Ñahendu Hesu. Lunes 30º Durante el Año

Escucha el evangelio y la reflexión en: https://youtu.be/47gwmOAtRyk

Lunes 30º Durante el Año

Lucas 13, 10 – 17

Pytu’uha árape, Jesús ombo’e hína tupaópe. Oĩ hína ra’e upépe peteĩ kuña hasýva 18 áñoma. Peteĩ demóño omyakuruchĩmba ra’e chupe, ha ndaikatúi oñe’akãupi. Jesús ohechávo pe kuñáme, ohenói chupe ha he’i: — Rekueráma ne mba’asýgui, che áma.

Omoĩ ipo hese, ha upepete upe kuña oñakã rapu’ã ha oguerohory Ñandejárape. Pe tupao omyakãva katu ipochy Jesús ndive omonguera haguére upe kuñáme pytu’uha árape. Osẽ he’i umi upépe oĩvape: — Jareko niko 6 ára umi ñane rembiapo jajapo hag̃ua. Pekuerase ramo, peju umíva umi árape ha anive peju pytu’uha árape.

Jesús he’i chupe: — Ajépa pende rova mokõi. Ndapejorái nga’u piko pene rymba guéi térã pene rymba vúrro ha peraha pemboy’u pytu’uha árape. Ko kuñakarai niko Abraham ñemoñare hína. Ha piko pytu’uha ára haguérente ndaikatu mo’ãi amonguera chupe. Ha
18 áñoma niko Sataná oguereko hague chupe ipo guýpe.

Ohendúvo upéva, umi Jesús rehe ija’e’ỹva otĩ opytávo. Umi héntekuéra katu tuicha ovy’a ohechávo umi mba’e Jesús ojapóva.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Jaikuaa ningo che reindy ha che irũ jaháramo ofisína hárupi, térã katu hospitálpe, oĩ número ñerenohẽ, jaike va’erã fílape. Ha ikatu nañanderupytýi. Upéicharõ ñahendúne oje’e ñandéve: “Eju lúne”. Ha ñane tindy ñase jaju jey ñande rógape, upéi jaha haguã jey jahechápa ko’ẽramo térãpa ko’ẽ ambuéramo mba’e nañanderupytýi.

Jaikuaa niko avei sapy’ánte lo mitã omoingeha ijyképe isócio, ihénte, térã katu ikorreli, número’ỹre, kuatia ha fíla’ỹre. Ha oĩ avei ombohasáva pira pire mésa guýpe ha upéicha pya’e oñemohenda, ojeaseita ha syryrýpe okorre opa mba’e. Toĩke léi, fíla, óra,
documento, ndaikatúiva peguarã opaga. Ha sócio kuéra peguarã katu pya’e okorre.

Kóva ko kuña Hesu ojuhúva tupaópe ningo oñembotapykue, tenonderã hasýgui, upéi katu imboriahúgui, ha hi’arive katu ha’égui kuña. Ha kuñanguéra oñemboykéva voínte judíokuéra apytépe, oiko háicha avei sapy’a ñande apytépe. Hesu katu he’i pe kuña ha’eha avei Abraham rajy, upéva he’ise Ñandejára pueblo gua. Ha pe kuña remikotevẽ ha imba’asy ñepohãno oĩha judio kuéra jepytu’u léi ári.

Pe pa’i, judíokuéra tupao pegua katu, ombohasasénte chupe, oipota oho ha ou jey lúne. Ha Hesu he’i chupe hovápe upe kuña tuicha mba’eha, ha ndaikatúiha upéicha jareko avavépe, ko’yte kuña mboriahu ha oikotevẽvape.

Pa’i Jasy.