Ñahendu Hesu. Domingo II Adviento

Escucha el evangelio y la reflexión en: https://youtu.be/JD1C2-d3hJM

Domingo 2º Adviento Ciclo B

Marcos 1, 1 – 8

Kóva ha’e hína ñe’ẽ porã ñepyrũha, Jesús, Tupã Ra’y rehegua. Péicha oime profeta Isaías
kuatiápe: “Amondo che ñe’ẽ rerahaha ne renonderã, ombosako’i haguã ndéve nde raperã.
Oime peteĩ osapukáiva desiértope: ‘Pembosako’i Ñandejárape haperã, pejapo chupe tape
ikarẽ’ỹva.’”

Ha péicha Juan Bautista oho opredika upe desiértope. He’i opavavépe oñemboja vaerãha
Tupãre ha oñemongaraika vaerã Tupã oheja rei haguã chupekuéra hembiapo vaikue. Opa
Judea ha Jerusalengua osẽ ohendúvo chupe, oñemombe’u hembiapo vaikuégui ha Juan
omongarai chupe kuéra rrío Jordánpe.

Juan ao ojejapo kaméllo raguekuégui ha iku’a jokuaha katu vakapi. Ha ho’úmi vaekue tuku ha eíra ka’aguy. Ha’e opredika péicha: “Che rire oúta peteĩ imbaretevéva che hegui, ndaijáiva chéve ajayvy henondépe ajora isapatu sã.

Che pomongarai vaekue ýpe. Ha’e katu pene mongaraíta Espíritu Sántope.”

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Jahecháma sandía ha mbokaja poty, mango aju ha oñemúva oga’i pesebre kapi’íre.
Vaka, ovecha, kaméllo kuéra ra’anga, Tupãsy, San José ha níño ra’anga pesebrerã jahecha
avei. Hyakuãma pe Navida. Áño paha rupi niko heta mba’e omýi jepi. Ikatumíva oñembopyahu, ojejogua ha oñemomorã. Lo mitã ombyaty pláta karu guasurã, ao pyahu,
oñepinta óga. Avave ko ndohejaséi ohasa rei ko arete.

Ha ñahendu Juan Bautista oñembouha omohendávo Ñandejára raperã. Ou oñe’ẽ hatã. Osapukái voi katu ñandéve, jahechápa nañasẽi ñande rape karẽgui. Ikatu haguãicha ou
oike Ñandejára ñande rekovépe. Hatãke esapukái he’i Isaías. Ha mba’érepa oiméne hatãite
osapukái.

Ha ñahendu niko avei hatã osapukaiha ñande apysápe radio, téle, propaganda, musikapu, interne ma katu. Opaichagua he’íva ñandéve jajogua va’erãha heta mba’e hendy ha oguéva, ñanemo akã tarovapáva. Ha nañande apysa véima ñahendúvo Ñandejára ñe’ẽ.

Ha upévare niko Juan Bautista hatã mante osapukáita jahechápa ndajapáyri, jahechápa
nañasẽi tape karẽgui.

Ñapensamína, che irũ ha nde che reindy. Mba’épa oime nde py’apy etereíva, hyapu hatãva nde py’ápe ha ikatúva nembotaryrýi ko áño pahápe. Mba’épa upe nemoakã rakúva ha ndaikatúiva rehupyty. Ema’emína Tupãsy María ha San José, pe niñomi ndive, mba’éichapa ou ne rendápe. Ikatúko upe reipotaitéva nereikotevẽi hína. Ha nde rekovépe oike ramo hikuái, tuicha oguapýta ne korasõ. Mba’épa reñandu.

ÑAÑEMBO’E OÑONDIVE

Ñandejára Hesukrísto, rejúva ore rendápe opa ara embota ore rokẽ eme’ẽ haguã oréve nde
grásia porãite. Eipe’a ore apysa rohendu haguã ne ñe’ẽ ha roheja haguã reguahẽ ore
korasõme ha epyta ore róga pype. Amén.

Pa’i Jasy.