Ñahendu Jesús Ñe’e. Tupãsy Dolóre ára

Escucha el evangelio y la reflexión en: https://youtu.be/7SLXPTnLtss

15 setiembre: Tupãsy Dolóre ára

Juan 19, 25 – 27

Jesús kurusu ypýpe oĩ hína isy María, itia María ku Cleofás rembireko, ha María Magdaléna ave. Jesús ohecha isýpe ha ijykére oĩha hína pe idisípulo ha’e ohayhúva. Ha he’i isýpe: — Péina upépe ne memby.

Upéi he’i idisípulope: — Péina upépe nde sy.

Upe guive, pe Jesús disípulo ogueraha Maríape hendive hógape.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta sy ohasa oke’ỹre imemby hasýva rupa akãme. Oime oñenóva yvýpe, Hospital pasillo rupi opytu’u vai vai. Oime oikóva oheka pohã, oñe’ẽ doctor, enfermerakuéra ndive, oñeha’ã ombovevúi imemby mba’asy. Oĩ sy kuéra ohóva ohecha imemby préso kárselpe, oñandu, omoirũ ha oraha provistami.

Oime avei ohóva ohendu imemby oiko asývape, oñemoñe’ẽva ipy’a tarováva térã ojepy’apy etereívape, oñeha’ã ohesape ha omopu’ã. Oime sykuéra ombotyryrýva ijapére imemby drogadicto, oka’úva, oikéva húnta vaípe. Oime umi sy kuéra oñembo’éva opaite ára imembykuérare ha hendive voi ohenóiva Ñandejára ñepytyvõ, osẽ haguã karuguágui, ohupyty haguã py’aguapy.

Jahecha Tupãsy María, mokõi iñirũ ndive -las 3 María- oñembo’ýva kurusu puku ykére, apóstol Juan ndive. Omoirũ Hesu jehasa asy. Ndaikatúiramo jepe omboguejy, oipohano, ombopiro’ymínte jepe, oime upépe ijykére oñandu chupe ha ohasa hendive ipohyikuete.

Péva tuichaiterei mba’e, pe ñaime ñande rapicha ohasa asýva ykére ha ñamoirũ chupe. Ha péva ohechávo Hesu tuicha oguapy hese ha omoheñói ipy’aiteguive mborayhu isy ha iñirũnguérape guarã.

Ha ipy’a renyhẽgui osẽ Hesu he’i isýpe umi iñirũnguéra opytaha hekovia imembyrã, ha upépe, apóstol Juan akãre, ñandeja paite ñande jajeroviáva Hesúre.

Oñeme’ẽ ñandéve María ñande syrã. Pe oje’éva Juánpe oje’e avei ñandéve: Péina upépe
nde sy. Ha upeguive Juan oraha haguéicha Tupãsýme hógape, iporã, che reindy ha nde
che irũ, ñamoguahẽ ñande avei ñande rógape ha jareko chupe ñande sýramo.

Upéicha jahasa asy ha jajejopy jave, ñande kurusu ipohýi eterei vove, jaikuaa nañaneñoiha, oĩha ñande ykére ñande sy. Ha pe tuichave mba’éva, Jesús ñanemoirũ jehasa asýpe, ohupi ñanendive ha ñanepytyvõ ñamboguata haguã ñande kurusu, jerovia ha py’aguapy reheve.

Pa’i Alberto Luna.