Ñahendu Jesús Ñe’ẽ. Domingo 4º Pascua

Escucha el evangelio y la reflexión en: https://youtu.be/HGYvjbyJOBU

DOMINGO 4º Pascua

Juan 10, 11 – 18

Upe ramo Jesús he’i: Chéko hína pe ovecha rerekua imba’e porãva. Pe ovecha rerekua imba’e porãva niko oĩ ome’ẽ haguãicha hekove ijovecháre.

Umi plátare omba’apóva katu, ohechávo aguara guasu ouha ijovechakuérape, odipara ha okañy. Péicha ojapo umi ovecha ndaha’éigui imba’e. Pe aguara guasu ojeity umi ovecha apytépe ha omosarambi opa rupi. Umi plátare omba’apóvape niko mba’evete chupekuéra umi ovecha.

Chéko hína pe ovecha rerekua imba’e porãva. Che ru chéve che kuaaháicha, che aikuaa chupe. Péicha avei, che aikuaaháicha che ovecha, ha’e kuéra che kuaa chéve. Che aime ame’ẽ haguã che rekove hesekuéra. Oime jepéko areko avei ambue ovecha, ndaha’éiva kóva ko korapegua.

Umíva avei niko ambyatypa vaerã, ha ha’e kuéra ohendúne che ñe’ẽ. Oupáne hikuái oiko peteĩ atýpente ha peteĩnte herekuáne.

Che ru che rayhu aimégui ame’ẽ haguã che rekove, upéi aikove jey haguã. Avave ndaikatúi oipe’a chehegui che rekove, upéva che ame’ẽva che jehegui. Che ñónte pe ikatúva ame’ẽ, ha chéve jeýnte ija aikove jey haguã. Péicha che ru he’i chéve ajapo haguã.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Ko domingo irundyha, 4º Páskua rire, niko ñanemandu’a hína mba’éichapa Hesu he’i ha’eha upe ovecháre oñangarekóva imba’eporãva. Buen Pastor, oje’éva. Ha he’i ñande rehe jaikóva hapykuéri, ha’eha ijovecha kuéraicha, ha’e ohayhúva, odefendéva ha oiméva voi ome’ẽ haguã hekove ñande rehe.

Ko árape avei ñande Iglésia Paraguái guápe ha’e Obispo kuéra ára. Ha’ekuéra oñemoĩgui oñangareko haguã opavave rehe ñande Iglésiape jaguatáva Hesu ndive. Ha avei ñande Iglésiape ko ára jajerure hína Ñandejárape ohenói ha ombouve haguã ñandéve oñangarekóva hapicháre, pa’i, diákono, hermana, religiosorã, celebrador ha mba’e.

Jesús niko oipota oiko opavavéva ñande hegui ha’éicha, Buen Pastor. Ha ndaha’éi obispo térã pa’i añónte oiméva upevarã. Opavavépe Hesu ñanerenói ñañangareko ha ñamoirũ haguã ñande rapicha, hekovépe ha Ñandejára rapére.

Ani oiko ñande rehe upe he’íva Hesu. Oĩha ovecha ñangarekoha ndojapóiva hekópe hembiapo, noma’ẽi ha ndoikóiva hapichakuéra rehe. Ijupe guarãnte oheka, ipláta pota, oipota oñeguerochichĩ, oñemomba’e guasu, ha’e he’ívánte toiko. Oime voi ijarhél ha ipohýiva. Ha umíva káusa, he’i, oúvo aguara guasu -Aña rymba- sarambikue ojapo, ombodiparapa ovechakuéra.

ÑAÑEMBO’E OÑONDIVE

Ñandejára Hesukrísto, eñangareko ha ema’ẽva ore rehe, ha ore rayhúgui eme’ẽva nde rekove. Ehovasa kena ore Obíspo pe. Ndéicha kena toiko omoirũvo opavavépe ñande Iglésiape.

Embouve avei oréve kuimba’e ha kuña oñemoĩséva ndéicha oservi hapichápe. Ha orembo’e ore avei péicha roiko haguã. Amén.

Pa’i Alberto Luna.