DOMINGO SEMANA XXXII TO

LECTURA PETEÏHA:
Ko’ágã ñahendúta Tupã Ñandejára ñe’ẽ Sabiduría arandukápe oĩ háicha 6, 12-16

Arandu overa hendy ha araka’eve ndoguéi: umi ichupe ohayhúvape oheja oma’ẽ hese, ha ojejuhuka umi ichupe ohekávape.

Umi ipotahápe ha’e voi ojekuaauka. Opáy voíva hesehápe, naikane’õi: ojuhúne oguapy hokẽme.

Ñañamindu’u hese, he’ise jaiko kuaa, ha iko’ẽmbáva hese ndaipy’a tarovái. Arandu oheka opa rupi umi ichupe ohayhúva, ojechauka ichupekuéra tapépe torypápe ha oĩ opa hemiandukuérape.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 62, 2-8
Opavave: Opa che rekove niko nde rehe oikotevẽ.

Tupã, nde niko che Jára.
Opa rupi roheka che py’a nde hegui amyenyhẽségui.
Opa che rekove niko nde rehe oikotevẽ,
ku yvy ojeiko’ỹha y oikotevẽ háicha. O.

Tupaópe rohechase, nde pu’aka ha nde reko mimbipa amomba’e haguã.
Ne mborayhu niko tuicha iteve jeikovégui.
Ndéve rogueropurahéine, ha aikove aja pukukue romomba’éne. O.

Ndéve añembo’évo che po ahupíne nde réra rehehápe
Avy’a iténe apytávo ku so’o kyra ha karaku ha’u ramo guáicha
ha torypápe romomba’e guasúne. O.

Añenóvo ake haguã nde rehe che mandu’a.
Pyhare pukukue che akãme rombojere,
ndégui upe che pytyvõva.
Nde pepo guýpe aguapýne vy’águi apurahéi. O.

LECTURA MOKÖIHA:
Ñahendúta Tupã Ñandejára Ñe’ẽ San Pablo ohai va’ekue Tesalónica guápe 4, 13-14

Ore pehẽngue, ndo roipotái pepyta peikuaa’ỹ rehe mba’épa oiko umi omanóvagui, ani haguã
pejepy’apy umi ambue oha’arõ’ỹva mba’evéicha. Roguerovia háicha Jesús omano ha oikove jevy hague, upéicha avei roguerovia, Jesús ndive Tupã Ñandejára omoingovepa jevytaha umi heroviaha omano va’ekuépe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Mt 24, 42a. 44
Aleluia.
Pejesareko va’erã. Peimo’ã’ỹve jave niko che, yvypóraicha aju va’ekue, ajúta.
Aleluia.

EVANGELIO
Marandu porã Ñandejára Hesukrísto rehegua San Mateo omombe’u háicha 25, 1-13
Opavave: Romomba’e guasu ndéve, Ñandejára.

Upe ramo Jesús he’i: Ñandejára Rréino niko ojogua ku menda rehegua káso. Oiko va’ekue ndaje raka’e 10 kuñataĩ. Ha peteĩ pyharépe, ilampĩu ipópe osẽ ohuvãitĩ pe menarãme. Umi kuñataĩ apytépe ndaje oĩ raka’e 5 iñakã tavýva ha 5 iñakã porãva.

Umi iñakã tavýva, ogueraha ramo jepe ilampĩu,ndoguerahái aséite peichahágui oikotevẽve ramo guarã. Umi iñakã porãva katu ogueraha ilampĩu ha aséite ryru ave. Pe menarã hi’arégui oguãhẽ haguã, umi kuñataĩ hopehyipa ha opyta oke.

Pyhare pyte rupi katu oñehendu sapy’a peteĩ osapukáiva, “Na’ápe oúma pe menarã. Pesẽ pehuvãitĩ.” Umi 10 kuñataĩ opáy ha opu’ã, omyendy tuichave haguã ilampĩu. Umi 5 iñakã tavýva he’i umi 5 iñakã porãvape, “Peiporukápy oréve pende aséite michĩmi. Ore lampĩu niko ogue potáma hína.”

Umi iñakã porãva katu he’i chupekuéra, “Nahániri. Na ñande rupytypa mo’ãi niko péicharõ. Tapeho pejogua peipotárõ.” Ha umi 5 iñakã tavýva oho aja aséite rekávo, oguãhẽ pe menarã. Ha umi kuñataĩ iñakã porãva oike hendive mendahápe, ha oñemboty pe okẽ.

Ojevy rire umi aséite joguávo oho va’ekue, ojuhu ndikatuiha oike. Ha osapukái “Karai. Karai. Eipe’ána oréve ne rokẽ.” Ha’e katu he’i chupe kuéra, “Mávaiko peẽ. Che ndapoikuaái.”
Ha upéi osẽ he’i Jesús, “Pejesarekóke ha ani mo’ãke peke. Cháke ndapeikuaái hína araka’etépa ajúne.”

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.