Ñahendu Jesús Ñe’ẽ. Jueves Semana 25° TO

Escucha el evangelio y la reflexión en: https://youtu.be/hfKntFvOvP0

Jueves 25 a TO

Lucas 9, 7 – 9

Upérõ Rréi Herodes ohendu opa umi mba’e ojehúva, ha ndoikuaái mba’épa ojapóta. Oĩ niko he’íva Juan Bautista oikove jey hague. Oĩ katu he’íva ouha proféta Elías, térã peteĩva umi proféta yma guare oikove jey hague.

Herodes he’i: — Chete va’ekue niko upe oñakã’ouka vaekue Juánpe. Mávaiko péicharõ
kóva. Maymávante niko imandu’a hese.

Ha Herodes oheka mba’éichapa oúne oikuaa Jesúspe.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Ko ñane retãme niko jahasa vaekue, nda areiete gueteri, 35 año rasa peteĩ mburuvicha poguýpe. Upe oñehenóiva “dictadura” niko heta jehasa asy ogueru va’ekue heta tapichápe. Peteĩ mburuvicha oñembojára, oñemomba’e ha orekopa opa mba’e ha opavavépe ipoguýpe. Ndohejái oiko mba’eve ndaha’éi ramo hese guáva umi ojapóva.

Oikuaapase upe oikóva ha ohape joko oiméramo ambue tapicha, grupo, térã partido omýi ombyaty hapicha kuérape. Oreko ipyrague ojaguáva hapicháre, omombe’úva ichupe mba’épa oiko. Ha upéicha umi ndoikéiva iguatápe térã opu’ãva hese ohopa préso, ojejuka, oĩ ndojekuaavéiva ichugui mba’eve, umi “desaparecidos” oñehenóiva.

‘
Oĩ avei heta oñeñembosaráiva hese, tortúra guýpe ohasa va’ekue omanomeve ha heta oĩ opyta vaipáva jehasa asy kuére…

Heróde niko upe mburuvicha omyaka va’ekue Galiléa Jesús oikóramo guare upérupi. Ha’e voi upe ojukauka va’ekue Juan Bautístape. Oñakã’ouka ichupe, he’i haguére ichupe hembiapo vaiha. Juan Bautísta ndokyhyjéi va’ekue he’i haguã mburuvichápe hembiapo vai ha upévare oho kárcelpe ha ojejuka.

Oĩ va’ekue tetã Israélpe umi proféta ojepokãva ko’ãichagua mburuvicha guýpe ha oñakãitýva henondépe. Ha oĩ va’ekue avei upe dictadura poguýpe ñane retãme ñande rapicha cristiáno ha katóliko omoirũ va’ekue pe mburuvicha tembiapo karẽ, térã oñembotavy vaekue umi hembiapo vai rovake.

San Lúka omombe’u ñandéve Hesu ñe’ẽ ha hembiapo herakuãha ha ojekuaaha opárupi ha Heróde ohendu hague upéva. Orekóne avei ha’e la ipyrague omombe’úva ichupe, ojaguáva Hesúre. Ha Heróde ohechase ha ohenduse ichupe. Ndaha’éi katuete oguata haguã hendive, iñe’ẽ rendu haguã ichupe.

Ohechase peteĩ milágro, oipota ohovasa ichupe hembiapokue. Ha’ete ku ojedivertise ha oiporuséva opa Ñandejárape.

Hesu katu oñemomombyrýnte ichugui. Ndoikéi ikuárape ha ndojepopetéi ete voi ichupe. Ñama’ẽmína che reindy ha nde che irũ, mba’éichapa ñande jaiko umi mburuvicha pokarẽ ndive, hembiapo vai ha ombohasa asýva ñande rapicha kuérape.

Pa’i Jasy.