Ñahendu Hesu. Sábado 3º de Paskua

Escucha el evangelio y la reflexión en: https://youtu.be/fa3bbxoz3JA

SABADO 3º PÁSKUA

San Juan 6, 60 – 69

Upérõ heta oĩ Jesús disípulokuéra apytépe ohendúva umi mba’e Jesús ombo’e va’ekue.
Osẽ he’i hikuái: — Ko’ã mba’e he’íva niko ijetu’u etereíma. Mávaiko openáta hese.

Jesús ohecha kuaa ndo’aporãiha umi mba’e he’íva idisípulokuéra apytépe. Upévare he’i chupekuéra: — Ko’ã mba’ére piko pembopo’ise. Mba’e pejapóne che rechárõ ajupi jey ramo yvágape aju haguégui.

Ñandejára Espíritu niko pe ñane moingovéva, ñande ro’o katu naiporãi mba’everã. Opa umi mba’e che amombe’úva peẽme niko ogueru peẽme Ñandejára Espíritu ñane moingovéva. Oĩ jepe gueteri pende apytépe ndogueroviáiva umi mba’e che ha’éva.

Iñepyrũmby guive voi niko, Jesús oikuaa vaekue máva-mávapa umi ndojerovia mo’ãiva hese. Oikuaa ave mávatapa hína upe otraisionátava chupe. Upéi katu he’i chupekuéra:— Upévare niko che ha’e peẽme, avave ndou mo’ãiha che rendápe, ndohejái ramo chupe che Ru.

Upe guive, heta oĩ umi hendive oiko va’ekue ombopo’íva, ha ndoikovéi hendive. Jesús oporandu umi 12 idisípulokuérape: — Peẽiko pehopáta avei.

Simón Pedro he’i chupe: — Maéstro, máva rendápe nga’u piko rohóta. Ne ñe’ẽ niko ñane moingove. Ore niko roguerovia umi mba’e eréva, ha roikuaa ndeha hína Ñandejára ra’y marangatu.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Jaiko porãse ningo ñande rapichakuéra ndive. Hi’ã ñandéve opavave ñande rayhu ha oñe’ẽ porã ñande rehe. Opáichavo jaikuaa upéva hasyha.

Jahecha peteĩvape ogustáva ambuépe naiporãi, peteĩvape añetéva ambuépe japu. Ha péicha jaiko, nañame’ẽi gusto opavavépe, he’i háicha ñe’ẽ.

Hesu rapykuéri oho heta tapicha ohecháva umi mba’e hechapyrãva ha milágro ojapóva. Omongaru rire hetápe ou joa hapykuéri hikuái, ojaposéma chugui mburuvicha.

Upépe Hesu he’i chupe kuéra ani haguã iñakã tarova tembi’úre, oheka haguã upe Ñandejára rembipota. Hesu he’i chupe kuéra ojerovia haguã hese, ha’e ome’ẽtaha pe tembi’u añete ha’éva hete. Upe ñe’ẽ ipohýi chupe kuéra. Oiméma ojetyvyro ha oñepyrũva ojeheja ichugui.

Hesu ojapose Túva Ñandejára rembipota, ha’e omombe’u pe Tupã ombo’éva chupe.Upévare oime ramo jepe ipochýva hendive ha ojehejáva ichugui, ha’e ndoguevíri. Ha oporandu umi apóstol-pe ojehejasépa chugui avei hikuái.

Mba’etekópa che reindy ha nde che irũ, Hesu oporandu ramo ñandéve: Pejehejasépa che hegui peẽ avei. Erénepa nde ave upe Pedro he’i haguéicha Hesúpe: Ñandejára, máva rendápe piko aháta roheja ramo. Ne ñe’ẽ niko pe chemoingovéva, che ajerovia nde rehe.

Pa’i Alberto Luna.