LECTURAS JUEVES SEMANA 23º DURANTE EL AÑO

LECTURAS JUEVES SEMANA 23º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Corintos guápe                8, 1. 4b-13

Che pehẽnguekuéra:

Ko’ágä  ahasáta ambohovái peẽme umi peporandu va’ekue  chéve tembi’u oñekuave’ẽva ta’ãngarei kuérape rehegua. Añetéko hína pe oje’éva: “Opavave jaikuaa pe añetegua”, ha pe jaikuaáva katu ñane mbojererovu. Ha pe mborayhu oñepehengue ramo guáicha, omombarete ñande reko. Oimérõ oimo’ãva oikuaaha, ndoikuaái gueteri ojekuaa va’erã háicha. Oimérõ ohayhúva Tupãme, Tupã Ñandejára oikuaa ichupe.

Aipórõ: ikatúpa oje’u umi tembi’u oñekuave’ẽva ta’ãngareikuérape? Jaikuaa porã umi ta’ãnga rei ndaha’eiha mba’eve ko yvy ári, ha peteĩ Tupã Ñandejárante oĩha.

Ha oimérõ jepe yvágape ha yvy ári umi oñembohérava tupã (ha upéva ja’étarõ, heta tupã ha mba’e jára oĩ), ñandéve guarã peteĩ Tupãnte oĩ, ñande Ru, opa mba’e apohare, ha ñande jaikove ichupe guarã. Ha avei peteĩ Ñandejárante, Jesucristo, hese ae opa mba’e oikóva, ñande jepe hese ae jaiko.

Nda opavavéi niko oikuaa pe añetegua. Umi ojepokuaa va’ekue  omomba’e guasu ta’ãnga reikuéra, ha ho’u umi tembi’u, ha oimo’ãva oñekuave’ẽ hague tupã nguérape, ikangýgui pe imba’e kuaaha, oñeñandu umi ta’ãnga rei omongy’apaha ichupekuéra. Ha upéicha nde, pe ne mba’e kuaáre, remyaña ho’a haguã pe ne pehẽngue  ikangýva, Jesucristo omano hague avei.

Napemomba’éivo pe pene pehẽngue  ikangývape, Crístope voi avei napemomba’éi hína. Upévare, che rembi’u rupi, amyaña ramo che pehenguépe hembiapo vai haguã, araka’eve nda’u mo’ãi so’o, ani haguã amoĩ ichupe hembiapo vai haguãicha.

Tupã Ñandejára Ñe’ẽ.

SALMO ÑEMBOHOVÁI    138, 1-3. 13-14b. 23-24

Opavave: Tupã Ñandejára che sambyhy kena nde rape rehe.

Ore Jára, nde reipyguara che reko ha nde che kuaa.

Nde reikuaa aguapy ha apu’ã ramo,

mombyry guive reikuaa upe che akãme arekóva.

Reikuaa aguata térã aguapy ramo, opa ajapóva reikuaa. O.

Opa che retepy ne rembiapokue, ha che sy rye pýpe

che apo ñepyrũ va’ekue.

Che mopirĩmba ha che mbojurujái upe che rehe rejapóva. O.

Tupã Ñandejára, eipyguara che py’apy,

eikuaa mba’épa oĩ che apytu’ũnguápe,

ehecha ahápa hína ape vaíre, ha che mboguata uvei nde rape opa’ỹva rupi. O.

ALELUIA 1Jn 4,12

Aleluia.

Jajoayhu ramo ojoapytépe Jesucristo he’i: Tupã Ñandejára oĩ ñane ndive ha Tupã Ñandejára mborayhu oikopa ite ñende rehe.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha  6, 27-36

Upe ramo Jesús he’i hemimbo’ekuérape:

Peẽ pe che rendúvape katu ha’e: “Pehayhu umi pende rayhu’ỹvape, pejapo iporãva pende rehe ija’e’ỹvare. Pehovasa umi pende rehe oñe’ẽ vaívape, peñe mbo’e umi pende ja’óvare. Oĩ ramo nde rova petéva, eheja ta nde rova pete jovái. Ha oimérõ oipe’áva nde hegui nde ahoja, eheja to gueraha nde ao ave. Oimérõ omba’e jeruréva ndéve, eme’ẽ ichupe, ha oimérõ omba’e pe’áva nde hegui, anive rejerure ichupe. Pejapo pende rapicháre upe peẽ peipotáva ha’e kuéra ojapo pende rehe.

Peẽ pehayhúrõ umi pende rayhúvapente, mba’e piko pejapo tuicha iterei mba’éva? Umi mba’e vai apoha jepe niko péicha oiko. Ha pejapórõ iporãva umi pende rehe ojapóva iporãvarente, piko mba’e iporãva oĩ upévape?

Umi mba’e vai apoha jepe niko péicha ojapo. Ha peipurukárõ umi omoengovia jevýtava peẽmente, pejapo nga’u piko tuicha iterei mba’éva? Umi mba’e vai apoha avei oiporuka ojupe, oha’arõgui ojepurukátaha avei ichupe.

Pehayhu va’erã pende rayhu’ỹvape, ha pejapo iporãva ha peiporuka peha’arõ’ỹre mba’eve hekovia. Upéicharõ, tuicha mba’épe oñemoengoviáne peẽme, ha peẽ Tupã Yvatetegua ra’ýne, ipy’a porãva avei umi ohecha kuaáva ha heko añáva ndive. Peporo poriahuvereko va’erã, pende Ru pende poriahuvereko háicha.”

Ani pemoĩ vai pende rapichápe, ha Tupã Ñandejára na pene moï vai mo’ãi. Ani pejopy vai pende rapichápe ha Tupã Ñandejára na pende jopy vai mo’ãi. Peheja rei hembiapo vaikue pende rapichápe, ha Tupã Ñandejára oheja reíne peẽme. Peme’ẽ ambuépe, ha Tupã Ñandejára ome’ẽne peẽme. Ipojeráne pene ndive ha ome’ẽne peẽme pende vosa renyhẽ chovi. Peẽ pejapo háicha pende rapicháre, Tupã Ñandejára omoengovia jevýne peẽme.

Ñandejára Jesucristo Ñe’ẽ