LECTURAS VIERNES SEMANA XIX TO

LECTURAS VIERNES SEMANA XIX TO

Ko’ágã ñahendúta Tupã Ñandejára ñe’ẽ Ezequiel arandukápe oĩ háicha   16, 1- 15. 60. 63

Tupã Ñandejára he’i chéve: “Nde, kuimba’e, ehechauka Jerusalén guápe umi mba’e vai eta ojapo va’ekue. Nde eréta: ‘Kóicha he’i Tupã Ñandejára: Nde ypykue ha reju ypy haguére, nde Canaangua: nde ru Amorréo, nde sy katu hitíta. Reju ypy ramo guare yvy ári, noñekytĩri ne puru’ã, nereñembojahúi ne potĩ haguã, nderejekytýi jukýpe ha nereñeñuãi mitã rupápe. Avave na nde poriahuverekói ojapo haguã ndéve umi mba’e, reñemombo uvei ñu reíre, reporo mbojeguarúgui.

Che ahasa nde ypy rupi ha ahechávo repyvoi ha rejapajeréi reína nde ruguýpe, ha’e ndéve: Eikove ha ekakuaa yvyra ra’y ñúme guáicha. Reñepyrũ rekakuaa ha oiko nde hegui kuñataĩ, nde pyti’a opu’ã ha ipuku nde áva, reime ramo jepe opivo ite. Ahasa nde ypy rupi ha rohecha.

Reiméma reporohayhu haguãicha; aipyso nde ári che ahoja, añuã nde rete opívo ha che añe’ẽ me’ẽ ndéve. Añemoĩ peteĩ ñe’ẽme ne ndive, ha upe guive nde che mba’e. Che, opa mba’e Jára ha’e upéicha.

Che rombojahu, romopotĩ pe tuguy nde rehe oĩmbávagui ha romohyakuãmba. Amoĩ nde rehe peteĩ typói ojeguapáva, sapatu vakapi porãgui, ame’ẽ ndéve nde ku’akuaharã líno ha romyakãho’ĩ ahoja sédape.

Rombojegua mba’e verápe ha amoĩ nde jyváre jeguaka ha nde ajúri mbo’y; amoĩ ne tĩ rehe mba’e vera apu’a, ne nambi rehe namichãi ha peteĩ mba’e ne akã rehe guarã overapáva. Rejeguapa repytávo óro ha plátagui, reñemonde líno pererĩ asy, séda ha ao ojeguapávape.

Re’úmi tembi’u iporãvéva, arína, eíra ha ñandyry. Ne porã iterei repytávo, mburuvicha guasu rajýrõ guáicha. Opa tetã rupi ne rerakuã, ne porãngue ndahasahái romomimbipa rupi jeguakápe. Che, opa mba’e Jára ha’e upéicha.

Nde katu, rejerovia etereígui ne porãnguére, reiporu pe ne rerakuã ha oiko nde hegui kuña vai, ha reme’ẽ nde rete opa ohasávape.

Che mandu’áta che ñe’ẽ me’ẽ ajapo va’ekue  nendive ne mitã ramo guare ha añe’ẽ me’ẽ jevýta  opa árape guarãma.

Ne mandu’a ha retĩ haguã ha nde py’a tarovágui ndereipe’ái haguã nde juru aheja reívo ndéve ne angaipa.” Che, opa mba’e Jára, ha’e upéicha.

Tupã Ñandejára Ñe’ẽ.

O bien a elección:

Ko’ágä   ñahendúta Tupã Ñandejára ñe’ẽ Ezequiel arandukápe oĩ háicha      16, 59-63

Tupä Ñandejára he’i: Ame’ẽta ndéve pe nde reko ky’a ojeruréva, resẽva’ekue  ñe’ẽ me’ẽgui ha remondoro ñane ñe’ẽ me’ẽ. Che mandu’áta che ñe’ẽ me’ẽ ajapo va’ekue  ne ndive ne mitã ramo guare ha añe’ẽ me’ẽ jevýta  opa árape guarãma. Nde ne mandu’áta nde reko vai kuéra ha retĩta, ame’ẽvo ndéve nde ryke ha nde kypy’y kuéra ne memby ramo, oike’ỹre ha’e kuéra ne ñe’ẽ me’ẽme. Che ambopyahúta ñane ñe’ẽ ñome’ẽ, ha nde reikuaáta cheha nde Jára, ne mandu’a ha retĩ haguã ha nde py’a tarovágui ndereipe’ái haguã nde juru aheja reívo ndéve ne angaipa.” Che, opa mba’e Jára, ha’e upéicha.

