LECTURAS MIÉRCOLES SEMANA XIII TO

LECTURAS MIÉRCOLES SEMANA XIII TO

Ko’ágä ñahendúta Tupã Ñandejára ñe’ẽAmós arandukápe oĩ háicha        5, 14-15. 21-24

Pehekáke iporãva ha ani ivaíva, upéicha ramo peikovéta, péicha mante iñañetéta upe pejéva, oĩha pene ndive, Tupã pende Jára ipu’akapáva. Pehejáke ivaíva, pehayhúke iporãva!

Peñeha’ã pende reko joja mbojovaképe.

Ikatu ko upe ramo Tupã Ñandejára ipu’akapáva oiporiahuvereko José ñemoñarépe. Che mbojeguaru ha ndacha’éi ete pende arete kuérare. Che monguerái etéma peñemboaty jave che momorã haguã!

Umi mymbahapy ha mba’e kuave’ỹ peikuave’ẽva chéve, ndaipota véima ko’ágä . Umi mymbajuka joajurã, peipe’a che renondégui. Anive pepurahéi chéve guarã, nahenduse véima pende arpapu. Che aipota hína upe hekojojáva ýicha to syry ha yvúicha to pave’ỹ!

Tupã Ñandejára Ñe’ẽ.

SALMO ÑEMBOHOVÁI      49, 7-13. 16b-17

R. Che niko Tupã nde Jára.

Israel che retã!

Ehendu ko ha’étava ndéve!

Che ahechaukáta ndéve mba’éichapa reime.

Che niko Tupã nde Jára. R.

Mba’eve ndarekói ha’e va’erã mymbahapy pejapóva chéve.

Umíva niko opa árape che renondépe pemoguahẽ.

Ndajeruréi peẽme pene rymba tóro,

térã kavara mácho pende korágui. R.

Che mba’énte voi niko tymba ka’aguy,

ha tymba kuéra yvyty rupi oikóva.

Che mba’e niko guyrakuéra, ha tymbakuéra ñu rupi oikóva. R.

Che ñembyahýi ramo, piko amombe’úta peẽme?

Che mba’e niko ko yvy ha opa mba’e ipype oĩva.

Che aikuaa uma guyra ka’aguýpe oïva

ha areko che resa renondépe mymba kuéra ñumegua. R.

Iñañávape Tupã he’i: “Mba’éicha rupi piko

che rembiapoukapy nde jurúgui ahendu?

Roheko mbo’e ramo niko mba’eve ndereikuaaséi,

ha che ñe’ẽre nderejepy’apýi. R.

ALELUIA Sant 1, 18

Aleluia.

Ñande Ru niko ñande apose

iñe’ë añetegua rehe ae,

jaiko haguä mba’e porä ita tenonderä itéva hembiapokue.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha   8, 28-34

Upe ramo Jesús oguahẽvo yvy hérava Gadárape, oĩva yguasu mboypýri, mokõi kuimba’e osẽ umi tyvy pa’ũgui ha ohuguãitĩ ichupe. Umi mokõi oĩ mba’epochy poguýpe, ha ndaipóri upe rupi ohasáva ichugui  kuéra. Hatã osapukái hikuái ha he’i: Aníke rejapo ore rehe mba’eve, Tupã Ra’y. Reju piko ore mbohasa asývo ára paha oguahẽ mboyve?

Namombyrýi upégui oĩ heta kure okarúva hína, ha umi mba’epochy he’i Jesúspe: Ore mosẽta ramo, eheja oréve toroike umi kure retepýpe.

Ha Jesús he’i ichupekuéra: Tapeho.

Ha umi mba’epochy osẽ umi kuimba’égui ha oho oike umi kure retepýpe. Upepete, hetakue umi kure oho ojepoi ýpe, ha upépe omanomba.

Umi kure rerekua katu pya’e oho ha omombe’u opa mba’e itávape, ha mba’épa ojehu umi kuimba’épe, mba’epochy poguýpe oiko va’ekuépe. Ha tavagua maymáva osë oho Jesús rendápe. Ha oguahẽvo ha’e oĩháme, ojerure asy hikuái ichupe oho haguã upégui.

Ñandejára Jesucristo Ñe’ẽ