Ñahendu Hesu. Viernes Semana 25° TO

Escucha el evangelio y la reflexión en: https://youtu.be/LNrcqpt0xPU

Viernes 25 a TO

Lucas 9, 18 – 22

Peteĩ ára, oñembo’e jave hína Jesús ha’eño, idisípulo kuéra oñemboja hendápe. Jesús
osẽ oporandu chupe kuéra: — Mavaha che piko oje’e upe rupi.

He’i chupe hikuái: — Oĩ he’íva nde rehe, nde Juan Bautistaha. Oĩ katu he’íva ndeha
Elías, ha oĩ ave he’íva ndeha proféta yma guare, oikove jey va’ekue.

Jesús oporandu chupekuéra: — Ha peẽiko mba’e peje. Mávaiko che.

Pedro he’i chupe: — Nde niko hína pe Mesías, Ñandejára omboúva.

Jesús katu heta he’i idisípulokuérape ani hag̃ua omombe’u avavépe.

Jesús he’i avei idisípulokuérape: — Che niko heta ahasa asýta hína. Heta ojahéita che
rehe ñande ruvicha kuéra, pa’ikuéra, ha umi Moisés léi ombo’éva. Che juka vaerã ág̃a
hikuái. Mbohapy ára haguépe katu aikove jeýta.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Heta niko oĩ oñe’ẽva Hesúre ha omoherakuãva Hesu ñe’ẽ, omoñe’ẽva Biblia. Oĩ télepe
osẽva ikatólikova, oĩ evangélico, oĩ obíspo, pa’i, pastor. Oĩ radio ha canal katóliko,
radio ha canal evangélico.

Oĩ oguahẽva ñande róga rupi, ome’ẽva ñandéve kuatia, revista, ñane konvidáva jaha haguã ñañembo’e itupaópe, mísa hápe, cúltope. Oĩ oñemoñe’ẽva aty guasúpe. Opáicha ñahendu oñemoherakuã Hesu.

Umi apóstolkuéra omoirũva Hesúpe avei niko ohendu raka’e heta ñe’ẽ Hesúre oje’éva. Ha Hesu ohechakuaa hesekuéra okañyha ha nahesakãiha ichupekuéra mávapa añetehápe ha’e imbo’ehára kuéra. Ha oñemongeta hendivekuéra, oporandu tenonderã mba’épa oje’e upérupi, mba’épa ohendu hikuái oikóvo. Ha upéi katu oporandu porã mba’etépa oñandu, mba’eichaitépa ohecha hikuái.

Ñande avei jahechakuaa oĩha heta ñe’ẽ Hesu rérape ñahendúva. Ndaha’éi ñane ño ñanemandu’áva hese. Ñane hénte kuéra apytépe voi, ñane irũ nguéra ha ñane vesíno
sapy’ánte oime peteĩ tupao guáva, katóliko, oime evangélico. Oime katu ojahéiva tupao,
Ñandejára, pastor ha pa’i kuérare. Ñande jopara.

Opáichavo, ndaha’éi jajapysaka térã jalee haguére jaikuaa porãtama mávapa Hesu.
Tekotevẽ jaguata umi hese ojeroviáva ndive, ñande Iglésiape ha jahasa umi Hesu ohasa
hague rupi. He’i niko San Aguitin: “Peteĩ cristiano porãgui niko ñaha’ãro ojapo tembiapo porã ha, ombohováivo aña, toime avei ohasa asy haguãicha Ñandejára ha hapicha rayhupápe. Pe cristiano ikangýva katu hína pe ojaposéva umi mba’e iporãvante ha noiméi, térã ndaipu’akái, ohasa asy haguã Ñandejára ha hapicha rayhupápe.”

Mba’etekópa hína che irũ ha nde che reindy la nde py’a Hesu oporandúvo ndéve mávapa ha’e ndéve guarã. Reiménepa epyta haguãicha hendive umi Aña rymbakuéra nde rovapete vove.

Pa’i Jasy.