SALMO ÑEMBOHOVÁI     Is 12, 2-4abcd. 5-6

Opavave: Tupã Ñandejára, jejopy vaígui che pe’áva.

Ha’e hína Tupã Ñandejára, jejopy vaígui che pe’áva,

hese ajerovia ha ndakyhyjéi.

Che Jára che mo’ã ha che mombarete, opa mba’e vaígui che pe’a. O.

Y penohẽta vy’a pópe, ha ivaívagui ñesẽ ykuágui pey’úta.

Pemboaguyje  Tupä Ñandejárape, héra pehenói,

peikuaauka tetã nguérape imba’e mombe’upyrã, perosapukái héra jojaha’ỹ. O.

Pepurahéi Tupä Ñandejárape, ojapo haguére

mba’e ndaijojaháiva, ha opa rupi ete pemoerakuã.

Pesapukái vy’águi Siongua: Tuichaitégui pende apytépe Israelgua Imarangatúva!” O.

ALELUIA Cf. 1Tes 2, 13

Aleluia.

Pe japyhy Tupä Ñandejára Ñe’ë, ani yvypóra ñe’ëicha,

pejapyhy uvei pe añete háicha, Tupä Ñandejára ñe’ëicha.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 19, 3-12

Upe ramo Fariséo kuéra oñemboja Jesús rendápe omoñuhã haguã ichupe. Oporandu ichupe hikuái: Ikatúpa peteĩ ména opoi hembirekógui oimeraẽ mba’ére?

Jesús he’i ichupe kuéra: Ndapeikuaái nga’u piko Tupä Ñandejára Kuatia Ñe’ẽme he’iha, Tupã Ñandejára ojapo ramo guare yvypórape iñepyrũmbýpe, ojapo hague kuimba’e ha kuña?

He’ive avei: “Upévare pe kuimba’e oheja va’erã itúva ha isýpe, ojoaju haguã hembireko ndive, ha oiko mokõivégui peteĩ.” Péicharõ, upe guive ha’ekuéra ndaha’e véima mokõi yvypóra, peteĩntema. Upévare, yvypóra ndoipe’ái va’erã ojuehegui umi Tupã Ñandejára ombojoaju va’ekue .

Upépe umi fariséo he’i ichupe: Mba’ére piko aipo ramo Moisés rembiapoukapýpe he’i kuimba’e ome’ẽ va’erãha hembirekópe kuatia jueja rehegua, ha upéi opoi ichugui ?

Jesús he’i ichupekuéra: Pende py’a hatãguinte Moisés oheja va’ekue  peẽme pepoi pene rembirekógui. Iñepyrũmbýpe ndaupéichai va’ekue. Che katu ha’e peẽme, “Oimeraẽva opoírõ hembirekógui, ha ndaha’éi ramo ñemoakã ratĩ haguére, pe kuimba’e omenda jevýrõ, oporomoakã ratĩ hína. Ha pe omendáva pe kuña ojepoívare, oporomoakã ratĩnte avei hína.”

Upévo hemimbo’ekuéra he’i ichupe: Péicha oikótarõ peteĩ kuimba’e hembireko ndive niko, iporãve nomendái.

Jesús he’i ichupekuéra: Nda opavavéipe niko oñeme’ẽ ohecha kuaa haguã ko ha’éva peẽme. Umi Tupã Ñandejára ome’ẽvape, ha’ekuéra mante ohecha kuaa. Heta mba’ére niko peteĩ kuimba’e ikatu nomendái.

Oĩ umi ou ypy guive ko yvy ári, ikatu’ỹva voínte oiko kuña ndive ha upévare nomendái. Oĩ avei umi ikatu’ỹva omenda oñeha’ỹi’o haguére, ha oĩ katu omenda’ỹva ñesãmbyhy yvágui oúva rehehápe. Upe oñeme’ëvape ko’ã mba’e ohecha kuaa haguã, to hecha kuaa.

Ñandejára Jesucristo Ñe’ẽ