Ñahendu Hesu. Sábado Semana 25° TO

Escucha el evangelio y la reflexión en: https://youtu.be/p37aonTpAtY

Sábado 25^a TO             

                                                                   Lucas 9, 43b – 45.

Upérõ, opavave opondera joa jave hína umi mba’e Jesús ojapóvare, osẽ ha’e he’i idisípulo kuérape:

— Pejapysaka porãke ko ha’évare peẽme. Umi che rehe ija’e’ỹva niko che reitýta hína umi che rayhu’ỹva pópe.

Idisípulo kuéra katu ndoikuaái mba’épa upe Jesús he’iséva chupe kuéra. Noĩri gueteri niko hikuái oikuaa hag̃uáicha. Ha upéi ave, okyhyje hikuái oporandu hag̃ua Jesúspe mba’épa pe he’iséva.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Jarekose ñane hénte térã ñande rógagua ojeguerohorýva ha ojehayhúva. Pe túva ha sy niko ijuruvy rei ohendúramo oñeñe’ẽ porã ha oñemomba’e guasúramo imemby.

Ha oiméramo ñande róga térã ñande vállegua herakuã vaíva katu ñarokirirĩ ha ñatĩ oĩramo mandu’a hese. Ha’ete voi ku ñande rypýiva upe ojapo vaekue. Iporãramo hembiapo, ñandéma katu ñamombe’u jaikuaaha ichupe, ñane irũha ha mba’e. Ha ikuatia ky’áramo katu ndaipóri mandu’a, ani haguã oñemboja mba’e ñande rehe.

Ha péva ningo upe ojehúva umi Hesu apóstolkuérape. Opavave ningo ohecha ramo Hesu ojapóva, ha ovy’aiterei hikuái oñandúgui upe ñemomba’e guasu ha jeguerohory oikóva Hesúre ohupytyha ichupe kuéra avei. Hesu oñemomba’e ha ha’e kuérama katu oñembotuicha ha upévantema voi ichupe kuérarã.

Hesu katu ndokéi aguara pire ári ha ohecha mombyryve ichuguikuéra. Oikuaa ningo heta oĩha sapy’amínte oguerohorýva ichupe, ivevúi aja upe tapénte omoporãmba. Oipytyvõ, oipohano ha omongaru aja chupe kuéra ojepopetépa ichupe. Ha upéi oñepyrũvove ipuku ha ipohýi tape katu oĩtama opytáva ha oguevíva. Ha jahave ramo katu oĩtama ojetyvyro ha ipochýva, ombohovái ha ojahéiva hese.

            Upévare Hesu he’i porã iñirũnguérape mba’éichatapa hína. Ha omombe’u ichupe kuéra mba’épa ojehúta tapére. Opaichavo, he’i háicha San Lúka, nahesakãi chupe kuéra upe Hesu he’íva. Ndaipy’ái gueteri ha’e kuéra oikuaa haguãicha upe he’íseva, ha noporanduséi ave. Okyhyje hikuái upe jehasa asýgui. Oipotánte opavave oguerohory ha oñe’ẽ porã hese kuéra.

Ñande avei che irũ ha che reindy, jaipotáva oñeñe’ẽ porãnte ñande rehe ha japyta porãseva opavave ndive, tekotevẽ ñama’ẽ Hesúre. Ha’e tañanembo’e jaheka haguã pe Ñandejára rembipota. Oiméramo ojepopetéva ñandéve jaha hese, ani jake aguara pire ári. Ha oiméramo ipochýva, jahánte avei hese. Ani ñande pire pererĩ ha jaheja rei, Hesu ñanembo’e haguéicha.

Pa’i Jasy.