MIÉRCOLES SEMANA 34º DURANTE EL AÑO

MIÉRCOLES SEMANA 34º DURANTE EL AÑO

Ñahendúta Tupã Ñandejára Ñe’ẽ Apocalipsis arandukápe oĩ háicha   15, 1- 4   

Che, Juan ahecha pe árare ambue mba’e rechaukaha tuicháva ha ñane mopirïva: 7 Tupã Ñandejára remimbou, 7 sarambi vai guasu ouvétava reheve, umíva ndive oguahẽ hu’ãme Tupã Ñandejára pochy.

Ahecha avei peteĩ yguasu ojoguáva kristal ojehe’áva tatáre; ha ijypýpe oñembo’y, árpa ome’ẽ va’ekue  ichupe Tupã Ñandejára reheve umi ipu’aka va’ekue  ku tymba vai guasu ha ha’ãngáre, ha pe héra jepapahávare. Ha opurahéi hikuái ku Moisés Tupã Ñandejára remimbiguái purahéi, ha pe Ovecha Ra’y purahéi. Ha he’i:

“Tuicha ha hechapyrã opa rejapo va’ekue, ore Jára, Tupã ipu’akapáva; naikarẽi ha añetegua meme nde rapekuéra, nde, opa tetã ruvicha guasu!

Máva piko ndokyhyjéi chéne nde hegui, ore Jára?

Avápa na nde rerohorýi chéne? Nde año ite ne marangatu;

opa tetã oúta nde rerohorývo, rembojekuaa rupi ne rembipota.”

Tupã Ñandejára Ñe’ẽ.

SALMO ÑEMBOHOVÁI    97, 1-3b. 7-9

Opavav: Pepurahéi Tupã Ñandejárape purahéi pyahu.

Pepurahéi Tupã Ñandejárape purahéi pyahu,

mba’e hechapyrãva ojapógui ha’e.

Ipyapy mbarete ha imarangatúgui ipu’aka opa mba’ére. O.

Tupã Ñandejára ohechauka ipokatu,

tetã nguérape ohechauka heko ojaha.

Imandu’a imborayhu ha heko jeroviaháre tetã Israel ndive guarã. O.

Yvy jerekuévo ojehecha Tupã ipu’akaha opa mba’ére.

Yguasu ha ipype oĩva tahyapupa, yvy ha opa ijapére oikóva.

ha yvytykuéra tosapukái joa vy’águi. O.

Tojepurahéi Tupä Ñandejára renondépe

oúgui ko yvy oisãmbyhy haguã.

Ha’e oisãmbyhýta yvy tekojojápe ha tetãnguéra teko marangatúpe. R.

ALELUIA Apoc 2, 10c

Aleluia.

Ejeroviáke emano meve ha ame’ẽta ndéve ne

akä rehe guarä hekovéva.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha     21, 10-19

Upe ramo Jesús he’i hemimbo’e kuérape: “Pema’ẽ porãke. Aníke peheja avave pene mbotavy. Cháke oĩta heta oúva che rérape. He’íta hikuái: ‘Che ha’e upe Cristo’, ha ‘Oguahẽma ára’. Ha peẽke ani peho hapykuéri kuéra. Pehendúta oikoha ñorairõ guasu opa rupi.

Anínte peñe mondýi. Umíva umi mba’e niko ojehu raẽ va’erã voínte, jepe upéva nde’iséi oguahẽmaha pe ára paha opa ko’ã mba’e mboyve, peẽ peñe moakãsãta ha peñe muñáta. Pejereraháta umi judíokuéra tupaópe peñembojovake haguã. Pejereraháta yvyrakuápe ha pene moĩne umi mburuvicha guasu ha sãmbyhyhárakuéra renondépe, peiko haguére che ndive.

Upéicharõ ijáta peẽme peñe’ẽ che rehe ichupekuéra. Aníke peje py’apy peje va’erãre. Che ame’ẽta hína peẽme ñe’ẽ arandu meméva, avave umi pende rehe ija’e’ỹva ikatu’ỹtava ombohovái. Ha oiméta pene ra’ãva pende kupéguio, pende ru jepe, pende ryvy ha pende ryke’y kuéra, pende rogagua ha pene irũnguéra.

Oiméta pende apytépe ojejukáva, ha che remimbo’e haguére peẽ, avave ndaija’e mo’ãi pende rehe. Ha peteĩ pene akã rague jepe ndo’a mo’ãi pende hegui. Pejepytasóke, pehupity haguã jeikove opa’ỹva.

Ñandejára Jesucristo Ñe’ẽ.