LECTURAS DOMINGO 3º TIEMPO DURANTE EL AÑO

LECTURAS DOMINGO 3º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Nehemías arandukápe oĩ háicha 8, 2-4a. 5-6. 8-10

Upérõ Esdras ogueru pe kuatia tembiapoukapy ryru oñembyaty hápe opa karai, kuñakarai ha mitã guasukuéra, Ha pyhareve guive asaje peve ohenduka ichupekuéra umi tembiapoukapy, pe plásape oĩva okẽ hérava Y rovái. Opavave ojapysaka porã umi mba’e ohendúvare.

Yvyrágui ojapo hikuái Ésdraspe ipyendarã, ha upéva ári ojupi oñe’ẽ haguã. Esdras oĩ yvateve opavavégui. Ha oipe’ávo pe kuatia maymáva renondépe, opu’ã mbaite oñembo’y hikuái.

Esdras omo mba’e guasúvo Ñandejára, Tupã Ipu’akapávape maymáva ohupi ipo yvága gotyo he’ívo “Ta upéicha, ta upéicha”.
Upéi oñesũ hikuái, omboja isyva yvy rehe, ha omomba’e guasu Tupãme. Opa mba’e oje’éva Tupã rembiapoukapýpe hatã he’i hikuái maymáva ohendu haguã ha upéi omyesakã ichupekuéra iñe’ẽme.

Ohendúvo umi Tupã rembiapoukapy, hasẽmba hikuái. Upe ramo mburuvicha Nehemías, pa’i Esdras ha umi levíta omyesakãva ichupekuéra Tupã rembiapoukapy he’i chupekuéra: “Kóva ko ára niko ñamboyke Tupãme guarã. Ani peñembyasy térã pene rasẽtei. Ta peho pende rógape pe’u so’o kyra ha víno porã, ha umi oguereko’ỹvape katu pehupytyuka pene mba’évagui. Kóva ko ára niko Tupãme guarã ñamboyke ñaína. Ani peñe mbyasýtei. Tupã ñambovy’ávo ñande ñane mombarete”.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 18, 8-10. 15

Opavave: Ñandejára ne ñe’ẽ ningo tekovete ha pytu marangatu.

Tupã rembiapoukapy ndaijojahai, ñane mbopy’a rory. Tupã rembiapoukapy ijeroviaha,
omoarandu oikuaa’ỹvape. O.

Tupã rembiapoukapy oĩ hekoitépe, ñane mbovy’a. Tupã rembiapoukapy hesakã,
ñande resape’a. O.

Tupã ñe’ẽ ipotĩ ha nda hekoviái. Tupã rembiapoukapy ijeroviaha,
opavave oĩ hekoitépe. O.

Toguahẽ porãite ne rendápe, ñe’ẽ osẽva che jurúgui ha arekóva che py’a pýpe,
che Jára che mo’ã ha che renohẽva jejopy vaígui. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteĩháme Corinto guápe 12, 12-30

Che pehenguekuéra: Yvypóra rete niko, jepe heta ipehẽ, peteĩnte. Upéicha avei Cristo. Ha upeichaite avei opavave ñande, judío térã judio’ỹva, tembiguái térã tembiguai’ỹva, ñañe mongarai va’ekue jaiko haguã peteĩ tete ramo, peteĩ Espíritu año rupi. Ha oñeme’ẽ opa
ñandéve jay’u haguã upéva upe Espíritugui.

Ñande rete niko ndoikói peteĩ mba’éguinte, oiko heta mba’égui. Ñande py he’i ramo: “Ndaha’éi gui po, ndaha’éi tete rehegua”. upéva rehénte ndaha’e’ỹ mo’ã véima ñande rete rehegua. Ha ñane nambi he’i ramo: “Che nda ha’éi gui tesa, nda ha’éi tete rehegua”. Upéva
rehente ndaha’e’ỹmo’ã véima ñande rete rehegua.

Ñande rete tuichakue tesánte ramo, ndaikatu mo’ãi ñahendu. Ha ñande rete tuichakue apysánte ramo, ndaikatu mo’ãi ñahetũ. Tupã katu omoĩ va’ekue opa mba’e ñande rete rehegua mamo ojuhu porãvehápe. Peteĩ mba’énte rire, na ñande retéi va’erã mo’ã. Añetegua ja’étarõ,
heta mba’égui oiko ramo jepe, ñande rete peteĩnte.

