Ñahendu Hesu. Domingo Semana 30ª TO

Escucha el evangelio y la reflexión en: https://youtu.be/TGrWLzn6wos

Domingo 30ª TO Ciclo A

Mateo 22, 34 – 40

Umi Fariséo ohecha kuaávo Jesús ojuru mboty hague saducéo kuérape, oñembyaty hikuái ha oho Jesús rendápe. Peteĩva, Moisés ley oikuaa porãva, ombopakova pireséva Jesúspe oporandu chupe: — Mbo’ehára, Ñandejára mandamiéntokuéra apytégui piko máva hína pe tuichavéva.

Jesús he’i chupe: — Tenondegua he’i, “Ehayhu Tupã Ñandejárape nde py’aite guive, ne ánga rugua guive ha opaite ne arandukue reheve”. Kóva hína pe tenondetegua ha pe tuichavéva. Upéva rire oúva ojoguánte avei chupe, ha he’i kóicha, “Ehayhu nde rapichápe nde rejehayhu háicha”. Ko’ã mokõi mandamiénto ári oguapy hína opaite mba’e Ñandejára Ñe’ẽme oĩva.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

He’i niko lo mitã, umi karai arandu libro guasu ilétra sa’íva ipópe ñanembotavyha. Upépe heta mba’e ojehai ñande ndajaikuaapáiva py. Ha upéicha sapy’ánte pe arandu ha mba’ekuaa ojeporu oñembotavy haguã mboriahu ilápi mbykývape.

Ha péina katu jahecháma karai arandu, ilibro guasúva Ñandejára léipe ou oity haguã Hesúpe iñuhãme. Ou oiporu arandu ohundi haguã hapichápe. Hesu ndaha’éi va’ekue umi Ñandejára léi ombo’éva. Ha’e niko oikóva omba’apo ivállepe, oñembo’e ha ohendúva Ñandejára ñe’ẽ hapichakuéra apytépe, hógape ha itávapente oñemoarandúva.

Ha ombohovái umi oiporúva arandu opyrũ haguã hapicha akãre. Ohechauka ichupekuéra ndaha’éi ndostudiái haguére itavyha. Ha upéi ave natekotevẽi ñande libro guasu eterei, ñande py’a porã ha ñahendu kuaáramo Ñandejára ñanembo’éva ha oipotáva jajapo.

Hesu omyesakã porã mba’épa upe añetehápe tekotevẽva, mba’épa Ñandejára oha’arõ ñandehegui. Ha ndaha’ei niko heta mba’e. Mokõi líñonte tekotevẽ jaka’api ñande kokuépe. Tenonderã ite ñamomba’e Ñandejárape. Jahayhu ñande py’aite guive ha ñamoĩ ichupe tenondete ñande rekovépe. Ha pe líño mokôiha tekotevẽva jareko ñande resa renondépe ha’e hina ñande rapicha. Jajapo hesekuéra upe ñande jaipota háicha ojejapo ñande rehe.

Ko’ã mokõi líño eka’apíramo ára ko’ẽre, che irũ ha che reindy, ha ndarehejáiramo iñanandy ndehegui, ejapo ehóvo nde rape, ko yvy árima voi ndepojái haguãicha yvágare.

ÑAÑEMBO’E OÑONDIVE

Ñandejára Hesukrísto, nde niko emopeteĩ va’ekue Tupã rayhu tapicha rayhu reheve. Orembo’emína oréve avei, roñepomoĩ ha roñembo’e háicha Tupãme, toroipyso avei ore po, ha taorepojera roipytyvõ haguã ore rapicha oikotevẽvape, nde rejapo haguéicha. Amén.

Pa’i Jasy.