LECTURAS MARTES SEMANA XI TO

LECTURAS MARTES SEMANA XI TO

Ko’ágä   ñahendúta Tupã Ñandejára ñe’ẽReyes aranduka peteĩhápe oĩ háicha    21, 17-29

Ñabot omanorire Tupã Ñandejára oñe’ẽ Elías Tisbé guápe ha he’i ichupe: “Tereho pya’e Israel ruvicha guasu Ajab rendápe oikóva Samáriape. Ko’ágä   oĩ hína Nabot parraltýpe, oho haguépe oñemomba’e haguã hese. Ere ichupe: ‘He’iuka ndéve Tupä Ñandejára: Nabótpe rejuka ha reipe’a haguére ne mba’e’ÿva, upe oheréi haguépe huguy jagua kuéra, oheréita avei nde ruguy.”

Ajab he’i Elíaspe: Che topa jeýma piko nde, na nde a’éi etéva che rehe?

Elías he’i ichupe: Rotopa jevy. Ha rejapo haguére pe Tupä Ñandejára oipota’ỹva, ápe aime roinupã haguã. Upévare péicha he’i Tupä Ñandejára: ‘Arúta nde ári ivaíva ha ahundíta opa ne ñemoñare. Ahundíta opa ne ñemoñare kuimba’éva Israélpe oĩva. Hi’arive ajapóta nde rogagua rehe upe ajapo va’ekue Jeroboam Nabat ra’y ha Baasá Ahías ra’y rogagua rehe che mbopochy haguére ha rejapouka haguére ivaíva Israel guápe’. Jezabel rehe katu he’iuka Tupä Ñandejára: ‘Jagua kuéra ho’úta Jezabélpe Jezreel ñúme.’ Ha umi nde rogagua omanóvape távape ho’úta jagua, ha umi ñúme omanóvape ho’úta yryvu. (Ndaipóri va’ekue avave ojapóva ivaíva ojapo haguéicha Ajab ombojeroviase haguére hembireko Jezabélpe. Ojapo heta mba’e ijaheipy oikóvo tupã gua’u kuéra rembiguái ramo, oiko haguéicha amorreo kuéra Tupä Ñandejára omosẽ va’ekue Israelgua renonderãgui.)

Ajab ohendúvo opa ko’ã mba’e, omondoro ijao ñembyasýgui, oñemonde ao vosakuépe ha ndo’uvéi mba’eve. Oke ko’ã ao reheve ha ndovy’avéi ete. Upérõ Tupä Ñandejára he’i Elíaspe: “Nde rehechái piko mba’éichapa Ajab oñemomirï che renondépe? Oñemomirï haguére che renondépe, ndajapo mo’ãi ivaíva hogagua rehe ha’e oikove aja, ita’ýra oikove ajánte uvei ajapóta.”

Tupã Ñandejára Ñe’ẽ.

SALMO ÑEMBOHOVÁI          50, 3-6a. 11. 16

R. Tupã ore poriahuvereko, eipe’a ore árigui ore rembiapo vaikue.

Tupã Ñandejára, che poriahuvereko, nde niko ne mba’e porã.

Che poriahuvereko ha eipe’a che árigui che rembiapo vaikue.

Che johéi porã teko vaígui, che mopotĩ che angaipágui. R.

Ahecha kuaa niko ajavyha, ha mba’e vaígui ndaikatúi apoi.

Nde rehe añónte ajapo ivaíva, ha hendape’ỹva nde rovake ajapo. R.

Anítei remaña che angaipáre, che rembiapo ky’águi katu che mopotĩ.

Tupã Ñandejára che nohẽva jejopy vaígui, anítei che reja aporojuka. R.

ALELUIA Jn 13, 34

Aleluia.

Ñandejára Jesucristo he’i:

“Che ame’ë peëme tembiapoukapy ipyahúva:

pejoayhu va’erä peteïva ambuéndi,

Che pohayhu háicha”.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha                                            5, 43-48

Upe ramo Jesús he’i hemimbo’ekuérape:

Peẽ peikuaa avei oje’e hague: “Ehayhu nde rayhúvape, ha na nde a’éi va’erã nde rayhu’ũvare.” Che katu ha’e peẽme: “Pehayhu umi pende rayhu’ỹvape, ha peñembo’e umi pene mbohasa asývare. Péicharõ peẽ pehechaukáta pejoguaha pende Ru yvágape guápe. Ha’e niko oheja kuarahy ojope peteĩcha iñaña ha imarangatúvape guarã, ha ogueru ama hembiapo porã ha hembiapo vaívape guarã.

Mba’éicha piko Tupã Ñandejára omoengoviáta peẽme, peẽ pehayhúrõ umi pende rayhúvapente? Umi viru ombyatýva táva Romape guarã jepe niko péicha oiko. Ha peẽ peñe’ẽrõ umi peikuaáva pente, piko mba’e iporãva oĩ upévape? Umi Tupã Ñandejárare ojerovia’ỹva jepe niko péicha ojapo. Pene marangatúke peẽ, pende Ru yvágape oĩva imarangatu háicha.”

Ñandejára Jesucristo Ñe’ẽ