Ñahendu Hesu Ñe’ê. Sábado II de Pascua

Escucha el evangelio y la reflexión en: https://youtu.be/oXXRNDL2j28

25 abril: San Marcos evangelísta ára

Marcos 16, 15-20

Upérõ Jesús ojechauka umi 11 apóstolkuérape, ha he’i chupekuéra: – Tapeho opa rupi ko yvy apére ha pehenduka opavavépe ko marandu porã. Umi ogueroviáva ha oñemongaraíva ojesalváta. Umi oguerovia’ỹva katu oñehundíta.

Umi che rehe ojeroviáva heta milágro ojapóne. Che rérape omosẽne hikuái demóño ha oñe’ẽne ñe’ẽ oñeñe’ẽ’ỹvape ha ipyahúva chupe kuéra. Ipópe ojagarráne mbói térã ho’u ramo venéno ndojehúi chéne chupe kuéra mba’eve. Omoĩne ipo hasývare ha umíva okueráne.

Jesús oñe’ẽmba rire idisípulokuéra ndive, Tupã ohupi chupe yvágape. Upépe oguapy
ha’e Tupã ykére. Idisípulokuéra katu osẽ omombe’u pe ohasa va’ekue oparupiete. Ha
Ñandejára oipytyvõ mante chupe kuéra. Umi milágro ojapóva rupi ojehecha añeteha
umi mba’e ha’e kuéra he’íva.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta ñane hénte kuéra yma guare ha umi ñande ypykue ningo ñande ndajaikuaa jepéi. Oñemombe’únte ñandéve oiko hague ha la ikáso kuéra, iñe’ẽngue hamba’e. Ha ñande jaroviapa umía. Jaikuaa ningo nañanembotavy mo’ãi ñande ru ha ñande sy, nde’i
rei mo’ãi ñandéve. Ha ñandéma ave upéi ñamombe’u jaikuaa ha jahecháramo guáicha.

Péicha oiméne raka’e oiko San Marcos ndive. Ha’e niko oscrivi omombe’u haguã raka’e ymaite Hesu rekove, iñe’ẽngue, hembiapo ha ikáso kue. Ha la Márko ningo ndoikuaa jepéi Hesúpe. Ha’e ohendúnte upe San Pedro omombe’u va’ekue Hesu rekovére. Omoirũ raka’e Márko la San Pédrope opárupi oikóramo guare opredika ha omombe’u opavavépe Ñandejára Hesukrísto ñe’ẽ, hekove, hemimbo’e ha ikásokuéra.

Ha la Márko upérõ ipyahu raka’e ha ojapysaka umi mba’e Pedro he’íva, oñatende porã
voi ha oanota paite oikóvo raka’e San Pedro omombe’úva Hesu rehegua, ha ombyaty
paite oikóvo raka’e ikuatia ani haguã hesarái.

Márko oiko raka’e avei San Pablo ndive uperire okorre, omoirũ ichupe heta henda rupi. Oiko jepe ichugui peteĩ misionero vale. Heta mba’e Márko oikuaa tenonderã San Pedro rupi ha upéi katu San Pablo rupi. Ha’e kuéra omombe’úvo oikóvo upérupiumi mba’e Hesu ohasa va’ekue ha ombo’e vaekue oikove aja. Ha péicha Márko ombyaty tapére heta arandu.

Ha péicha ou oheja ñandéve ipógui pe Evangelio marangatu San Márko ohai vaekue, ñande jaikuaa porãve haguã Hesu rekove. Ipahápe Márko ojejuka avei Ñandejára rayhupápe.Ou oñemopeteĩ avei upéicha Hesu ndive imanóme.

Oimépa che reindy ha nde che irũ reikuaa nde ave umi cristiano nde válle ha nde róga gua, Ñandejára rayhupápe nembo’e vaekue Kirito rembiasa ha iñe’ẽ, ohechauka va’ekue ndéve Ñandejára rape. Mba’épa la nemandu’avéva ichugui kuéra, iñe’ẽnguégui. Mba’épa upe eguerohoryvéva ichuguikuéra.

Pa’i Alberto Luna.