LECTURAS JUEVES XI DEL TIEMPO ORDINARIO

LECTURAS JUEVES XI DEL TIEMPO ORDINARIO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue mokõiha Corintos guápe 11, 1-11

Che pehẽnguekuéra: Peheja mína ta che ta rova sapy’a ite. Ta ñe’ẽmi ita rova vaicha. Che rakate’ỹ etereíko pende rehe hakate’ỹ háicha Tupã Ñandejára. Che niko pome’ẽ va’ekue, peteĩ kuñataĩ imarã’ỹ vaicha, pemenda haguã peteĩre añónte, upéva hína Cristo.

Opáichavo, mbói ombotavy haguéicha Évape, akyhyje avei peẽme pene mbotavýrõ guarã, ha oipe’a pende py’águi pe mborayhu añetegua ha imarã’ỹva peñandúva Crístore. Peẽ pehendu vy’apópe, oimeraẽvape oñe’ẽ ramo peẽme peteĩ Jesús rehe, nda ha’éiva upe che amoerakuã va’ekue, térã perohory peteĩ espíritu ndaha’éiva upe pehupity va’ekue, térã peteĩ marandu porã nda ha’éiva upe perovia va’ekue.

Che katu, nañandúi che michĩveha mba’evépe umi peẽ perekóvagui “apóstol guasúrõ”. Nda che katupyrýi ramo jepe che ñe’ẽme, nda upéichai hína che mba’e kuaápe. Kóva ahechauka mante va’ekue peẽme opa che rembiapópe.

Oiménepa ra’e ajapo vai amoerakuãvo peẽme Tupã Ñandejára marandu porã ajerure’ỹre peëme mba’eve, añemomichĩvo che, pombotuicha haguã peëme? Aipe’a va’ekue viru ambue Jesucristo iglésiagui, heseve ikatu haguã aiko pene rembiguáirõ. Ha pende apytépe aiko aja naikotevẽi va’ekue che pohýi pene ndive peme’ẽ haguã chéve aikotevẽva.

Ñane pehẽngue kuéra ou va’ekue Macedóniagui niko ome’ẽ va’ekue chéve che remikotevẽrã. Añeha’ã va’ekue ani haguã che pohýi pene ndive, ha upéicha ajapóta ahávo. Aikuaa porã háicha nda javyiha ha’évo aikuaaha Cristo Ñe’ẽ, upéicha avei aikuaa porã ndaipóri mo’ãiha Acaya tuichakue oipe’áva che hegui ko vy’a arekóva. Mba’érepa añe’ẽ upéicha? Oiménepa nda pohayhúigui mba’e? Tupã Ñandejára oikuaa porã pohayhuha!

Tupã Ñandejára Ñe’ẽ.

SALMO ÑEMBOHOVÁI 110, 1-4. 7-8

Opavave: Tupã Ñandejára rembiapokue iporã ha omimbipa, ha’e heko joja opa ára.

Che py’aite guive arohory Tupã Ñandejárape,
aty guasu ha heko jojáva atyhápe.
Tuicháko hína umi Tupã Ñandejára rembiapokue,
ha umi oguerojepy’a mongeta hese. O.

Tupä Ñandejára rembiapokue iporã ha omimbipa,
ha’e heko joja opa ára.
Mba’e hechapyrãva ojapo
ha umívagui ndoikói tesarái. O.

Tupã Ñandejára ipy’a porã ha oporohecha kuaa.
Añete ha teko joja pegua meme hembiapokue,
hembiapoukapýre jajerovia kuaa.
Añete ha teko jojápe oñembohapo, na iñambuéi araka’eve. O.

ALELUIA Rm 8, 15bc

Aleluia.
Peẽ katu pehupity pe Espíritu ojapo pende hegui Tupã Ñandejára ra’y. Kóva ko Espíritu rehe ae ja’e Tupã Ñandejárape: “Háa che Ru!”
Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 6, 7-15

Upe ramo Jesús he’i hemimbo’ekuérape: Peñembo’e jave ani pene ñe’ẽ heta rei, ojapo háicha umi Tupã Ñandejárare ojerovia’ỹva. Ha’ekuéra niko oimo’ã oñe’ẽ heta haguére Tupã Ñandejára ohendutaha ichupekuéra.

Ani pejapo ha’ekuéra ojapo háicha. Pende Ru niko oikuaáma voi pene remikotevẽ, peẽ pejerure mboyve ichupe. Upévare, kóicha peñembo’e va’erã: “Ore Ru yvágape reiméva, to ñemomba’e nde réra marangatu. Eju ore sãmbyhy, to jejapo ne rembipota yvy ári yvágape guáicha.

Eme’ẽ oréve ore rembi’urã ko árape guarã. Eheja rei oréve ore rembiapo vaikue, ore roheja rei háicha opavave ore rehe ojapo vai va’ekuépe. Aníkena rehejátei rojepy’a ra’ã. Ore pe’a uvei ivaívagui”.

Peẽ peheja rei ramo pende rehe ojapo vaívapa, pende Ru yvágape oĩva oheja reíta avei peẽme ivaíva pejapo va’ekue hese. Ndapehejái rei ramo katu, umi pende rehe ojapo vaíva, pende Ru oĩva yvágape ndoheja rei mo’ãi peẽme pene angaipa.

Ñandejára Jesucristo Ñe’ẽ.