VIERNES TERCERO DE PASCUA

VIERNES TERCERO DE PASCUA

Primera lectura:

Ko’ágä   ñahendúta Tupã Ñandejára ñe’ẽ Apóstol kuéra rembiapokuépe oĩ háicha                             

    9, 1-20

Sáulo akóinte he’i ojukataha umi Tupä Ñandejárare ojeroviávape. Upévare oho pa’i guasu rendápe, ha ojerure ichupe kuatiañe’ẽ Damasco pegua judío kuéra tupaópe guarã, oheja haguã ichupe oheka umi oikóvape upe Tape Pyahúre, kuimba’éva ha kuñáva, ogueraha haguã ipokuapy Jerusalénpe. Oguahẽ mbotávo táva Damáscope katu, peteĩ mba’e rendy oúva yvágagui omimbipa sapy’a ijerekuévo. Saulo ho’a yvýre ha ohendu peteĩ he’íva ichupe: “Saulo, Saulo, mba’ére piko reñemoĩ che rehe?”

Saulo oporandu: “Máva piko nde, che Jára?” Upe oñe’ẽva he’i ichupe: “Che hína Jesús, upe nde reñemoĩha. Epu’ã ha eike upe távape, upépe oje’éta ndéve ne rembiaporã.”

Umi omoirũva Sáulope oñemondýi eterei ohendúgui upe oñe’ẽvape ha ndohechái avavépe. Upéi Saulo opu’ã ha ojesape’ávo ndohechái mba’eve. Oisãmbyhy ichupe ipógui ha ogueraha hikuái Damáscope. Upépe oĩ mbohapy ára ohecha’ỹre, hoy’u’ỹre ha ho’u’ỹre mba’eve. Damáscope oiko peteĩ Jesús reroviáva hérava Ananías, ha Ñandejára oñe’ẽ ichupe peteĩ jechauka rupi, ha he’i: “Ananías!” Ha ha’e he’i: “Ápe aime, che Jára.”

Jesús he’i ichupe: “Epu’ã ha tereho upe táva roka, hérava: “Ikarẽ’ỹvape”, ha Judas rógape eporandu peteĩ kuimba’e Tarsogua Saulo héravare.

Oñembo’e hína, ha peteĩ jechauka rupi ohecha peteĩ kuimba’e Ananías héravape oike ramo ha omoĩ ipo hese ohecha jevy haguã.”

Ohendúvo kóva Ananías he’i: “Che Jára, heta umi oñe’ẽva chéve ko kuimba’ére, ha omombe’úva opa mba’e ivaíva ojapo va’ekue Jerusalénpe umi ne mba’évare. Ha ágã ou kuri ápe pa’i ruvicha kuéra remimbou ramo ogueraha haguã ipokuapy umi nde réra ohenóivape.”

Jesús he’i ichupe: “Tereho katu, che aiporavo pe kuimba’épe che moerakuã haguã opa tetã ambue guápe, imburuvicha guasu kuérape ha avei Israelgua kuérape. Che ahechaukáta ichupe mba’éichaitépa ohasa asy va’erã che rehehápe.”

Ananías oho upe óga Saulo oĩháme. Oikévo omoĩ ipo hese ha he’i ichupe:

Che pehẽngue Saulo, Ñandejára Jesús, upe ojechauka va’ekue ndéve tape reju hague rupi, che mbou rehecha jevy haguã ha ne renyhẽ haguã Espíritu Sántogui.

Upe vove okúi Saulo reságui mba’e pirekuéicha, ha ohecha jevy. Upérõ opu’ã ha oñemongaraiuka. Upéi okaru ha imbarete jevy, ha opyta ára mbovymi umi ogueroviáva oikóva Damáscope ndive.

Upéi Saulo oñepyrũ omoerakuã judío kuéra tupao rupi Jesús ha’eha Tupã Ra’y.

Tupã Ñandejára Ñe’ẽ.

SALMO ÑEMBOHOVÁI                                  116, 1-2

R. Ñandejára to ñemomba’e guasu.

O bien:

Aleluia.

To momba’e guasu Tupä Ñandejárape tetã nguéra,

maymáva tombotuicha ichupe. R.

Ñande rayhu eterei niko ha’e,

ha heko jeroviaha opa árape guarã. R.

ALELUIA

Jn 6, 56

Aleluia.

“Pe ho’úva che Rete ha omboy’úva che Ruguy

oï che ndive ha Che aime hendive”,

he’i Ñandejára Jesucristo.

Aleluia.

EVANGELIO

Mi carne es la verdadera comida

y mi sangre, la verdadera bebida

Ko’ágä   ñahendúta Ñandejára Jesucristo rekove ha hemimbo’e San Juan omombe’u háicha. Pejapysaka porãtapa hese?                                                    

   6, 51-59

Upe ramo Jesús he’i judío kuérape: Che hína pe pan oporomoingovéva, oguejýva yvágagui. Upéva pe pan ho’úva oikovéta opa ára guarã. Pe pan che ame’ẽtáva peẽme niko che rete voi hína, che ame’ẽva opavave rehehápe, oikove haguã.

Kóva ombopochy umi judío kuérape, ha he’i hikuái ojupe: Mba’éicha piko hete ho’ukáta ñandéve?

Jesús he’i ichupe kuéra: Añetehápe ha’e peẽme: ndape’úi ramo che, yvypóraicha aju va’ekue, retégui ha ndape’úi ramo che ruguýgui, ndapeikove mo’ãi. Pe ho’úva che rete ha che ruguýgui oikovéta opa ára guarã, ha che amopu’ã jevýta ichupe ára pahápe. Che rete niko tembi’u ete hína ha che ruguy pe mba’e pey’u va’erã ha’etéva. Che rete ha che ruguýgui ho’úva niko Peteĩnte che ndive, ha che peteĩnte hendive.

Che Ru, che mbou va’ekue niko oikovéva, ha ha’e rupi che aikove. Péicha avei, upe che retégui ho’úva, oikovéta che rupi. Che añe’ẽ hína peẽme upe mbuja yvágagui oguejy va’ekuére. Upéva ndaha’éi ku manáicha pende ru kuéra ypykue ho’u va’ekue, ha péicha ramo jepe omano. Kóva ko pan ho’úva, oikovéta opa ára guarã.

Jesús ombo’e ko’ã mba’e Cafarnaúm judío kuéra tupaópe.

Ñandejára Jesuicristo Ñe’ẽ.