Ñande resa ndaikatúi he’ívo ñande pópe: “Naikotevẽi nde rehe”. Ha ñane akã avei ndaikatúi he’ívo ñande py kuérape: “Naikotevẽi pende rehe”.

Upéva rangue katu, umi ñande rete rehegua ikangyvéva vaicha, umíva hína umi oikotevẽvéva ojuehe. Ha umi ñande rete rehegua jahayhu’ỹvéva, ñamonde porãve. Ha umi ivaivéva ramo jarekóva, ñañangareko porãve hese, natekotevẽiva jajapo umi iporãvévare.

Ñandejára ojapo ñande rete, ku oñemo mba’e’ỹvévape oñembojeroviave haguã, ani haguã oĩ joaju’ỹ ñande retépe, opavave hesegua katu ojepy’apy haguã ojuehe. Peteĩ ñande rete rehegua ohasa asy ramo, opavave hembýva ohasa asy avei. Ha peteïvare oñe ñangareko porã ramo, opavave ambue ovy’a hendive.

Néi, peẽ niko hína pe Cristo rete, ha peteĩ teĩ peẽ, umi hete rehegua oguerekóva ojapo va’erã. Tupã oipota va’ekue heroviaha apytépe oĩ, tenondete, apóstolkuéra. Mokõiháme, proféta.

Mbohapyhápe, Mbo’ehára. Upéi yvypóra ojapóva mba’e hechapyrãva, ha ambue oporo mongueráva, térã oporo pytyvõva, térã oporo sãmbyhýva, térã oñe’ẽva ñe’ẽ ojekuaa’ỹvape. Nda opavavéi apóstol, ha nda opavavéi avei proféta.

Nda opavavéi mbo’ehára ha nda opavavéi ojapo mba’e hechapyrãva, nda opavavéi ipokatu omonguera haguã hasývape. Nda opavavéi avei oñe’ẽ ñe’ẽ ojekuaa’ỹvape, ha nda opavavéi ikatu omyesakã umi ñe’ẽ umíva.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Lc 4, 18
Aleluia.
Ñandejára Espíritu oĩ che ári, chéve niko che poravo araha haguã marandu porã opa imboriahúvape, che mbou aipe’ávo jejopýgui umi oiméva kárselpe ha ahesape’ávo ohecha’ỹvape; apoívo opa ojejopývagui,
Aleluia.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 1, 1-4; 4, 14-21

Opavave: Romomba’e guasu ndéve, Ñandejára.

Hetáma niko umi oñeha’ã vaekue omoĩ kuatiápe opa umi mba’e ojehu vaekue ore apytépe. Umíva umi mba’e omombe’u oréve umi Jesús ndive oiko vaekue, ha ohecha va’ekue umi mba’e ojapóva iñepyrũmby guive.

Che avei, karai Teófilo, añamindu’u heta rire ko’ã mba’ére, hi’ãnte chéve ambohysýi ndéve kuatiápe ko’ã mba’e. Péicharõ reikuaa porãta añetépa hína umi mba’e ndéve oñemombe’u va’ekue.

Jesús katu oho jey Galiléape, henyhẽ Espíritu Sántogui. Ombo’e oikóvo tupao rupi ha maymáva oguerohory chupe. Opa rupi herakuã. Jesús oho Nazarétpe, upe okakuaa haguépe. Ha pytu’uha árape, ojapo háicha jepi voi, oho tupaópe.

Oñembo’y omoñe’ẽ haguã Ñandejára Ñe’ẽ, ha ome’ẽ chupe hikuái proféta Isaías kuatia. Ha oipe’ávo ojuhu he’ihápe: Ñandejára Espíritu ou chéve.

Che poravo haguére araha haguã marandu porã opa imboriahúvape. Chéve che mbou aipe’ávo jejopýgui umi préso oĩvape,
ahesape’ávo umi ohecha’ỹvape, ha ajorávo opa ohasa asýva. Ha amyerakuã haguã «Oguãhẽmaha ára Ñandejára ñande salva haguã».

Upéi katu Jesús omboty pe kuatia, ombohasa jey pe ome’ẽ va’ekuépe chupe, ha oguapy. Ha oñemañamba joa hese.

Upéi oñe’ẽ ha he’i:— Péina ko’ágã ou ojehu upe pehendu va’ekue.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesukrísto.