MIÉRCOLES SEMANA 28º DURANTE EL AÑO

MIÉRCOLES SEMANA 28º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Galacia guápe           5, 18-25

Che pehẽnguekuéra:

Espíritu pene sãmbyhy ramo katu, napeime mo’ã véima tembiapoukapy poguýpe.

Ndahasýi jahecha haguã ojapóva umi ohóva tembipota vai rapykuéri: ojapo tie’ỹ reheguáva, mba’e ky’a ha jepokuaa vai rehegua, omomba’e guasu ta’ãnga rei ha ojapo paje. Oñemohatã py’a rasýpe, jeiko vai ha ñemoakate’ỹme. Ipochy rei, ojoavypa, ha ojeipa ojuehegui. Imba’e pota, ika’u, ikaru ha hetave mba’e. Ha’e peë me, ajapóma haguéicha ymave, umi péicha oikóva ndohupity mo’ãiha Tupã Ñandejára sãmbyhy.

Espíritu katu, ome’ẽ  mborayhu, vy’a, py’a guapy, jeiko kuaa, py’a porã, marangatu, vy’a pavẽ, jejapo’ỹ ha jeiko kuaa. Umívape guarã hembýma tembiapoukapy. Ha umi Cristo Jesús reheguáva, ohupíma kurusúre yvypóra reko mba’e vai apoha, imba’epota vaieta reheve. Ko’ágä  jaikove ramo Espíritu rupi, jaheja ta ñane sãmbyhy pe Espíritu.

Tupã Ñandejára Ñe’ẽ.

SALMO ÑEMBOHOVÁI    1, 1-6. 6

Opavave: Ovy’a umi ojapova Tupã Ñandejára Ñe’ẽ.

Ovy’a ojapo’ỹva iñañáva ñe’ẽ,  oiko’ỹva iñangaipáva ndive,

ojehe’a’ỹva umi Tupã Ñandejárare oñembohorýva ndive.

Tupã Ñandejára rembiapoukapy ipy’a ombohory,

ha hese ojepy’a mongeta ára ha pyhare. O.

Ojogua ku yvyra mátape oñeñotỹva

y rembe’ýpe, hi’áva hi’árape, ha ndahoguekúiva.

Opa mba’e ojapóva osẽ porã ichupe. O.

Ndaupéichai umi hembiapo vaíva, kapi’i pirukuéicha umívape yvytu omboveve.

Tupã Ñandejára oñangareko imarangatúva rapére.

Hembiapo vaíva rape katu opa vai. O.

ALELUIA Jn 10, 27

Aleluia.

Ñandejára Jesucristo he’i:

“Che ovecha kuéra ohendu che ñe’ë.

Che aikuaa ichupe kuéra ha ha’ekuéra oho che rapykuéri”.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha 11, 42-46

Upe ramo Jesús he’i fariséokuérape:

“Peje rerekóke peẽ fariséo, pembo ykéva 10gui peteĩ pene pohã ñana ha opa mba’e peñotỹ va’ekégui, ha ndapehecha kuaái tekojojáva ha mborayhu Tupã Ñandejárape guarã. Kóva hína pejapo va’erãva, pembo tapykue’ỹre umi ambue.

Peje rerekóke peẽ fariséo, peguapyséva umi iporãvehápe judío kuéra tupaópe, ha peipotáva opavave pene momaitei pene mbojeroviávo, mamo peikoha rupi.

Peje rerekóke peẽ, pejoguáva umi tyvy ojekuaa’ỹvape, opavave opyrũva oikuaa’ỹre.”

He’i ichupe upépe peteĩva umi Moisés rembiapoukapy mbo’eha apytégui:

Mbo’ehára, erévo upéva, ore mbopochy oréve avei.

Ha Jesús he’i ichupe: Peje rerekóke peẽ ave, Moisés rembiapoukapy mbo’eha, pehupíva ambue ati’y ári mba’e pohýi avave ikatu’ỹva ogueropu’aka, ha peẽ peteĩ pene kuãme jepe ndapepokoséi hese.

Ñandejára Jesucristo Ñe’ẽ