LECTURAS MIÉRCOLES SEMANA 33° DURANTE EL AÑO

LECTURAS MIÉRCOLES SEMANA 33° DURANTE EL AÑO

Ñahendúta Tupã Ñandejára Ñe’ẽ Apocalipsis arandukápe oĩ háicha              4, 1-11

Che, Juan ama’ẽ ha ahecha peteĩ okẽ ojepe’áva yvágape; ha pe ñe’ẽ ahendu va’ekue  tenonderã, ha ojoguáva turu púpe, he’i chéve: “Ejupi ko’ápe ha ahechaukáta ndéve umi mba’e ojehútava ko’ãva rire.”

Upepete apyta Espíritu poguýpe, ha ahecha peteĩ guapyha oñemoĩ va’ekue  pe yvágape, ha oĩ oguapýva upépe. Pe guapyhápe oguapýva hína ha’ete ku diamánte, téra itavera pytã, ha pe guapyha jerére oĩ peteĩ jýi overáva esmeráldaicha.

Ahecha avei pe guapyha jerére ambue 24 guapyha, oguapyhápe hína 24 karai moakãhára: ijao morotĩ ha iñakãre oguereko akã rehegua jeguaka órova. Pe guapyhágui osẽ ára tiri, ñe’ẽ ha ára sunu, ha henondépe katu ohesape 7 tata’y rendy, umíva hína umi 7 Tupã Espíritu. Pe guapyha renondépe oĩ avei peteĩ mba’e ojoguáva yguasúpe, cristálcha hesakãva.

Mbytépe, oĩháme pe guapyha, ha ijerére, oĩ 4 oikovéva, hesáva henondévo ha hapykuévo. Pe oikovéva peteĩha ojogua leónpe, pe mokõiha tórope, pe mbohapyha ojogua yvypórape, pe irundyha katu, peteĩ taguato ovevéva hínape.

Irundyvéva ipepo 6, ha henyhẽ teságui, okaguio ha hyepýguio. Ha ára ha pyhare he’i hikuái: “Imarangatu, imarangatu, imarangatu Ñandejára, Tupã ipu’akapáva. Ha’e niko pe ha’e va’ekue, pe ha’éva ha pe ou va’erã!”

Umi oikovéva ombotuicha ha omomba’e guasu ha me’ẽ jave jepi ijaguyje  pe guapyha verápe oĩvape, pe oikovéva opa ára guarã, umi 24 karai moakãhára  oñesũ henondépe ha omomba’e guasu ichupe, ha oity iñakã rehegua jeguaka pe guapyha renondépe, ha he’i: “Nde, ore Jára ha ore Tupã, ndéve ija reñemomba’e guasúvo, remimbipávo ha nde pu’akapávo, nde ha’égui opa mba’e apohare, nde reipota rupínte oiko va’ekue .”

Tupã Ñandejára Ñe’ẽ.

SALMO ÑEMBOHOVÁI   150, 1-6

Opavave: Toñemomba’e guasu Tupã Ñandejára.

Toñemomba’e guasu Tupã Ñandejára.

Pemomba’e guasu Tupã Ñandejárape tupaópe,

pemomba’e guasu ichupe yvága tuichaha javeve,

pemomba’e guasu ichupe hembiapo tuichakuére. O.

Pemomba’e guasu trompéta púpe,

pemomba’e guasu ichupe árpa ha mbaraka púpe,

pemomba’e guasu ichupe tambor pu ha jerokýpe,

pemomba’e guasu ichupe mbaraka ha mimby púpe. O.

Pemomba’e guasu ichupe platíllo púpe.

Pemomba’e guasu ichupe platíllo pu rorýpe.

Mayma oikovéva to momba’e guasu Ñandejárape.

Toñemomba’e guasu Tupã Ñandejára. O.

ALELUIA Cf. Jn 15, 16

Aleluia.

Ñandejára Jesucristo he’i:

“Che poroiporavo yvypóra apytégui, peho haguä ha osẽ haguã pende hegui heta mba’e porã, ha upe mba’e porã oikóta opa áraitépe.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha   19, 11-28

Upe ramo Jesús omombe’u ichupekuéra peteĩ ñe’ẽ mbojoja oĩguima Jerusalén ypýpe, ha ha’ekuéra oimo’ãgui Tupã Ñandejára sãmbyhy oguahẽ potamaha.

Jesús he’i ichupe kuéra: “Oiko va’ekue  peteĩ kuimba’e imba’e retáva oho va’ekue  mombyry, ambue tetãme, ojupi haguã mburuvicha guasúrõ ha ou jevy. Osẽ mboyve, ohenói 10 ichupe omba’apóvape, peteĩ teĩme ome’ẽ heta viru, ha he’i ichupekuéra: ‘Pemomba’apo ko viru aju jevy peve.’ Ha hetãguakuéra katu ndaija’éi hese, ha omondo hapykuéri peteĩ atýra he’i va’erã hese: ‘Ndoroipotái kóva ko kuimba’épe ore ruvicha guasurã.’

Ichupe katu oñemoĩ mburuvicha guasúrõ, ha ojevy hetãme.

Oguahẽvo, ohenoiuka umi imba’apohára ome’ẽ hague viru, oikuaa haguã mboýpepa ojere ra’e ichupe kuéra peteĩ teĩme. Pe tenondegua oñemboja ha he’i: ‘Karai, nde viru imemby 10 jevyve.’ Mburuvicha guasu he’i ichupe: ‘Iporã. Nde hína mba’apohára katupyry. Mba’e michĩvape nde jeroviaha haguére, romoĩ reisãmbyhy haguã 10 táva.’ Oñemboja ambue ha he’i: ‘Che ruvicha, nde viru imemby 5 jevyve.’ Upévape avei he’i: ‘Nde reisãmbyhýta 5 táva.’

Ambue katu oñemboja ha he’i: ‘Karai, kóina ápe nde viru, añongatu va’ekue  peteĩ pañuélope. Akyhyje va’ekue  niko nde hegui, nde po pohýigui, rejapyhy niko reme’ẽ’ỹ haguépe ha remono’õ reñemitỹ’ỹ haguépe.’ Aipórõ, mburuvicha guasu he’i ichupe: ‘Nde mba’apohára ate’ỹ. Ne ñe’ẽre roikuaa.

Reikuaa rire che po pohýiha, amono’õha name’ẽi haguépe ha amono’õha nañemitỹi haguépe, mba’eha nde rerahái ra’e che viru ikatuhápe oñemomba’apo, reme’ẽ haguã chéve imemby reheve aju jevy rire?’ Ha he’i umi upépe oĩvape: ‘Peipe’a ichugui  pe viru ha peme’ẽ pe 10 jevyve omomemby va’ekuépe.’ Ha’ekuéra he’i ichupe: ‘Karai, ha’e niko oguerekóma 10 jevyve.’ Mburuvicha guasu he’i: ‘Che ha’e peẽme, upe oguerekóvape oñeme’ẽvéta. Ha upe oguereko’ỹvagui katu, pe michĩmi oguerekóva guive jepe ojepe’áta. Ha umi che rehe ija’e’ỹva katu, nda che potái va’ekue  mburuvicha guasúrõ, peru ko’ápe ha pejuka che renondetépe.’”

He’i rire ko’ã mba’e, Jesús ohasa oho Jerusalénpe.

Ñandejára Jesucristo Ñe’ẽ.