LECTURAS: JUEVES 2° DURANTE EL AÑO

LECTURAS: JUEVES 2° DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Hebreos guápe     7, 25 – 8, 6

Che pehẽnguekuéra:

Jesús ikatu oipysyrõ opa ára guarãma umi oñemo aguĩvápe Tupã Ñandejáragui, oikove tapia rupi oñembo’e haguã Tupã Ñandejárape hesekuéra.

Aipórõ, Jesús hína pe Pa’i Guasu ñaikotevẽva. Ha’e niko imarangatu, ndaheko añái ha imarã’ỹva, mombyry tembiapo vaívagui ha oñemoĩ ichupe yvateve yvágagui.

Ha’e ndaha’éi umi ambue Pa’i Guasúicha, omba’e juka va’erãva ha ára ko’ẽre oikuave’ẽ va’erã hína iñangaipáre voi, ha upéi opavave angaipáre. Jesús oñekuave’ẽ ha’ete voi, peteĩ jevýnte ha tapia guarãma. Moisés rembiapoukapy niko omoĩ Pa’i Guasu ramo yvypóra iporãmba’ỹvape.

Ha Tupã Ñandejára Ñe’ẽ me’ẽngue katu, oñeme’ẽ va’ekue tembiapoukapy rire, omoĩ Pa’i Guasu ramo Ta’ýrape, iporã añetéva opa ára guarã.

Pe mba’e guasuvéva opa ja’éva apytépe niko, jarekoha peteĩ Pa’i Guasu ijojaha’ỹva, oĩva yvágape Tupã Ñandejára guapyha akatúape. Ha omba’apo pa’i ramo Tupã Ñandejára rekoha itépe, omopu’ã va’ekue Tupã Ñandejára, ha ndaha’éi yvypóra.

Pa’i Guasu kuéra oñemoĩ ogueraha haguã kuave’ẽmby ha mymbajuka, ha upévare tekotevẽ Jesucristo oguereko avei oikuave’ẽ va’erã.

Ha’e oĩ rire ramo ko yvy ári, ndaha’éi va’erã mo’ã pa’i. Ko’ápe niko oĩma voi pa’i ogueraháva kuave’ẽmby Moisés rembiapoukapy he’i háicha. Umíva umi pa’i ojapóva niko ta’ãngánte umi mba’e yvága pegua rovái. Ha jaikuaa umíva ta’ãngánteha, ñane mandu’águi Moisés ojapóta ramo guare Jotopa Róga,

Tupã Ñandejára he’i hague ichupe: “Ema’ẽ porã, ha ejapo opa mba’e ahechauka haguéicha ndéve yvytýpe.” Pe ñande Pa’i Guasu katu, oñeme’ẽ hague peteĩ pa’i reko iporãvéva, oñe’ẽ ñande rehehápe oiko haguã peteĩ ñe’ẽ ñome’ẽ iporãvéva, oikuave’ëva hetave mba’e porã.

Tupã Ñandejára Ñe’ẽ.

SALMO ÑEMBOHOVÁI 39, 7-10. 17

Opavave: Nde pópe añemoĩ, ajapo haguã ne rembipota

Rejerure rangue mymba juka ha mba’e kuave’ẽ, térã mymba hapy tembiapo vai jeheja reirã,

hendaguépe reju che resape’a. Upévare ha’e ndéve: “Nde pópe añemoĩ.” O.

Ne rembiapoukapýpe he’íma voi umi mba’e che ajapo va’erã.

Tupã che Jára, nde reipotávante niko che aipota, ne rembiapoukapy areko che ágã ruguápe. O.

Amombe’u vy’apópe ne reko joja, maymave tapicha aty renondépe nde reikuaa akirirĩ rangue, opavavépe aikuaauka hague Tupã Ñandejára nde reikuaa porã. O.

Umi ne momba’éva katu tovy’a, maymave yvypóra ndéve nde rekáva akóinte te’i umi nde rehe ojekóva: “Ajépa imba’e porãite Ñandejára”. O.

ALELUIA  Cf. 2Tim  1, 10b

Aleluia.

Ñandejára Jesucristo ñane Pysyröhára ipu’aka manóre ha ombojajái tekove, Marandu porä rehe ae.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha    3,7-12

Upe ramo Jesús ha hemimbo’e kuéra heta Galileagua ndive oho yguasu rembe’ýpe. Oikuaávo umi mba’e ojapóva, oho hendápe heta Judeagua, Jerusalén, Idumea, Jordángui kuarahy resẽvo, Tiro ha Sidón pegua.

Upévare Jesús he’i hemimbo’ekuérape ogueru haguã ichupe peteĩ yga, ani haguã upe aty guasu ojopypa ichupe. Omonguera haguére hetápe, umi hasýva ojeitypa hi’ári opoko haguã hese. Ha umi mba’epochy ohechávo ichupe oñesũ henondépe ha osapukái: Nde hína Tupã ra’y! Jesús he’i ichupekuéra ani haguã imandu’a hese avave renondépe.

Ñandejára Jesucristo Ñe’ẽ