LECTURAS DOMINGO SEMANA XXV TO

LECTURAS DOMINGO SEMANA XXV TO

LECTURA PETEÏHA:
Ko’ágã ñahendúta Tupã Ñandejára ñe’ẽ Isaías arandukápe oĩ háicha 55, 6-9

Peheka Ñandejárape ikatu aja pejuhu ichupe, pehenói ichupe hi’aguĩ jave. Iñañáva toheja hápe vai, mba’e vai apoha anive oguereko iñakãme ivaíva.

Pejere Ñandejára gotyo, ha’e pende poriahuverekóta, pejere Ñandejára gotyo, ha’e niko
ipojera oheja rei haguã ñandéve ñane angaipa.

Che remiandu ndaha’éi pene remiandúicha ha pende rape ndaha’éi che rapéicha, he’i
Ñandejára.

Yvága oĩ háicha yvate yvýgui, péicha che rape ijyvateve pende rapégui ha che remiandu pene remiandúgui.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 144, 2-3. 8-9. 17-18
Opavave: Ñandejára oñemoaguĩ umi oñembo’éva rehe.

Ára ko’ẽ rehe romomba’e guasúta, ha nde réra amomba’éne opa ára. Ñandejára niko tuicha hína, ituichakue ndaikatúi jaikuaapa. Ichupe ñamomba’e guasu va’erã. O.

Ñandejára imba’e porã ha ñande poriahuvereko.
Ha’e oporohayhu ha hasýpe ipochy, opavavépe ha’e ohecha kuaa,
ha ohecha ramo opa hembiapokue. O.

Ñandejára heko joja opa hapépe, ha’e ipy’a porã opa mba’épe.
Ha’e oñemoaguĩ umi oñembo’éva rehe, umi ipy’a ite guive ichupe oñembo’évape. O.

LECTURA MOKÖIHA:

Ñahendúta Tupã Ñandejára Ñe’ẽ San Pablo ohai va’ekue Filipos guápe 1, 20b-26
Aikuaa porã iterei Ñandejára nda che reja vai mo’ãiha, jepiguáicha uvei ohechaukataha che rupi opavave rovake Cristo tuichaha, taha’e aikove ramo, taha’e amano ramo.

Chéve guarã niko che rekove hína Cristo, ha amano ramo katu aime porãvéta. Opáichavo, iporãvétarõ aikove Ñandejára rembiapópe guarã, ndaikuaái mba’épa aiporavóta, hasy aiporavo haguã.

Amanose aiko haguã Cristo ndive, upéva niko iporãvéta chéve guarã. Pende rehehápe katu iporãve aikove ramo. Upéva rehe aikuaa apytavetaha pene ndive poipytyvõve haguã, pekakuaave ha pevy’ave haguã pende jeroviápe.

Upéicha pe che rereko jevýta pene ndive, ha che rupi pevy’avéta Cristo mba’égui peë.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cf. Hech 16, 14b
Aleluia.
Ñandejára omokyre’ỹ ichupe
ojapysaka porã haguã upe Pablo he’íva rehe.
Aleluia.

EVANGELIO
Marandu porã Ñandejára Hesukrísto rehegua San Mateo omombe’u háicha 19, 30–20,16
Opavave: Romomba’e guasu ndéve, Ñandejára

Upérõ Jesús he’i idisípulokuérape: Heta umi ko’ág̃a itapykuéva, tenondete oguapýta. Ha umi ko’ág̃a itenondéva, itapykuéta. Pe Ñandejára Réino niko ojogua ku kokue járape osẽva pyharevete ohekávo omba’apo va’erãva chupe.

Oñemoĩ rire hikuái peteĩ ñe’ẽme mboýrepa omba’apóta hikuái chupe, omondo chupekuéra ikokuépe. Asajeve katu osẽ jey hógagui, ha ojuhu jey omba’aposéva. He’i chupekuéra, “Tapeho pemba’apo che kokuépe, ha hekópe apagáta peẽme”. Ha oho hikuái. Pe asajepytévo katu, pe óga jára osẽ jey voi, ha ka’aru asajévo péichante avei ojapo. Ha omondo ikokuépe opa umi omba’aposéva.

Upéi ka’aruete katu, osẽ jey voi ha ojuhu oĩ reíva hína. He’i chupekuéra “Mba’éreiko peñembo’y joa hína ko’ápe pemba’apo rangue mba’e.”

He’i chupe hikuái, “Ha ndorojuhúi niko avave ore momba’aposéva.” Osẽ he’i pe karai chupekuéra, “Tapeho pemba’apo che yvýpe.” Ka’aru pytũvoma pe kokue jára he’i ikapatápe, “Ehenói opavavépe ha epaga chupekuéra hembiapóre. Eñepyrũta epaga umi tapykue oho vaekuépe, ha ipahávo katu umi tenonde oho vaekuépe.”

Ha oñemboja umi ka’aruete oike va’ekue, ha ojepaga chupekuéra ku pyharevete oñepyrũrõ guaréicha hikuái. Upéi katu, oñemboja umi pyhareve oike va’ekue, ha oimo’ã ojepagavetaha chupekuéra. Ha peteĩchante ojepagapa opavavépe.

Ha ojepagávo chupekuéra, oñepyrũ ipochy pe óga jára ndive. He’i chupe, “Umi ka’aru oho va’ekue niko sapy’amínte omba’apo ha repaga chupekuéra oréveicha. Ore katu, kuarahy resẽ guive kuarahy reike peve ore ry’ái pe kuarahy akúpe.”

Pe óga jára katu osẽ he’i chupekuéra, “Che irũ, mba’e ivaíva piko ajapo nde rehe. Ndajapytái nga’u piko ra’e mboýpa apagáta kuri ndéve. Oñeme’ẽma niko ndéve nerembiapo repykue. Terehóntema nde rógape. Che ame’ẽsérõ umi tapykue oike va’ekuépe ndéve ame’ẽháicha piko mba’e ndéve. Che niko ajaposéva ajapo kuaa che plátagui. Ha piko nde pochýta che ndive, che mba’e porã haguére.”

Upéi osẽ he’i Jesús, “Ha péicha, umi ko’ág̃a itenondéva itapykuéta, ha umi itapykuéva itenondéta.”

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucristo.