LECTURAS: VIERNES 2° DURANTE EL AÑO

LECTURAS: VIERNES 2° DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Hebreos guápe    8,6-13

Che pehẽnguekuéra: Pe ñande Pa’i Guasu katu, oñeme’ẽ hague peteĩ pa’i reko iporãvéva, oñe’ẽ ñande rehehápe oiko haguã peteĩ ñe’ẽ ñome’ẽ iporãvéva, oikuave’ẽva hetave mba’e porã.

Ñe’ẽ me’ẽ tenonde guare iporãmbaite rire, natekotevẽi va’erã mo’ã peteĩ ipyahúva. Tupã Ñandejára katu ojuhu yvypórape ndaheko porãmbaiha, ha he’i:

“Jesús he’i: ‘Oúne ára ajapotaha ñe’ẽ ñome’ẽ ipyahúva Israel ha Judá ndive.

Ko ñe’ẽ ñome’ẽ ndaha’e mo’ãi pe túva kuéra ypykuerakue ndive ajapo va’ekueichagua, ipógui aipyhy ramo guare anohẽ haguã Egíptogui.

Ha ha’ekuéra ndojapóigui ame’ẽ haguéicha ichupekuéra che ñe’ẽ, aheja rei ichupekuéra,’péicha he’i Tupä Ñandejára.

Ñe’ẽ me’ẽ ajapótáva Israel ndive umíva umi ára ohasa rire, kóvata, he’i Tupã Ñandejára: Che rembiapoukapy amoĩta iñapytu’ũmenguéra, ha ahaíta ipy’áre.

Che aikóta Tupã Ñandejára ichupe guarã, ha ha’ekuéra che retãguáta.

Natekotevẽ mo’ã véima oñombo’e oñohetãguáva téra ojohogaguáva Tupä Ñandejárape oikuaa haguã.

Opavave che kuaáta, michĩvéva guive tuichavéva peve.

Che aheja reíta ichupe kuéra heko añangue eta, ha na che mandu’a mo’ã véima iñangaipakue etáre.”

Tupã Ñandejára oñe’ẽ ramo peteẽ ñe’ẽ me’ẽ ipyahúvare, he’ise oguerekomaha itujáva ramo pe tenonde guare. Ha pe itujávape, sa’íma hembyve opaite haguã.

Tupã Ñandejára Ñe’ẽ.

SALMO ÑEMBOHOVÁI  84, 8. 10-14

Opavave: Py’aguapy ha teko joja oñoañuáne

Ore Jára, ore poriahuverekokena ha ore renohẽ jejopyvaígui.

Hi’aguĩ ára ha’e oguenohẽ haguã jejopyvaígui umi ichupe omomba’évape. O.

Tupã Ñandejára, nde reko mimbipa ojekuaáne ore yvýpe,

Mborayhu ha Añete oñuguãitĩne, py’aguapy ha teko joja oñoañuáne,

añete heñóine upe yvýgui teko joja yvágagui oma’ẽne. O.

Tupã Ñandejára, ha’ete voi ome’ẽta ñandéve iporãva, ha ko ñande yvy ome’ẽta hi’a.

Tekojoja ohóne henonderã, ombosako’ívo ichupe haperã. P.

ALELUIA  2Cor 5, 19

Aleluia.

Tupã Ñandejára oï va’ekue Ñandejára Jesucristo ryepýpe omoingo porä jevývo yvypóra hendive, ñene mbojerovia ome’ëvo ñandéve ñe’ë oporomoingo porä jevýva.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha    3, 13-19

Upe ramo Jesús ojupi peteĩ yvytýpe ha ohenói umi ohenoise va’ekuépe. Oñemboaty rire, oiporavo 12 ijapytéguikuéra, omoirũ haguã ichupe ha omondo haguã omoerakuãvo iñe’ẽ. Ko’ãvape ombohéra apóstol, ha ome’ẽ ichupe kuéra pokatu omosẽ haguã umi Añáme.

Ko’ãva hína umi 12 ha’e oiporavo va’ekue: Simón, ha’e ombohéra va’ekue Pedro, Zebedeo ra’ykuéra Santiago ha ityvýra Juan, umívape ha’e ombohéra Boanerges, Andrés, Felipe, Bartolomé. Mateo, Tomás ha Alfeo ra’y Santiago, Tadeo, Simón hetã rayhúva, ha Judas Iscariote, pe upéi omoñuhã va’ekue Jesúspe.

Ñandejára Jesucristo Ñe’ẽ