Ñahendu Jesús Ñe’ẽ. Miércoles Semana 13a TO

Escucha el evangelio y la reflexión en: https://youtu.be/L33q7kzfHJU

Miércoles Semana 13^a TO                                  

                Mateo 8, 28 – 34.

Jesús og̃uahẽ Gadárape, opytáva Lágo Galiléa mboypýri. Upépe, mokõi kuimba’e osẽ sementériogui ohug̃uaitĩvo chupe. Demóño niko oñembojára hesekuéra ra’e. Ha ipochy jave hikuái, ndaipóri ikatúva ohasa ha’ekuéra oĩha rupi. Hatã osapukái mokõivéva ha he’i: — Maerãiko reju oréve, nde Ñandejára Ra’y. Rejúiko orembohasa asývo, ore ára g̃uahẽ mboyve.

Ha namombyrýi upégui oĩ heta kure okarúva hína ñúme. Ha umi demóño he’i Jesúspe: — Oremosẽtarõ, na eheja oréve toroike umi kurépe.

Ha Jesús he’i chupekuéra: — Tapeho.

Ha umi demóño osẽvo umi kuimba’égui, oho oike umi kurépe. Upépe umi kure, hetakue oho ojepoi ýpe ha ojahogapa.

Umi kure rerekua katu pya’e ohopa hógape ha omombe’u mba’épa ojehu umi mokõi kuimba’épe. Ha opavave upe rupigua osẽ oho Jesús rendápe. Og̃uahẽvo hendápe katu ojerure Jesúspe osẽ hag̃ua oho upégui.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Pe hembiapo porãva niko noikotevẽi okañy avavégui. Pe Aña omoingéramo huguái ñande rekovépe ha ñanemosãramo tembiapo vaípe katu oikose kañymby, ndoipotái ñamombe’u avavépe térã jaikuaauka hembiapokue. Ñanembojapu.

            Jahecha Jesús ohuguaitĩ mokõi tapicha oikóva Aña poguýpe. Ha ñahendu mba’éichapa pe Aña ojaitypo jepéramo ñande rapicha rekovépe, opa ipochy ha oja’óma Ñandejárape, irari chugui ha ndoikuaaséi mba’eve. Ohosénte oike kurekuéra apytépe ha oñemona tujúre osẽ rangue heko vaígui Jesús omopotĩ haguã chupe kuéra.

            Aña ojaitypo jepéramo ñande rekovépe nosẽsevéima ikuáragui. Jesús katu ndokyhyjéi chugui, ha ndojeguarúi avei umi heko ky’ávagui. Oho hendápekuéra jahechápa noipytyvõi oipe’ávo chuguikuéra isã. Amo ipahápe katu jahecha ou umi uperupigua he’i Jesúpe osẽ haguã oho upégui. Ñandejára jepe ndaipuakái onohẽ haguã heko vaígui umi nosẽséivape. Oñemohatã jepéva japu, monda ha tie’ỹme, oikóva kañy kañy hápe, opa oja’óva Tupãme ha nohenduséiva iñe’ẽ. Osẽ rangue, oñapymive uveiohóvo tujúpe, ohundi hekove ha upekúevo ombotyryry hetápeijerére oĩva.

            Sapy’ante, che irũ ha che reindy, ikatu ñande avei ja’a karuguápe. Anínte upe jave ñande resarái Jesús outahakatuete ñane ruguaitĩ ñane renohẽ haguã pe tuju ñapa’ã hágui, ñande jahejáma guive ichupe ñande salva. Ombohasataha ñandéve ipo, ñanemopu’ã, ñanemopotĩ ha ñanemboguata haguã hendive hesakã háme.

Pa’i Alberto Luna.