Ñahendu Hesu. Viernes Semana 24° TO

Escucha el evangelio y la reflexión en: https://youtu.be/cGMIId6QFJs

Viernes 24 TO

Lucas 8, 1 – 3

Upérõ Jesús oho opa rupi omyerakuã pe marandu porã Ñandejára Rréino rehegua.

Umi 12 apóstol omoirũ chupe, ha upéicha avei heta kuña. Umívagui oime ha’e omosẽ va’ekue demóño, ha oime omonguera vaekue mba’asýgui. Ijapytépe oĩ vaekue María, hérava avei Magdaléna. Chugui niko Jesús omosẽ vaekue 7 demóño. Oĩ avei Juana, Cuza rembireko, upéva Herodes rembiguái ijeroviahavéva, oĩ Susana ha heta ambue, oipytyvõva chupe mba’e repy oguerekóva reheve.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ajépa ningo jaháramo ñembo’e hápe, mísa hápe, ha ñama’ẽramo grupokuéra oguatáva komunidápe ha heta organización, barrio terã escuelaguápe, hetave jahecha jepi umícha hápe kuña kuimba’égui.

Tuichaiterei niko upe tembiapo kuñakuéra ojapóva ñande Iglesia katólicape. Ha upéicha he’i ñande obispo kuéra ijatýramo guare tupao guasu Aparecídape, amo Brasílpe: “Kuña nguera ha’e umi hetavéva ñande komunidakuérape, ha’e kuéra ha’e umi oheko mbo’e tenondéva imemby kuérape ijeroviápe ha umi oipytyvõva pa’i ha obíspo kuérape hembiapópe, upévare umi pa’i, diácono ha obíspokuéra oñangareko vaerã hese kuéra, omomba’e va’erã hembiapo ha orrespeta vaerã chupekuéra” (456).

Jahecha Hesúpe omoirũ hague apóstol kuéra, ha ijykére oĩ va’ekue avei kuñanguéra oguatáva, oipytyvõva ichupekuéra hembiapópe ha hemikotevẽpe. Tetã Israélpe yma umi mbo’ehára kuéra ndorekói va’ekue hemimbo’e apytépe kuñanguéra. Hesu katu ohechauka ñandéve orekoha avei idisípulo apytépe kuñanguéra, omoirũva ichupe ha ijapóstolkuérape:

María Magdalena, Susana, Juana, Martha ha María, María Santiago sy ha Hesu sy avei oguatáva imemby ndive.

Hesu nombotapykuéi kuñáme ojapo haguéicha umi mbo’ehára ymave guare.

Ha’e oñemoirũ hese kuéra ha oñangareko, oipohano, ohekombo’e ichupekuéra ojapo
háicha avei kuimba’e kuéra ndive. Ombojoja ijeroviápe kuimba’e ha kuña.

Amo ipahápe niko umi opyta vaekue Hesu ndive pe ikurusu máta peve ha’e va’ekue umi kuña nguéra omoirũ vaekue ichupe. Kuimba’e kuéra katu okañymba ha’ekuéra oñotỹ aja Hesu rete.

Ha Hesu oikove jevy rire tenonderã ojehechauka umi kuñanguérape. Ha kuña nguérape ojerure omombe’u haguã ijapóstolkuérape ha’e oikove jevy hague.

Tekotevẽ avei ñande kuimba’éva anive ñamboyke térã ñambotapykue kuñáme, jahechakuaave uvei ha ñame’ẽve ichupe kuéra upe henda tee, ñahenduve iñe’ẽ ha ñamomba’eve upe ojapóva. Ha kuña nguéra katu ani otĩ ohekávo oñembojojave haguã
kuimba’e ndive ogapýpe, organización kuérape, ñande Iglésiape. Ikatu haguãicha mokoĩvéva jaguata joja oñondive ha ñañopytyvõ hekópe Hesu ñanembo’e haguéicha.

Pa’i Jasy.