LECTURAS VIERNES VIGÉSIMO SEGUNDO SEMANA

LECTURAS VIERNES VIGÉSIMO SEGUNDO SEMANA

Ñahendúta Tupã Ñandejára Ñe’ẽ San Pablo ohai va’ekue Corintos guápe 4, 1-5

Che pehẽnguekuéra: Peẽ niko ore reko va’erã Cristo pytyvõhára ramo añónte, roiméva rombo’e haguã umi mba’e guasu ete Tupã Ñandejára reheguáva. Oime ramo oñeme’ẽ hague hembiaporã, ohechauka va’erã ikatuha ojejerovia hese.

Che ramo katu, nda che py’apýi peẽ térã oimeraẽva peche mbojovake ramo guarã. Che jepe nañembojovakéi. Upéicharõ jepe, ndajuhúi haguére nda che pereiha mba’evépe nde’iséi che potĩha. Pe che mbojovake va’erã niko Tupä Ñandejára.

Upéicha rupi, ani pembojovake mba’eve hi’ara’ỹme. Peha’arõ tou raẽ Tupã Ñandejára ha to moesakã pe ko’ágä iñypytüva. Ha’e toikuaauka ñande py’a rembipota. Upépe Tupã Ñandejára oguerohorýne peteĩ teĩme ojerure háicha hembiapokue.

Tupã Ñandejára Ñe’ẽ.

SALMO ÑEMBOHOVÁI 36, 3-6. 27-28a. 39-40

Opavave: Tupã Ñandejára oipytyvõ heko potĩvape

Tupã Ñandejára rehe ejerovia ha ko yvy ári reikóvo rehupitýne py’a guapy.
Ñandejára nde py’a to mbovy’a, ha’e ohupityukáne ndéve opa mba’e nde py’a ite guive reipotáva. O.

Tupã Ñandejára pópe emoĩ nde rekove, hese ejerovia, ha ha’e oñangarekóne nde rehe,
kuarahýicha ojajáine nde reko joja, araícha hesakãne nde reko potĩ. O.

Eheja ivaíva ha ejapo iporãva ha nde repyta mo’ãi yvy’ỹre.
Tupã Ñandejára ohechase teko joja,
ha ndoheja rei chéne umi hese ojeroviávape. O.

Tupã Ñandejára oipytyvõ heko potĩvape, hendápe ha’ekuéra oguahẽ kuaa ojejopy vai jave.
Tupã Ñandejára oipe’a ichupe kuéra upe jejopy vaígui, ha’ekuéra ojerovia haguére hese. O.

ALELUIA Jn 8, 12
Aleluia.
Ñandejára Jesucristo he’i: “Che hína pe ohesapéva yvy ape.
Pe che moirüva orekóta tesape Tekove rehegua”.
Aleluia.

EVANGELIO

Marandu porã ñahendúta Ñandejára Jesucristo rekove ha hemimbo’e San Lucas omombe’u háicha 5, 33-39

Upe ramo he’i hikuái Jesúspe: Umi Juan ha fariséo remimbo’ekuéra py’ĩinte ohasa ára ho’u’ỹre mba’eve ha oñembo’e mante. Ne remimbo’ekuéra katu okaru ha vino ho’úvonte oiko.

Jesús he’i ichupekuéra: Peẽ nga’u piko napemongaru mo’ãi umi oĩva mendahápe, pe menarã oĩ aja hendivekuéra? Ágãnte oguahẽne ára ipore’ỹvo ha’e, ha upépe katu ohasáne ára ho’u’ỹre mba’eve.

Omoĩ avei henondépekuéra ko ñe’ẽ mbojoja: Avave nomondorói peteĩ ao pyahu omoatyrõ haguã peteĩ itujáva. Upéicha ojapóva ohundi pe ao pyahu. Ha upéi ave, pe ao pyahu pehẽngue ndopyta porã mo’ãi pe itujávare. Vino pyahu niko noñembohyrúi vino ryru tujápe.

Péicha ojejapórõ umi vino ryru osoróne ha oñehundíta pe vino ha umi hyru. Vino pyahu oñemoĩ va’erã hyru ipyahúvape. Ha umi ho’úva vino tuja ndo’use véima vino pyahu, ha he’i: “vino tuja heve”.

Ñandejára Jesucristo Ñe’ẽ