LECTURAS VIERNES SEMANA XXVIII TO

LECTURAS VIERNES SEMANA XXVIII TO

Ñahendúta Tupã Ñandejára Ñe’ẽ San Pablo ohai va’ekue Éfeso guápe     1, 11-14

Che pehẽnguekuéra:

Tupã Ñandejára péicha oipotágui, ha opa mba’e ojehúva ojehúgui ha’e oipota háicha niko ore poravo va’ekue  yma ite guive Cristo rupi, roiko haguã imba’e teéva ramo. Ha’e niko oipota va’ekue  ore raëvete roju rojerovia Cristo rehe, ikatu haguãicha opavave romomba’e guasu ipokatu tuicha ite.

Peẽ avei pehendu umi ñe’ẽ añetéva, marandu porã pene pysyrõva. Pejerovia Cristo rehe ha Tupã Ñandejára omoĩ pende rehe imba’eha, ome’ẽvo peẽme Espíritu Santo he’i haguéicha ome’ẽtaha.

Jarekógui Tupã Espíritu, jaikuaa porã jahupitytaha umi mba’e Tupã Ñandejára ome’ẽtava umi imba’e teévape. Ha ñande jorapa itévo ha ojapóvo ñande hegui hetã imba’e teerã, opavave ñamomba’e guasúta ipokatu tuicha ite.

Tupã Ñandejára Ñe’ẽ.

SALMO ÑEMBOHOVÁI  32, 1-2. 4-5. 12-13

R. Ovy’a upe tetã oguerekóva Tupã Ñandejárape ijára ramo.

Mayma imarangatúva to momba’e Tupä Ñandejárape.

Omomba’e guasu va’erã voínte ichupe, opa imarangatúva.

Pemomba’e guasu Tupä Ñandejárape

mbaraka púpe, árpa púpe, pepurahéi ichupe. R.

Upe Ñandejára he’íva niko añete,

ha opa mba’e ojapo teko jeroviápe.

Ha’e ohecha ramo teko joja ha opa mba’e hendápe ojejapóva.

Yvy niko henyhẽ chovi imborayhúgui. R.

Ovy’a upe tetã oguerekóva Tupã Ñandejárape ijára ramo,

upe tetã ha’e oiporavo va’ekue  imba’e teerã.

Tupä Ñandejára omaña yvága guive ha opavavépe ohecha. R.

ALELUIA Sal 32, 22

Aleluia.

Tupä Ñandejára, ne mborayhu to guejy ore ári,

toiko upe ndéve roha’arö háicha.

Aleluia.

EVANGELIO

Marandu porã ñahendúta Ñandejára Jesucristo rekove ha hemimbo’e San Lucas omombe’u háicha    12, 1-7

Upe árape, heta hetave yvypóra oñemboaty, ha heta itereígui ojejapipa ojuehe. Jesús iñepyrũrã oñe’ẽ hemimbo’e kuérape: “Peñe ñangarekóke umi fariséo rova mokõigui. Ndaipóri mba’eve okañýva ojehecha’ỹ va’erã ha oñemíva ojekuaa’ỹ va’erã. Upévare, opa mba’e peẽ pejéva pytũmbýpe, oñehendúne ára sakãme, ha umi pejéva ñemiháme ha koty ñembotypýpe ojesapukáine opa óga ári guive.”

 “Peẽme, che irũ nguéra ha’e, ani pekyhyje umi pende reténte ojukávagui, ha upéi katu ndaikatu véima ojapo mba’eve. Che ha’éta peẽme mávaguipa pekyhyje va’erã: Pekyhyje oporojuka rire ipokatúva oporomondo haguã aña retãme. Upévagui pekyhyje va’erã.

 “Noñe me’ẽi nga’u piko 5 guyra’imi mokõi viru pehẽngue míre? Upéicharõ jepe, Tupã Ñandejára ndahesaráiri ichugui  kuéra. Pene akãrague peteĩ teĩ jepe niko ha’e oikuaapa. Aníke aipo ramo pekyhyje, peẽ niko mba’e guasu eteve hína heta guyra’ígui.”

Ñandejára Jesucristo Ñe’ẽ