LECTURAS SÁBADO SEXTO DE PASCUA

LECTURAS SÁBADO SEXTO DE PASCUA

LECTURA PETEÏHA:

Ko’ágä   ñahendúta Tupã Ñandejára ñe’ẽ Apóstolkuéra rembiapokuépe oĩ háicha  

                          18, 23-28

Aremi rire Pablo osẽ jevy oho Galacia ha Frigia rupi omokyre’ỹvo umi Jesús reroviahápe.

Umíva umi árape oguahẽ Éfesope peteĩ Israelguáva hérava Apolos, Alejandriagua. Oñe’ẽ kuaa eterei ha oikuaa porã Tupã Ñandejára kuatiañe’ë nguéra.

Oikuaáma Tupä Ñandejára rape ha oñe’ẽ kyre’ỹ eterei, oporombo’e sakã porãvo Jesús Guiguáre, Juan oporomongarai reheguánte jepe upe oikuaáva. Apolos oñemoĩ oñe’ẽ kyhyje’ỹre judío kuéra tupaópe. Ohendu vove ichupe Priscila ha Aquila ogueraha ichupe ha’eñoháme ha omoesakã porãve ichupe upe Tupã Ñandejára rape.

Apolos ohasase ramo guare Acáyape, Jesús reroviaha pehẽnguekuérava oguerohory, ha ohai kuatiañe’ẽ umi upepegua Jesús reroviahápe, omoguahẽ porã haguã ichupe. Oguahẽvo Acáyape oipytyvõ porã umi Tupã Ñandejára py’a porã rupi oguerovia va’ekuépe. Opavave renondépe niko ombohovái umi Israelguávape, ohejávo ichupe kuéra oikuaa’ỹre mba’épa he’íta, ha oiporu pype Tupã Ñandejára kuatiañe’ẽ nguéra, ohechauka Jesús ha’eha upe Mesías.

Tupã Ñandejára Ñe’ẽ.

SALMO ÑEMBOHOVÁI      46, 2-3. 8-10

R. Tupã Ñandejára hína tetãnguéra ruvicha guasu.

O bien:

Aleluia.

Opa tetã nguéra pejepopete, vy’a pópe perosapukái Tupãme.

Ñandejára yvateteguágui jakyhyje va’erã,

ha’e hína mburuvicha guasu. R.

Tupã Ñandejára hína tetã nguéra ruvicha guasu, peropurahéike ichupe.

Tupã Ñandejára oisãmbyhy tetã nguéra,

Tupã Ñandejára oĩ iguapyha marangatúpe. R.

Opa ite mburuvicha kuéra oñemoĩ Tupã,

Abraham Jára, retãgua ndive. Tupã oĩ mburuvicha guasu kuéra ári,

ha’e upe imbaretevéva opavavégui. R.

ALELUIA Jn 16, 28

Aleluia.

Cha asë che Túvagui ha aju pene rendápe.

Ko’ágä porohejáta aha jevy haguä che Túva rendápe.

Aleluia.

EVANGELIO

El Padre los ama,

Porque ustedes me aman y han creido

Marandu porã ñahendúta Ñandejára Jesucristo rekove ha hemimbo’e San Juan omombe’u háicha  16, 23b-28

Upe ramo ohasa mboyvemi Tupã Ñandejára ykére, Jesús he’i hemimbo’ekuérape:

“Añetéko ha’e peẽme: Che Ru ome’ẽta peẽme opa mba’e pejeruréva ichupe che Rérape. Ko’ágã ite peve niko mba’eve gueteri ndapejeruréi che rérape. Pejerure ha oñeme’ẽta peẽme, pene renyhẽ haguã vy’águi.

Ñe’ẽ mbojojápe niko añe’ẽ peẽme aikóvo ko’ágã peve.

Oguahẽta katu ára ha upérõ nañe’ẽ mo’ã véima peẽme péicha. Amombe’u porãta peẽme opa mba’e che Rúre. Upéva upe árape, pejeruréta ichupe che rérape. Ha che natekotevẽ mo’ãi ajerure ichupe pende rehe, che Ru voi pende rayhúgui. Ha’e pende rayhu, peẽ che rayhúgui chéve, ha pegueroviágui che ajuha Tupãgui. Che Ru rendágui asẽ va’ekue aju haguã ko yvy ári. Ha ko’ágã ahejáta ko yvy, aha jevy haguã che Ru rendápe.

Ñandejára Jesucristo Ñe’ẽ.