Ñahendu Hesu. Domingo 11ª Tiempo Durante el Año

Escucha el evangelio y la reflexión en: https://youtu.be/avwfZxMMZBE

Domingo 11ª TDA Ciclo B

Marcos 4, 26 – 34

Heta ijaty ohendu haguã Jesúspe. Ha’e he’i chupekuéra: “Ñandejára Rréinope ojehu, ojehuháicha peteĩ kuimba’e oñemitỹva’ekuépe. Ha’e okérõ térã ipáype, pyhare térã arakue,
pe semílla heñói ha okakuaa, ha’e oikuaa’ỹre mba’éichapa.

Pe yvýgui niko ijehegui voi heñói raẽ upéi hakã ha upéi heta hi’a. Ha umíva hi’ajúvo oñembyaty, oguahẽmagui mono’õha ára.” He’i avei Jesús: Mba’épepa ojogua Ñandejára Réino? Mba’épepa ñambojojáta?

Ojogua ku mostása ra’ỹime oñeñotỹva. Mostása ra’ỹigui michĩvéva niko ndaipóri. Oñeñotỹvo
katu okakuaave opa mba’e kokuépe opu’ãvagui, ha guyrakuéra jepe ou ojaitypo umi hakãre.

Upéicha Jesús oñemoñe’ẽ chupekuéra heta mbojoja ko’ãichagua rupi, ikatu haguã oike iñakãmenguéra. Ha mba’eve nde’íri chupekuéra mbojoja oiporu’ỹre. Idisípulo kuérape katu omyesakã opa mba’e upe rire.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Ahecha’i eterei kóa. He’i ningo lo mitã. Péicha ñande recháramo tembiapo sa’i sa’ípe ñaimeha.

Oĩ katu he’íva: Rejeheka’i eterei ningo chamigo. Ha péicha avei ikatu ñande voi jaju ñapensa ndajajapói haguére tembiapo tuicháva ha mba’e guasu ojekuaa ha oñemomba’éva, mba’eve vaicha gua’u nañamboapu’ái. Ha ipahápe ikatu jaju ñanekangy ha jahejaséma upe sa’i sa’ípe jajapóva jahávo.

Hesu katu he’i pe Ñandejára Rréino ojoguaha peteĩ semíllape. Ñande ñañotỹva yvy guýpe, ha
opytáva oñeñomi upépe. Avave ndohechái. Ha ñande jake ha japáyramo jepe ha’e omba’apo hína ijehegui.

Heñói ha okakuaa, ha upéi itiémpope hi’a. Upéicha avei umi mba’e porã ñande jajapóva, opyta ñande rapicha rekovépe, oñeñotỹ ikorasõme. Ha ñande ndajahecháiramo jepe, umíva omba’apo avei ijehegui hekovépe ha osẽta avei ichugui hetave mba’e porã itiémpope.

Ipahápe katu Hesu he’i pe Ñandejára Rréino ojoguaha mostása ra’ỹime. Ha la móstasa ra’ỹigui michĩvéva niko ndaipóri. Haimete ndojekuaái voi, ni sínko nañame’ẽi hese.

Ipahápe katu ou oiko ichugui peteĩ yvyra máta heta guyra ou hápe ojaitypo. Péicha niko Hesu he’i ñandéve hína che reindy ha nde che irũ, ndaiporiha tembiapo sa’i jajapóva Ñandejára rérape ha ñande rapicha rayhupápe opyta rei va’erãva, michĩ ra’ymíramo jepe.

Umi ñe’ẽ, ñembo’e ha tembiapo ñande py’aite guive rejapóvagui heñóita hína itiémpope hetave mba’e porã.

ÑAÑEMBO’E OÑONDIVE

Ñandejára Hesukrísto, nde niko orerenói, orembyaty ha orejokuái roñemitỹ haguã rohóvo ne ñe’ẽ ha ne mborayhu ore rapichakuéra apytépe. Emoheñói ha emongakuaa kena umi semílla porã sa’i sa’ípe rohejáva rohóvo nde rérape. Amén.

Pa’i Alberto Luna.