LECTURAS MARTES SEMANA 33º DURANTE EL AÑO

LECTURAS MARTES SEMANA 33º DURANTE EL AÑO

Ñahendúta Tupã Ñandejára Ñe’ẽ Apocalipsis arandukape oĩ háicha   3, 1-6. 14-22

Che, Juan, ahendu Tupã Ñandejárape, ha’e he’i chéve:

Emoĩ avei kuatiáre marandu Sardes peguápegua iglésiape guarã: “Kóicha he’i pe oguerekóva umi 7 Tupã Espíritu ha umi 7 mbyja: ‘Che aikuaa opa mba’e rejapóva, ha aikuaa remanomaha, ne rerakuã ramo jepe reikoveha. Epáy, ha emombarete umi opytáva gueteri, ha oĩmava omano haguãicha. Ahecha niko umi rejapóva ndaha’eiha iporã mbáva Tupã Ñandejára renondépe.

Ne mandu’áke umi reikuaa va’ekuére, tereho hapykuéri ha ejevy Tupã Ñandejára gotyo. Nde repáyri ramo, aháta ndéve monda háicha, reha’arõ’ỹve jave. Upe Sárdispe, rereko jepe umi nomongy’ái va’ekue  ijao. Ha’e kuéra oikóne che ndive iñemondeha morotĩ reheve, hembiapo kuerakue ojerurégui upéva.

Umi osẽ porãva oñemondéta ao morotĩme, ha nomboguéi chéne héra kuéra pe jeikove kuatia ñe’ẽgui. Ha ha’éne katu che Ru ha hemimbou kuéra renondépe, ha’e kuéra che mba’eha. Ijapysáva to hendu mba’épa he’i Espíritu umi Tupã Ñandejára iglésiape!’”

Emoĩ avei kuatiáre marandu Laodicea pegua iglésiape guarã: ‘Kóicha he’i pe Añeteguáva, mba’e rechaha ijapu’ỹva, añetegua he’íva, opa Tupã Ñandejára ojapo ypy va’ekue  ñepyrũmby. Che aikuaa opa rejapóva. Aikuaa na ne ro’ysãi ha na nde rakuiha. Mba’éicha tamo ne ro’ysã térã nde raku ra’e! Ha pe nde raku vevýigui, na ne ro’ysãi térã na nde rakúi, upévare rogue’ẽta che jurúgui.

Nde niko ere ne mba’e repy hetaha, iporãmba iteha ndéve ha opa mba’e reguerekoha; ha nde rehecha kuaái reiko vai ha reiko asyha, ne mboriahu apĩha, ha nde rehechái nde opivoha. Upévare ha’e ndéve rejogua haguã che hegui óro oñemopotĩ va’ekue  tatápe, ne mba’e repy heta haguã añetehápe; ha che hegui rejogua haguã ao morotĩ, reñemonde haguã ha remo’ã pe nde opivoha ñane motĩva, ha peteĩ pohã remoĩ haguã nde resápe ha rehecha.

Che aja’o ha ahekombo’e opa ahayhúvape. Aipórõ, eñembo’e ha ejevy Tupã Ñandejára gotyo. Ema’ë, che ahenói hína okẽme. Oimérõ ohendúva che ñe’ẽ ha oipe’áva hokë, aikéta hógape ha rokarúta oñondive.

Umi ipu’aka ha osẽ porãvape, ame’ẽta hendaguã che guapyhápe, che pu’aka ha asẽ porã haguéicha ha aguapy che Ru ndive iguapyhápe. Ijapysáva to hendu Espíritu he’íva Tupã Ñandejára iglésiakuérape!”

Tupã Ñandejára Ñe’ẽ.

SALMO ÑEMBOHOVÁI     14, 2-4b. 5

Opavave: Tupã Ñandejára ijykére che mboguapýne.

Upe hembiapo porã
ikohápeva ha heko jojáva maymave ndive,

upe añete guánte he’íva ipy’a ite guive,

upe oñe’ẽ vai’ỹva hapicháre. O.

Upe ojapo’ỹva ivaíva hapicháre, oiko vai’ỹva hapicha ndive,

upe oñe’ẽ vai’ỹva hapicháre, upe ojapo’ỹva ivaíva hapicháre,

upe oiko vai’ỹva hapicha ndive, umi Tupã Ñandejárare ojeroviávape. O.

Upe ndohecha ramóiva hembiapo vaívape, omomba’éva,

upe he’íva ojapóva ohasa asy ramo jepe,

plátare oiporuka’ỹva, plátare omoĩ vai’ỹva hapichápe.

Upe ojapóva ko’ã mba’e, ndo’ái chéne araka’eve. O.

ALELUIA 1Jn 4, 10b

Aleluia.

Tupã Ñandejára ñande rayhu raëve ha ombou ta’ýra oikuave’ẽ haguã hekove ñane angaipáre.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha   19, 1-10

Upe ramo Jesús oike Jericópe, ha ohasa ohóvo upe táva rupi. Upépe oikóva peteĩ kuimba’e imba’e retáva hérava Zaqueo, umi omono’õva viru Roma ruvichápe guarã. Ha’e oikuaase Jesúspe, ha ndaikatúi ohecha ichupe, hetágui umi Jesús ndivegua, ha Zaqueo ikarape.

Upévare oho tenondévo. Ha ohecha haguã ichupe, ojupi peteĩ yvyra rakãre, pe Jesús ohasataha ypy rupi.

Ohasávo Jesús upe rupi, oma’ẽ yvatévo ha he’i ichupe: Zaqueo, pya’e eguejy. Ko árape apyta va’erã nde rógape.

Zaqueo pya’ete oguejy, ha torypaitépe omoguahẽ Jesúspe. Ohechávo upéva, opavave oñepyrũ oñe’ẽ Jesús rehe, he’i hikuái ohoha opyta peteĩ iñangaipáva rógape. Zaqueo opu’ã upépe ha he’i Ñandejárape: Ma’ẽ, che Jára, ame’ẽta imboriahúvape mbyte rupi opa arekóvagui, ha oimérõ amonda hague, amoengoviáta ichupe irundy jevy hetave.

Jesús he’i ichupe: Ko árape, koanga kóvapegua oguahẽ ñepysyrõ. Zaqueo niko Abraham ñemoñare avei. Tupã Ñandejára ra’y, ou va’ekue  yvypóraicha, ou ohekávo ha oipysyrõvo opa oñehundi va’ekue.

Ñandejára Jesucristo Ñe’ẽ.