Ñahendu Hesu. Domingo Semana 25° TO

Escucha el evangelio y la reflexión en: https://youtu.be/sf59eI4PuW8

Domingo 25a TO Ciclo A                     

                                Mateo  19, 30 – 20,16

Upérõ Jesús he’i idisípulo kuérape:Heta umi ko’ág̃a itapykuéva, tenondete oguapýta. Ha umi ko’ág̃a itenondéva, itapykuéta. Pe Ñandejára Réino niko ojogua ku kokue járape osẽva pyharevete ohekávo omba’apo vaerãva chupe. Oñemoĩ rire hikuái peteĩ ñe’ẽme mboýrepa omba’apóta hikuái chupe, omondo chupekuéra ikokuépe. Asajeve katu osẽ jey hógagui, ha ojuhu jey omba’aposéva.

He’i chupekuéra, “Tapeho pemba’apo che kokuépe, ha hekópe apagáta peẽme”. Ha oho hikuái. Pe asajepytévo katu, pe óga jára osẽ jey voi, ha ka’aru asajévo péichante avei ojapo.

Ha omondo ikokuépe opa umi omba’aposéva. Upéi ka’aruete katu, osẽ jey voi ha ojuhu oĩ reíva hína. He’i chupekuéra “Mba’éreiko peñembo’y joa hína ko’ápe pemba’apo rangue mba’e.” He’i chupe hikuái, “Ha ndorojuhúi niko avave ore momba’aposéva.” Osẽ he’i pe karai chupekuéra, “Tapeho pemba’apo che yvýpe.” Ka’aru pytũvoma pe kokue jára he’i ikapatápe, “Ehenói opavavépe ha epaga chupekuéra hembiapóre. Eñepyrũta epaga umi tapykue oho vaekuépe, ha ipahávo katu umi tenonde oho vaekuépe.”

Ha oñemboja umi ka’aruete oike vaekue, ha ojepaga chupekuéra ku pyharevete oñepyrũrõ guaréicha hikuái. Upéi katu, oñemboja umi pyhareve oike vaekue, ha oimo’ã ojepagavetaha chupekuéra. Ha peteĩchante ojepagapa opavavépe.

Ha ojepagávo chupekuéra, oñepyrũ ipochy pe óga jára ndive. He’i chupe, “Umi ka’aru oho vaekue niko sapy’amínte omba’apo ha repaga chupekuéra oréveicha. Ore katu, kuarahy resẽ guive kuarahy reike peve ore ry’ái pe kuarahy akúpe.”

Pe óga jára katu osẽ he’i chupekuéra, “Che irũ, mba’e ivaíva piko ajapo nde rehe. Ndajapytái nga’u piko ra’e mboýpa apagáta kuri ndéve. Oñeme’ẽma niko ndéve nerembiapo repykue. Terehóntema nde rógape. Che ame’ẽsérõ umi tapykue oike vaekuépe ndéve ame’ẽháicha piko mba’e ndéve. Che niko ajaposéva ajapo kuaa che plátagui. Ha piko nde pochýta che ndive, che mba’e porã haguére.”

Upéi osẽ he’i Jesús, “Ha péicha, umi ko’ág̃a itenondéva itapykuéta, ha umi itapykuéva itenondéta.”

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE

Ñandejára ndaje okorre ojeporeka, ohenói otopávape omba’apo haguã ikokuépe. Péva ha’e ñande Iglesia, parroquia, capilla, movimiento, congregación, hamba’e. Ha oĩ niko yma guive voi oikóva tupaópe, karai, kuñakarai guasu, pa’i, obispo, hermana. Oime ipyahuvéva, ha oike ramoitéva. Umívape ñamotenonde ha ñambojeroviave va’erã. Umi ymave guive omba’apóva ningo ijeheguivéma, ijyvéma, ikatu oha’arõ. Ndaha’evéima oikotevẽtereíva ñaguerochichĩ.

ÑAÑEMBO’E OÑONDIVE

Ñandejára Hesukrísto, orerenóiva romba’apo haguã nendive. Ore pytyvõ kena roñeha’ã mbaite haguã ore rapicha ykére. Ha emyengoviávo peteĩ-teĩme nde reipota háicha, toropyta py’aguapýpe ore rapicha kuéra ndive ha nendive avei. Amén.

Pa’i Jasy.