LECTURAS DEL DOMINGO DE PASCUA DE RESURRECCIÓN

DOMINGO DE PASCUA DE RESURRECCIÓN

LECTURA PETEÎHA:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ
háicha 10, 34a. 37-43

Upéma ramo Pedro oñepyrũ oñe’ẽ ha he’i:

Pe ẽ peikuaa porã upe ojehu va’ekue Israel retãme, oñepyrũvo Galilea rupi, Juan omoerakuã rire tekotevẽha oñeñemongarai. Peikuaa Tupã Ñandejára omoenyhẽ hague pokatu ha Espíritu Sántogui Jesús Nazaret guápe, ha Jesús ohasa hague ojapóvo iporãva ha omonguerávo opa ohasa asývape mba’e pochy poguýpe.

Upéva ikatu va’ekue ojapo Tupã Ñandejára oĩgui hendive, ha ore opa mba’e Jesús ojapo va’ekue rechahare Judea ha Jerusalénpe.

Upéi ojuka hikuái ichupe omosãingóvo kurusu rehe. Tupã Ñandejára katu omoingove jevy ichupe mbohapy ára haguépe, ha ojechauka oréve. Ha’e ndojechaukái opa tetã guápe, orévente uvei, Tupã Ñandejára ore poravo va’ekuépe upe mboyvéma voi, mba’e rechaharã.
Ore rokaru ha roy’u va’ekue hendive oikove jevy rire.

Ha’e ore mondo romoerakuãvo tetãguápe, Tupã omoingo hague ichupe oikovéva ha omanóva
mbojovakehárõ. Opa maranduhára oñe’ẽma va’ekue Jesús rehe, ha he’i va’ekue
umi hese ojeroviávape ojeheja reipáta iñangaipa.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 118, 1-2. 16-17. 22-23
Opavave: Kóva ko árape Tupã Ñandejára oñemongu’e, javy’a joáke hendive.

Pemomba’e guasu Tupã Ñandejárape, ha’e niko ipy’a porã ha imborayhu ndopái
araka’eve.

Mayma Israelgua te’i: “Tupã Ñandejára mborayhu ndopái araka’eve”. O.

Tupã Ñandejára ipyapýgui tuicha mba’e ojapo, Tupã Ñandejára ipyapy mbarete,
Che namanói chéne aikovéta amoherakuã haguã upe Tupã Ñandejára ojapóva. O.

Upe ita omboykéva óga mopu’ãhára, upéva ári ko’ágã oñemopu’ã.
Tupã Ñandejára upéicha ojapo ha ore jurujái ore rohechávo. O.

LECTURA MOKÔIHA:
Ñahendúta Tupã Ñandejára Ñe’ẽ San Pablo ohai va’ekue Colosas guápe

3, 14

Che pehenguekuéra:

Peẽme niko peñemoingove jevy Cristo rupi, peheka umi mba’e yvága reheguáva, pe Cristo oguapyhápe Tupã Ñandejára akatúape. Pejepy’a mongeta umi mba’e yvága peguare, ani yvýpe guáre.

Peẽ niko pemano va’ekue ha Tupã Ñandejára oguereko iñongatupy peẽme guarã peikove haguã Cristo ndive. Cristo voi niko pe pende rekove. Ágã ha’e oúvo, peẽ pejúta avei hendive pene renyhẽ mimbipa reheve.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SECUENCIA
Debe decirse hoy; en los días de la octava, es optativa.

Ñandejára Jesucrísto rayhupárakuéra ñamoĩ Tupã Ñandejára ra’y pópe ñane remikuave’ẽ momba’eguasu rehegua ojora va’ekue ñane angaipa Cristo imara’ỹva, omoĩ porã jevy va’ekue hi’angaipávape ñande Ru ndive.

Mano ha tekove oñembojovake ñera’ã mbaretépe pe mburuvicha guasu omano va’ekue ha ko’ágã oikove jevy.

Ere oréve María Magdalena mba’épa rehecha tape rehe ahecha Ñandejára Jesucrísto tyvy ha Tupã Ñandejára oikove jevýva rova ojajaipáva.

Ahecha ángelkuérape, ohecha va’ekue pe mba’e hechapyrã ahecha Ñandejára Jesucrísto oñeñuvã hague ha ijaokuéra oikove jevy Cristo che jeroviaha, ha omotenondéta hemimbo’ekuérape Galiléape.

Jaikuaa Ñandejára Jesucrísto oikove jevyha añetehápe nde, Mburuvicha guasu nde pu’akapáva, ore poriahuverekomikena.

ALELUIA 1Cor 5, 7b-8

Aleluia.
Cristo niko pe Ovecha Ra’y ñande Páskua pegua, omano va’ekue ñande rehehápe.
Aipo ramo, upéicha jarohory va’erã ñande Páskua.
Aleluia.

EVANGELIO
Ñandejára Hesukrísto jehasa asy hemimbo’e San Juan omombe’u háicha 20, 1-9

Opavave: Romomba’e guasu ndéve, Ñandejára.

Upe semána ñepyrũha ára pyharevetépe, ko’ẽju jave, María Magdalena oho pe itakua
Jesús oñeñotỹ haguépe. Ojuhu ojepe’a hague pe ita ombotýva pe itakua juru. Ha pya’e oho
Simón Pedro ha ku Jesús remimbo’e ha’e ohayhu etéva rendápe, ha he’i ichupekuéra:

Ojereraha niko Ñandejára retekue pe itakuágui, ha ndoroikuaái mamópa oñemoĩ.
Upépe Pedro ha pe Jesús remimbo’e ambue, osẽ oho pe itakuápe. Mokõivéva
pya’e oho, pe ambue katu oho pya’evéva Pédrogui ha ha’e raẽve oguahẽ.

Ojayvy omaña haguã pe itakuápe ha ohecha umi ao ojejokua haguépe Jesús retekue, ha ndoikéi.
Hapykuéri oguahẽ Simón Pedro, ha oike voi ha’e pe itakuápe. Ha’e avei ohecha upépe
umi ao, ha ohecha avei pe ao Jesús akã ojejokua haguépe oñemboapu’a ha oñemoĩ
hague ambue hendápe ha’eño.

Upévo oike avei pe ambue Jesús remimbo’e, pe oguahẽ raẽve va’ekue. Ha ohechávo mba’épa ojehu, oguerovia Jesús oikove jevy hague.

Upéma ramo jepe ndoikuaái hikuái mba’épa he’ise Tupã Ñandejára Ñe’ẽme he’i
ramo ha’e oikove jevy va’erãha. Upe rire mokõive oho jevy pe opyta haguépe oiko.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.