Ñahendu Jesús Ñe’ẽ. Martes 21º Durante el Año

Escucha el evangelio y la reflexión en: https://youtu.be/lW8Yzx90iBk

Martes 21 Durante el Año Mateo 23, 23 – 26

Upérõ Jesús he’i: Pejererekóke peẽ Moisés léi pembo’éva ha peẽ fariséo rova mokõi. Peẽ niko peme’ẽ Ñandejárape 10gui peteĩ umi ménta, anís ha comíno hamba’e pende yvýgui pemono’õva.

Upéi katu pende resarái Ñandejára léi he’iha peẽme pende reko joja va’erãha, peporoporiahuvereko kuaa va’erãha ha pejerovia vaerãha Ñandejárare. Ko’ãva raẽvete pejapo rangue, pejapo umi ambue.

Peẽ myakãhára resatũ. Upe y pe’úvagui niko peẽ pembogua gua’u ñati’ũ, ha upéi katu pemokõ kavaju. Pejererekóke peẽ Moisés léi pembo’éva ha peẽ fariséo rova mokõi. Peẽ niko pejogua umi kópa ha pláto, ijape guionte ojejohéiva. Pende py’ápe katu pene renyhẽ monda ha taryrýigui. Pehendúke, peẽ fariséo resatũ. Pemopotĩ raẽna pe mba’yru hyepýguio, péicharõ ipotĩne avei ijape.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

“Apaga paitéma che pecado”. He’i lo mitã. Hy’ái oúvo, hetyma rasypa, oúramo hína peregrinación Caacupégui, térã katu ojupíramo Cerro Yaguarón viérne sánto ka’aru mba’e. Umíva niko iporã, ajépa.

Opáichavo sapy’ánte ikatu umíva ndopokói ñande py’a ha ñande rekovére, ñande retérente oguapy. Ha amo ipahápe ikatu ndajahesa’ói hína umi tembiapo vai tuicháva ñande rapicha kuéra ndive. Ijapéguionte ñamopotĩ la ñane mba’yru ha hyepy katu nahániri.

Ñahendu kuri Jesús ombohovái umi fariséokuéra ha Moise léi mbo’ehápe, omotenonde haguére Ñandejára rérape heta ley ha tembiapo porã sa’i sa’i ha oheja ojapo’ỹre umi tekotevẽvéva hapicha renondépe. Jesús he’i ichupekuéra omboguaha peteĩ ñati’ũ ha omokõ peteĩ kavaju. Hesa’i kueténte ojapo ha umi tuichavéva katu oñembotavýnte ha ombohasa.

Oja’o ichupekuéra Jesús ohecha pype pe iñembo’e puku ndojekuaái hekovépe, hapicha mboriahu ndive.

Jesús ohecha mba’éichapa upe mba’e pota tarova ojaho’i ichupe kuéra ha umíva rapykuéri oreko asy hapicha, ndohechakuaái hemikotevẽ. Ha upéva hína upe oñemotenonde vaerãva, upéva ñamopotĩramo ijeheguíntema ipotĩta ijapekue.

He’i háicha Ñandejára profeta Isaías rupi: “Pende po tuguy meme pehupívo ñembo’épe, amboty che resa, peñembo’eve ramo jepe, nahendúi. Pejepohéi, peñemopotĩ! Peipe’a che renondégui pene rembiapo ky’a. Peñeha’ã pejapo pe heko jojáva, peipytyvõ ojejopy vaívape,”;

Upéi, he’i Ñandejára: “Peju ñañemongeta ha pende pekádo pytã ruguy ramo jepe, ahejáta morotĩ asy, mandyjúicha.” Amo ipahápe che reindy ha nde che irũ, marãve naiporãmo’ãi ñandéve heta ñembo’e, tataindy arróva, procesión ha Caacupépe ñaguahẽ ramo ñesũháme jepe, okañy ramo ñandehegui poriahuvereko ñande rapicha remikotevẽme, ha tekojoja, ñame’ẽvo upe imba’éva peteĩ teĩme.

Pa’i Jasy.