LECTURAS MARTES VII DE PASCUA

LECTURAS MARTES VII DE PASCUA

MARTES VII DE PASCUA

LECTURA PETEÏHA:

Ko’ágã  ñahendúta Tupã Ñandejára ñe’ẽ Apóstolkuéra rembiapokuépe oĩ háicha          20, 17-27

Páblo oĩ aja Milétope ohenoiuka moakãhárava Jesucristo iglésia Éfeso peguápe. Oguahẽvo hikuái, he’i ichupe kuéra: “Peẽ peikuaa mba’éichapa aiko, aju ypy guive Ásiape. Opa ára aiko pende apytépe Tupä Ñandejára rembiguáirõ ajejapo’ỹre, heta tesay ha heta jehasa asy pa’ũme, oúva che ári umi Israelguáva guio. Upeichavérö, ndahejái va’ekue amoerakuã ‘ỹre peẽme opa mba’e iporãtava peẽme guarã, pombo’évo opavave renondépe ha pende róga kuéra rupi.

Israelguáva ha Israel gua’ỹvape ha’e va’ekue ojevy haguã Tupã gotyo ha oguerovia Ñandejára Jesúspe. Ha ágã aha Jerusalénpe, Espíritu he’ígui chéve, aikuaa’ỹre che ra’arõva upépe. Peteĩ mba’énte aikuaa, opa táva ahaha rupi, Espíritu Santo he’i chéve che ra’arõha koty ypytũ ha heta jehasa asy. Che katu nambyasýi che rekove, ikatúma guive añani py’a rory reheve ipaha ite peve. Ha ajapo upe tembiapo ome’ẽ va’ekue chéve Ñandejára Jesús amoerakuãvo Tupã rayhu marandu porã.

Ha ágã aikuaa porã, mavave peẽ amoerakuã  va’ekuépe Tupã Ñandejára remisãmbyhy, nda che recha mo’ã veimaha. Upévare ha’ese peẽme ko árape, ndo’aiha che ári mba’eve ikatúva ojehu peẽme, ndahejái haguére amoerakuã ‘ỹre peẽme Opa ite Tupã Ñandejára rembipota, añomi’ỹre pende hegui mba’eve.

Tupã Ñandejára Ñe’ẽ.

SALMO ÑEMBOHOVÁI      67, 10-11. 20-21

R. Ñamomba’e guasu Tupã Ñandejárape

O bien:

Aleluia.

Ama neporãva rembou Tupä Ñandejára:

ha nde yvy uhéi rembogue va’ekue.

Upépe ne retã oñemohenda.

Opavavépe rejehu, ha hemikotevẽ imboriahúvape reme’ẽ. R.

Ñamomba’e guasu Tupã Ñandejárape

ñande pe’áva jajejopy vai hágui.

Ha’e opa árape ijapére ohupíva ñane mba’e pohýi.

Tupã niko upe ñane pytyvõva ha upe ndohejáiva ñamano. R.

ALELUIA Jn. 14, 16

Aleluia.

Che ajeruréta che Rúpe ha Ha’e ome’ëta peëme ambue Pytyvöha pene moirü haguä opa árape.

Aleluia.

EVANGELIO

Marandu porã Ñandejára Jesucristo rekove ha hemimbo’e San Juan omombe’u háicha   17, 1-11a.

Upe rao ohasa mboyvemi Tupã Ñandejára ykére, Jesús oma’ẽ yvága gotyo ha péicha oñembo’e:

“Che Ru, ko’ágã niko oguahẽma che mbotuicha haguã chéve, nde Ra’ýpe, ha’e avei che rombotuicha haguã. Nde niko remoĩ ipo guýpe opa yvypóra, ha’e ome’ẽ haguã jeikove opa’ỹva opa umi ichupe reme’ẽ va’ekuépe. Ha upe jeikove opa’ỹva niko kóva: Ta nde kuaa ndéve Tupã Ñandejára añete ha peteĩ etéva, ha Jesucrístope, upe nde rembou va’ekuépe. Che niko rombotuicha ko yvy ári, ha amoguahẽ hu’ãme upe nde reme’ẽ  va’ekue chéve ajapo haguã. Aipo ramo che Ru, taime nde ypýpe ha che mbotuicha jevy, aime haguéicha ne ndive ko yvy ojejapo mboyve ramo guaréicha.

Umi nde reiporavo va’ekuépe chéve reme’ẽ haguã, umívape aikuaauka mávapa nde. Nde mba’e va’ekue ha’e kuéra, ha chéve reme’ẽ, ha ojapo hikuái ne rembipota. Ko’ágã oikuaa hikuái opa mba’e reme’ẽ va’ekue chéve, ndete voi reme’ẽ va’ekue. Amoguahẽ ichupe kuéra ne Ñe’ẽ, nde reme’ẽ va’ekue chéve, ha iñe’ẽ rendu hikuái. Ohecha kuaa hikuái añete, che aju hague ne rendágui ha nde che mbou hague.

Añembo’e ndéve umi ne mba’évare, umi nde reme’ẽ va’ekue chéve. Nañembo’éiri umi nde rehe ojerovia’ÿvare. Opa umi che mba’éva niko ne mba’e, ha ne mba’éva, che mba’e avei. Ha’e kuéra rupi ojehecha che chetuichaha. Che niko ahátama aime haguã ne ndive ha naime mo’ã véima ko yvy ári.

Ñandejára Jesucristo Ñe’ẽ.