LECTURAS VIERNES SEMANA XII TO

LECTURAS VIERNES SEMANA XII TO

Ko’ágä ñahendúta Tupã Ñandejára ñe’ẽ mokõiha Reyes arandukápe oĩ háicha  25, 1-12

Ára 10pe, upe mes 10hápe, ha 9 áñoma oisãmbyhy haguépe Sedequías, mburuvicha guasu Nabucodonosor oho iñorairõhára kuéra reheve Jerusalén gotyo. Oguahẽvo, omongora pe táva. Oñemohenda henondépe, ha ijerekuévo katu omopu’ã yvy, ojapyhara ha ondyry haguã hese. Pe táva oñemongora áño 11 peve oñepyrũ haguépe oisãmbyhy Sedequías.

Ára 9hápe, mes irundyha jave, tuichave ñembyahýi upe távape ha avave ndoguerekói ho’u va’erã. Upérõ ombokua hikuái pe táva tápia. Ha umi Caldéo kuéra omongora ramo jepe ichupe kuéra, mburuvicha guasu iñorairõhára reheve, osẽ ha okañy upe pyhare. Osẽ hikuái pe okẽ oĩva mokõive tápia pa’ũ rupi, ha upe tape rupi ohasáva mburuvicha guasu yvotyty rupi. Upégui, oho hikuái ysyry Jordán ñu rape rupi. Caldéo kuéra katu omuña mburuvicha guasu Sedequíaspe ha ohupity ichupe Jericó ñúme. Iñorairõhára kuéra oheja ichupe ha isarambi opa rupi. Caldéo kuéra omyakãsã mburuvicha guasúpe ha ogueraha Babilonia ruvicha guasu rendápe, oĩva Riblápe, Hamat retãme. Upépe Nabucodonosor he’i mba’épa ojejapóta Sedequías rehe. Sedequías ra’y kuérape katu, ojajura kytĩ hesa renondetépe, ha ichupe ohesa’ouka, oipokua ha ogueraha Babilóniape.

Ára 10pe, mes 5 jave, áño 19 oñepyrũ haguépe oisãmbyhy Babilonia ruvicha guasu Nabucodonosor, Nebuzaradán, mburuvicha guasu rembijokuái ha mburuvicha guasúre oñangarekóva ruvicha, oguahẽ Jerusalénpe. Ha ohapy hikuái tupao, mburuvicha guasu róga ha opa óga táva pegua, tenondete umi poguasu kuéra róga, ha umi ñorairõhára omoirũva ichupe oity yvýre umi tápia omongoráva Jerusalén. Upéi Nebuzaradán ogueraha ipokuapy Babilóniape umi táva guápe, umi ohasa va’ekuépe Caldéo kuérape ha umi mba’e apópe ikatupyrýva rembyrépe. Mbovymi imboriahu vévante oheja oñangareko haguã parraltýre ha oñemitỹ haguã kokuépe.

Tupã Ñandejára Ñe’ẽ.

SALMO ÑEMBOHOVÁI    136, 1-6

R. Aníke che resarái ndehegui Jerusalén

Babilonia ysyry rembe’y rupi roguapýva

rojahe’o, Sión rehe ore mandu’ávo.

Sáuse rakãre ysyry rembe’y rupi opu’ãva,

romosãingómiva ore mbaraka. R.

Upépe umi iñapytĩmby ore reraha va’ekue

ojerure oréve ropurahéi haguã.

Umi ipy guýpe ore jopýva

ojerure oréve rombovy’a haguã ichupe kuéra, he’ívo: R.

“Pepurahéi oréve purahéi Sión rehegua.”

Mba’éicha piko aipo ropurahéita,

purahéi Tupã Ñandejárape guarãva tetã ambuépe?

Nde hegui che resaráirõ Jerusalén taijapa che po. R.

Che kũ to ja che apekũre

na che mandu’ái ramo nde rehe,

namoĩri ramo Jerusalén tenondete

opa umi mba’e che mbovy’ávagui. R.

ALELUIA Mt 8, 17

Aleluia.

Cristo ojapyhy ñande reko kangykue

ha ohupi ijapére ñane mba’asy eta.

Aleluia.

EVANGELIO

Marandu pora Ñandejára Jesucristo rekove ha hemimbo’e San Mateo omombe’u háicha    8, 1-4

Upe ramo Jesús oguejy yvytymígui ha heta umi ohóva hapykuéri. Oñemboja hendápe peteĩ kuimba’e ijaipáva, ha oñesũ henondépe ha he’i ichupe: Che Jára, nde reipotárõ che mongueráne che mba’asýgui.

Jesús opoko hese ha he’i ichupe: Aipota. Ekuera!

Ha upepete, ojei ichugui  ikuru vai, ha okuera.

Ha Jesús he’i ichupe: Aníke emombe’u avavépe. Tereho uvei ejehechauka pa’ípe, ha eikuave’ẽ Tupä Ñandejárape umi mba’e Moisés he’i va’ekue oñekuave’ẽ va’erãha, ojehecha haguã rekueramaha.

Ñandejára Jesucristo Ñe’ẽ.