LECTURAS SÁBADO SEMANA 22º DURANTE EL AÑO

LECTURAS SÁBADO SEMANA 22º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Corintos guápe   4, 6b-16

Che pehẽnguekuéra:

Chéve ramo guarã, ore apóstolpe Tupã Ñandejára ore moĩ ipaha itépe, roiméva ramo guáicha romano haguäma. Oiko ore hegui mba’e hechapyrãva ko yvýpe guarã, umi Tupã Ñandejára remimboúpe guarã ha yvypórape guarã. Ore, Cristo rehehápe, rohasa ivýrova ramo. Peẽ katu, Cristo rehe ae, pehasa iñarandúva ramo.

Ore, ore kangy, peẽ katu pene mbarete. Ore rehe ojejahéi, peẽ katu peñe momba’e. Ko’ágä  peve voi rohasa ñembyahýi, y’uhéi ha ore opívo. Rojehovapete, ha ndaore rógai, ha ore kane’õ romba’apóvo ore po ite rupi. Umi oñe’ẽ vaíva ore rehépe rombohovái jehovasápe. Roñemuña ha ndoro’éi mba’eve. Rojeja’o ha rombohovái py’a porãme. Rojerereko ko yvy arigua ytýicha, tembyréicha. Ha upéicha ko’ágä  peve. Ndarahaukái peẽme ko kuatia pomotĩvo, añemoñe’ẽ haguã peẽmente, che ra’y tee peguáicha.

Pohayhu niko. Pereko ramo jepe, Cristo reroviaha pende rekópe, heta iterei pene reko mbo’éva, napende ru hetái. Pende ru, che, amombe’u va’ekue  peẽme pe marandu porã ojapóva pende hegui Jesucristo rehegua.

Tupã Ñandejára Ñe’ẽ.

SALMO ÑEMBOHOVÁI  144, 17-21

R. Tupã Ñandejára heko joja opa hapépe.

Tupä Ñandejára heko joja opa hapépe, ha’e ipy’a porã opa mba’épe.

Ha’e oñemoaguĩ umi oñembo’évare,

umi ipy’a ite guive ichupe oñembo’évape. R.

Umi ichupe omomba’éva rembipota ha’e ojapo,

ojerure vove ichupe pytyvõ, oguenohẽ jejopy vaígui.

Tupä Ñandejára oñangareko umi ichupe ohayhúvare,

umi heko vaívape katu ha’e ohundi. R.

Amomba’e guasúta Tupä Ñandejárape.

Opa oikovéva to momba’e guasu

héra marangatu, ko’ágä  guive ára paha peve. R.

ALELUIA Jn 14, 6

Aleluia.

Ñandejára Jesucristo he’i:

“Che hína pe Tape, Añetegua, ha Tekove.

Avave ndohói che Ru rendápe ndaha’éi ramo che rehe ae”.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha 6, 1-5

Upe ramo Jesús ohasa ohóvo kokue rupi peteĩ pytu’uha árape. Hemimbo’e kuéra oipo’o hína trígo, ojykýi ipópe kuéra ha ho’u hikuái. Umi fariséo oporandu ichupe kuéra: Mba’ére piko peẽ pejapo pe ojejapo’ỹ va’erã pytu’uha árape?

Jesús he’i ichupekuéra: Ndapeikuaái nga’u piko Tupä  Ñandejára ñe’ẽme he’iha David ha iñirũ nguéra iñembyahýi ramo guare, oike hague Tupaópe ha’e ha iñirũ nguéra, ha ho’u umi mbuja Tupã Ñandejárape oñemboyke va’ekue. Ha’e térã iñirũ nguéra ndaikatúi va’ekue  ho’u umíva, pa’i kuérape guarã añónte va’ekue  umi mbuja.

Ha he’ive: Che, yvypóraicha aju va’ekue, areko che pópe ha’évo mba’e mba’épa ikatu ojejapo pytu’uha árape.

Ñandejára Jesucristo Ñe’ẽ