LECTURAS DOMINGO SEMANA XXVII TO

LECTURAS DOMINGO SEMANA XXVII TO

LECTURA PETEÏHA:
Ko’ágã ñahendúta Tupã Ñandejára ñe’ẽ Isaías arandukápe oĩ háicha 5, 1-7

Apurahéita che irũ réra itépe, purahéi ojapóva iparralty peguarã. Che irũ tee oguereko iparralty
yvy porãme. Oyvyjo’o, omopotĩ itágui, oñotỹ umi parral iporãvéva. Mbytépe omopu’ã óga yvate, omoĩ pype parral ñamiha, oha’arõ hi’a porãne haguã, ha tovéke hi’a hai. Ha ko’ágã peẽ Jerusalengua, ha peë Judagua, pejemína chéve mávapa ojavy.

Mba’épa ajapo va’erã che parralty rehe ajapo’ỹ va’ekue. Che aha’arõ hi’a porãvo, mba’e rehepa hi’a hai. Ta mombe’u peëme, upe che parralty rehe ajapótava.

Aipe’áta imongoraha oñemopẽmba haguã, aitýta ikorapy jere oñepyrũmba haguã hese.
Ahejáta kokueréicha, noñehakã’o ha noñemopotĩ mo’ãi, ñuatĩ ha javoráigui henyhẽta, ha umi
araípe ha’éta, ani haguã hi’ári omongy.

Ñandejára ipu’akapáva parralty, upéva hína Israel retã, hemitỹngue poravo pyre hína umi Judá
pegua. Ichuguikuéra oha’arõ teko joja, ha teko aña upe oĩva; oha’arõ teko johéi pyre, ha sapukái rasy mante oĩ.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 80, 9. 12-16. 19-20

Opavave: Ñandejára resa’ÿi ningo ñande.

Egíptogui reraha va’ekue peteï parral, remosẽmba tetã nguéra ha hendaguépe reñotỹ.
Hakã oguahẽ yguasu ha Éufrates ysyry peve. O.

Ha Ñandejára! Mba’e rehe piko reitypa ikorapy jere ha opa ohasáva hi’a oipo’o.
Kure ka’aguy ou ojo’opa, tymba kuéra ñumegua okaru hese. O.

Ñandejára nde pu’akapáva, eju jevy ore rendápe. Amo yvága guive emaña ore rehe.
Eju ehecha parralty, nde poite rupi reñotỹ va’ekue ha nde voi remongakuaa va’ekue. O.

Upéicha ramo ndorojeréi chéne nde hegui. Eheja toroikove ha toromomba’e nde réra.
Ha Ñandejára! Roikose jevy niko ymave guaréicha. Ehecha kuaána oréve, rojei haguã jejopy vaígui. O.

LECTURA MOKÖIHA:

Ñahendúta Tupä Ñandejára Ñe’ẽ San Pablo ohai va’ekue Filipos guápe 4, 6-9

Che pehenguekuéra: Ani pejepy’apy mba’eve rehe, pemoĩ uvei opa mba’e Ñandejára pópe pene ñembo’épe; pejerure ha peme’ẽ avei ichupe pende aguyje. Ha Ñandejára ome’ẽne peẽme ipy’a guapy, tuichavéva opa ikatu va’erãgui yvypóra oha’arõ. Ha pe py’a guapy oñangarekóne pende py’a ha pene ñe’ãre, Cristo Jesús rupi.

Ipaharã, che pehẽnguekuéra, pejepy’a mongeta umi mba’e iporãvare, umi mba’e ojeapo va’erã mba’érõ rehe, opa hekópe guáva rehe, opa ipotĩvare, opa oporo mbovy’ávare, opa herakuã porãvare. Pejepy’a mongeta opaichagua teko marangatúre, opa ojererohory va’erã rehe.

Akóinte pejapo pehóvo upe che pombo’e va’ekue ha aheja va’ekue peëme pejapo haguã, umi mba’e pehendu ha pehecha va’ekue ajapoha. Pejapo upéicha, ha Ñandejára oporombopy’a guapýva oĩ va’erã pene ndive.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cf. Jn 15, 16
Aleluia.
Chéve, peë nda che poravói va’ekue, che uvei poiporavo va’ekue peẽme. Che pomondo pejapo haguã heta mba’e, mba’e opa rei’ỹva. Péicha, che Ru ome’ẽta peëme opa mba’e ichupe pejeruréva che rérape.
Aleluia.

EVANGELIO
Marandu porã Ñandejára Jesucristo rehegua San Mateo omombe’u háicha 21, 33- 46

Opavave: Romomba’e guasu ndéve, Ñandejára.

Upe ramo Jesús he’i umi pa’i ruvicha kuéra ha Israel myakãhárakuérape: Peteĩ karai ndaje oñotỹ raka’e peteĩ parralty ikokuépe. Omongorapy ha ojapo peteĩ piléta víno ojejapo haguãme. Omopu’ã ave peteĩ sovrádo upégui oĩ haguã omañáva ha oñangarekóva ikokuére.

Upéi katu, oarkila ha osẽ oho mombyry. Ha oguãhẽ upe parral ojepo’oha ára, víno ojejapo haguã. Upépe pe yvy jára omondo hembiguái kuérape ojerurévo upe chupe ohupytýva. Umi oarkila vaekue katu ojeity umi tembiguái ári.

Peteĩme heta oinupã, pe ambuépe katu ojuka hikuái, ha pe mbohapyha ojapi itápe ojuka peve hikuái.

Upéi katu pe yvy jára omondo hetave hembiguái kuéra, ha oiko hese kuéra umi tenonde oho vaekuéicha.

Ipahápe omondo ta’ýra teépe, he’ígui ipy’apýpe: “Che ra’ýpeko ohendu vaerã hikuái”. Ohechávo hikuái pe yvy jára ra’ýpe katu, he’i hikuái: “Kóva yvy járata hína ágã túva omano vove. Jajuka ha topyta ñandéve ko yvy”. Ha ojeity hi’ári hikuái. Oguenohẽ pe kokuégui ha ojuka.”

Upéi Jesús oporandu: — Ágã pe yvy jára ou vove, mba’épa peje ojapóne haguã.

Ha he’i hikuái chupe: — Ojukapaite vaerã niko umi tekove ahẽ. Upéi katu oarkiláne ijyvy ambuépe ome’ẽ vaerãva chupe pe imba’éva.

Upépe Jesús he’i chupekuéra: — Na pene mandu’ái aje Ñandejára Ñe’ẽme he’iha: “Pe ita
omboyke va’ekue umi óga omopu’ãva péva ári ko’ágã oñemopu’ã tupao. Péicha ojapo Ñandejára, ha ñande jurujái jahechávo.”

Upévare ha’e peẽme, Ñandejára Rréino ojepe’áta pende hegui ha oñeme’ẽta umi ojapóvape Ñandejára rembipota. Ha oimeraẽva oñepysãngáva ko itáre, opẽmbaiténe. Ha ho’a ramo pende ári katu, pene mongu’i paiténe.

Umi pa’i ruvicha ha fariséokuéra ohendúvo pe káso Jesús omombe’úva, ohecha kuaa hikuái hesekuéra he’iha. Ha oapresase mo’ã hikuái Jesúspe. Noñanimáinte hikuái okyhyjégui opavavégui. Oje’e niko Jesús rehe ha’e profetaha.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucrísto.