LECTURAS MARTES XI DEL TIEMPO ORDINARIO

LECTURAS MARTES XI DEL TIEMPO ORDINARIO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue mokõiha Corintos guápe    8, 1-9

Che pehẽnguekuéra:

Ko’ágã amombe’use peẽme mba’éichapa ojechauka Tupã Ñandejára py’a porã Macedoniagua, Jesucristo iglésiape. Ohasa asyve ramo jepe, ovy’a. Ha imboriahuve ramo jepe, ome’ẽ oguereko heta ramo guáicha. Che aikuaa ome’ẽ hague hikuái ipy’a ite guive, ikatu haguéicha.

Ha hetave ikatúvagui ome’ẽ hague. Ijehegui kuéra, ojerure jevy jevy chéve aheja haguã ichupekuéra oike avei Jesucristo reroviaha kuéra Jerusalengua ñepytyvõrãme. Ha hetave pe aha’arõ va’ekuégui ojapo hikuái.

Oñeme’ẽ niko hikuái Ñandejárape raẽ ha upéi chéve, Tupã Ñandejára oipota háicha. Upévare ajerure va’ekue Títope omboaty haguã pende apytépe ko tupãmba’e ha’e oñepyrũma va’ekue omboaty.

Peẽ niko pene tenonde opa mba’épe: jeroviápe, ñe’ẽ kuaápe, mba’e kuaápe, kyre’ỹme pejejokuaika haguã, ha mborayhúpe pe che ahechauka va’ekue peẽme.

Upéicha avei penetenonde va’erã ko tupãmba’e me’ẽme. Che nda’éi katu ete peẽme pejapo haguã che ha’éva. Aipotánte peikuaa mba’éichapa ambuekuéra ikyre’ỹ, ija haguã avei peẽme pehechaukávo pehayhu añeteha pende rapichápe.

Peikuaáma niko Ñandejára Jesucristo, pende rayhupápe, mba’e rerekoha ramo jepe, oñemomboriahu hague, ikatu haguã oiko pende hegui mba’eta rerekoha imboriahukue rupi.

Tupã Ñandejára Ñe’ẽ.

SALMO ÑEMBOHOVÁI 145, 2. 5-9a

Opavave: Aikove aja amomba’e guasúta Tupã Ñandejárape,

Aikove aja amomba’e guasúta Tupä Ñandejárape,

che rekove pukukue apurahéita Tupä Ñandejárape. O.

Ovy’a va’erã upe Jacob Tupã oipytyvõvape,

upe ojeroviáva Tupã Ñandejára rehe;

Tupä Ñandejára upe ojapo va’ekue yvága ha yvy,

yguasu ha opa mba’e ipype oĩva. O.

Ha’e niko nopyrũiva iñe’ẽre.

Oñemoí uvei ojejopy vaíva ykére,

ha omongaru iñembyahýivape.

Tupã Ñandejára opoi umi iñapytĩmby ojererekóvagui. O.

Tupã Ñandejára oheja umi ohecha’ỹvape ohecha jevy,

Tupã Ñandejára omopu’ã umi ikangývape,

Tupã Ñandejára ohayhu umi heko jojávape,

Tupã Ñandejára oñangareko umi mombyry guáre. O.

ALELUIA Jn 13, 34

Aleluia.

Ñandejára Jesucristo he’i: “Che ame’ẽ peẽme tembiapoukapy ipyahúva:

pejoayhu va’erã peteĩva ambuéndi. Che pohayhu háicha”.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha        5, 43-48

Upe ramo Jesús he’i hemimbo’ekuérape:

Peẽ peikuaa avei oje’e hague: “Ehayhu nde rayhúvape, ha na nde a’éi va’erã nde rayhu’ũvare.” Che katu ha’e peẽme: “Pehayhu umi pende rayhu’ỹvape, ha peñembo’e umi pene mbohasa asývare.

Péicharõ peẽ pehechaukáta pejoguaha pende Ru yvágape guápe. Ha’e niko oheja kuarahy ojope peteĩcha iñaña ha imarangatúvape guarã, ha ogueru ama hembiapo porã ha hembiapo vaívape guarã. Mba’éicha piko Tupã Ñandejára omoengoviáta peẽme, peẽ pehayhúrõ umi pende rayhúvapente?

Umi viru ombyatýva táva Romape guarã jepe niko péicha oiko. Ha peẽ peñe’ẽrõ umi peikuaáva pente, piko mba’e iporãva oĩ upévape? Umi Tupã Ñandejárare ojerovia’ỹva jepe niko péicha ojapo. Pene marangatúke peẽ, pende Ru yvágape oĩva imarangatu háicha.”

Ñandejára Jesucristo Ñe’ẽ