimba’e rehe. Mba’eve ivaíva ndojapói ha’e. Ange pyhare ahecha ichupe che képe, ha heta che kéra jopy”.

Umi pa’i ruvicha kuéra ha moakãhára  kuéra katu he’i opavavépe ojerure haguã Pilátope opoi haguã Barrabásgui, ha Jesús katu, ojejuka haguã. Pilato oporandu jevy opavavépe:

Máva ko’ãva mokõigui peipota apoi peëme?

Ha ha’ekuéra he’i:

Barrabás.

Pilato oporandu ichupekuéra:

Mba’épa peipota ajapo Jesús, pe Mesías oje’ehágui?

Opavave he’i:

Emosãingo kurusu rehe.

Ha Pilato he’i ichupe kuéra:

Mba’e ivaíva piko ojapo?

Ha’e kuéra katu osapukái hatãve:

To sãingo kurusu rehe.

Upépe, Pilato ohecha kuaa ndaikatu mo’ãiha ojapo mba’eve ha mba’éichapa opavave ijayvu ha ikatuha oiko ñorairõ. Upéma ramo ogueruka y ha ojepohéi opavave rovake, he’ívo:

Che ndaike mo’ãi ko kuimba’e jejukápe. Pejehecha Peë heseve.

Ha opavave he’i joa:

Ijejukakue topẽ ore rehe ha ore ñemoñarére.

Upéma ramo Pilato opoi Barrabásgui, ha omboepotiuka rire Jesúspe, omondo oñemosãingo haguã kurusu rehe.

Upéi umi ñorairõhára  ogueraha Jesúspe Pilato rógape ha upépe oñemboatypa hikuái ijere rehe. Upéi katu omboi ichupe ha omonde hese peteï ao pytã. Oñopẽñuatĩgui akãngora ha omoĩ iñakã rehe, ha upéi omoĩ peteï yvyra ipo akatúpe. Ha oñesũ hikuái henondépe, oñembohory hese ha he’i:

Víva judío kuéra ruvicha guasu!

Ondyvu avei hikuái hese, ha pe yvyrápe voi oakãnupã ichupe       Oñembohory rire hese upéicha, oipe’a ichugui pe ao pytã ha omonde jevy hese ijao tee. Upéi katu ogueraha ichupe oñemosãingo haguã kurusu rehe.

Jesús oñemosãingo kurusu rehe

Ohokuévo, oñuguaitĩ hikuái peteï kuimba’e hérava Simón ndive, táva Cirenegua. Ichupe oguerahauka Jesús kurusu.

Ha oguahẽvo upe Gólgota herahápe, he’iséva “Akãngue Renda”, ho’ukase hikuái Jesúspe kaguy ojehe’áva pohã iróva reheve. Ha Jesús oikumby’imi rire, ndo’úi.

Ha umi ñorairõhára  omosãingo rire ichupe kurusu rehe, oity po’a oñomboja’o haguã umi Jesús aokue rehe. Upéi katu, oguapy hikuái upépe oñangareko haguã Jesús rehe. Pe iñakã ári katu omoĩ hikuái peteï kuatia he’ihápe mba’e rehepa ojejuka. He’i hese: “Kóva hína Jesús, judío kuéra ruvicha guasu”.

Oñemosãingo avei mokõive ijyképe mokõi mondaha. Ha umi upe rupi ohasáva oñe’ẽ reity Jesúspe ha oñakãmbovava, ha he’i:

Nde niko Tupao reity rire, remopu’ã jevýta va’ekue mbohapy árape. Ejeína pe reimehágui ha eguejy pe kurusúgui nde ramo añete Tupä Ra’y.

Péicha avei oñembohory hese umi pa’i ruvicha, ha umi Moisés rembiapoukapy mbo’eha ha umi moakãhára  kuéra. He’i hikuái:

Hetápe oipytyvõ va’ekue, ijehe katu mba’eve ndaikatúi ojapo. Israel ruvicha guasu ndaje ha’e. To guejy aipo ramo kurusúgui ha jaroviáta ichupe. Tupä Ñandejára rehe niko ojerovia, ha he’i ijehe Tupä ra’yha ha’e. Tupä Ñandejára ohayhu ramo ichupe, tou ha’e toipytyvõ ichupe.

Ha umi mondaha osãingóva kurusu rehe ijyképe jepe, oñe’ẽ reity ichupe.

Jesús omano:

Upe asaje pyte guive ka’aru mbyte rupi peve, yvy tuichakue opyta pytũmbýpe. Upévo Jesús hatã osapukái he’ívo:

Elí, Elí, lemá sabactani?” he’iséva: “Tupä che Jára, Tupä che Jára, mba’e rehe piko che reja cheño?”

Ha umi upépe oĩva ohendúvo upéva, he’i:

Ohenói hína maranduhára Elíaspe.

Upévo peteï upépe oĩva, pya’e oho peteï espónja píari ha omoakỹ rire kaguy haipe, omoĩ peteï takuára apýrare ho’uka haguã ichupe. Ichupe katu oĩ he’íva:

Eheja, jahecha oúpa Elías oipytyvõ ichupe.

Jesús katu osapukái hatã jevy, ha omano. Upévo pe ao poguasu osãingóva Tupaópe osoro mbyte rupi, yvate guio yvývo. Yvy oryryipa, ha umi ita ojekapa. Umi omanóva oñeñotỹha juru katu ojepe’apa, ha heta imarangatúva, omano va’ekue, oikove jevy. Umíva osẽ upe oñeñotỹ haguégui, ha oike táva marangatu Jerusalénpe, ha heta umi ohecháva ichupe kuéra.

Pe ñorairõhára  ruvicha ha umi hendive oĩva oñangareko haguã Jesús rehe ohechávo pe yvy ryrýi ha umi mba’e ojehúva, okyhyje eterei, ha he’i:

Kóva niko añetehápe Tupä Ra’y ra’e.

Ñandejára Jesucrísto  Ñe’ẽ.