LECTURAS VIERNES XI DEL TIEMPO ORDINARIO

LECTURAS VIERNES XI DEL TIEMPO ORDINARIO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue mokõiha Corintos guápe 11, 18. 21b-30

Che pehẽngue kuéra:

Oĩ rupi heta ite oñembotuicháva imba’e porã nguérare, tañe mbotuichami mba’éna che ave.

Atĩrõ jepe ha’e haguã, che kangy eterei va’ekue ajapo haguã upéicha pende rehe!

Ambue kuéra hova atã ramo ojejapo haguã, ta che rova atã ha ta che tarovami che ave. Hebréo pako ha’e kuéra? Che avei. Israelgua pako? Che avei. Abraham ñemoñare? Che avei. Cristo rembiguái? Chéma katu, añe’ẽ ramo jepe itarova vaicha ha’évo péicha.

Amba’apove va’ekue ichuguikuéra, hetave añemoakãsã va’ekue ichuguikuéra, añenupãve va’ekue ichugui  kuéra, ha hetave jevy aime va’ekue amano haguãicha. Judíokuéra che nupã va’ekue 5 jevy, oity che apére 39 teju ruguái. Mbohapy jevy che nupã va’ekue yvyrápe ha peteĩ jevy che mbo’ita va’ekue.

Mbohapy jevy ho’yguy va’ekue yga che aha hague. Ha aimete ajahoga ahasávo peteĩ pyhare ha peteĩ ára pukukue yguasu mbytépe. Opa rupi aiko va’ekue heta jevy, ha vaípe ajecha va’ekue ysyry kuéra rupi, mondaha pa’ũme, che retãgua apytépe, mombyrygua pa’ũme. Vaípe ajecha va’ekue avei táva kuéra rupi, ñu rupi, yguasúpe, che pehẽngue gua’úva pa’ũme.

Heta tembiapo ha jehasa asy aropu’aka va’ekue. Heta jevy ahasa va’ekue ake’ỹre, arohasa va’ekue ñembyahýi ha y’uhéi. Heta jevy ndakarúi va’ekue, heta che ro’y ha che opívo va’ekue. Opa ko’ã mba’e ári, ára ko’ẽre ipohýi che apére jepy’apy opa Jesucristo reroviaháre. Oimérõ hasýva, che avei che rasy. Oimérõ hapichápe oitýva angaipápe, che pochy hendy. Tekotevẽta ramo añemomba’e guasu, ta ñemomba’e guasu umi mba’e ohechaukávare che kangyha.

Tupã Ñandejára Ñe’ẽ.

SALMO ÑEMBOHOVÁI  33, 2-7

Opavave: Ñandejárape oipe’apa che hegui umi mba’e che mongyhyjéva.

Amomba’e guasúta opa ára Tupã Ñandejárape,

ichupe aropurahéita tapiaite.

Tupã Ñandejára ombovy’a che rekove.

Imboriahúva tohendu ha tovy’a! O.

Oñondive ñamomba’e guasu Tupã Ñandejárape,

héra jaropurahéi oñondivepa.

Tupã Ñandejárape añembo’e, ha’e che rendu,

ha oipe’apa che hegui umi mba’e che mongyhyjéva. O.

Umi Tupã Ñandejára rehe ojeroviáva vy’águi ojajaipáne,

ha hova noñomi chéne ñemotĩgui.

Che, tekove poriahu, Tupã Ñandejárape añembo’e.

Ha’e, che rendu ha che pe’a jejopy vaígui. O.

ALELUIA Mt 5, 3

Aleluia.

Ovy’a ite va’erã umi heko mboriaihúva,

ichupe kuéra oñeme’ẽta Ñesambyhy Yvágagui oúva.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 6, 19-23

Upe ramo Jesús he’i hemimbo’ekuéra:

“Ani pemboaty mba’eta ko yvy ári, tigua’ã ho’upa hápe ha opa mba’e ituju hápe, ha mondaha oike hápe omonda haguã. Pemboaty uvei mba’e reta yvágape, tigua’ã ho’upa’ỹ háme ha opa mba’e ituju’ỹ háme, ha mondaha oike’ỹ háme omonda haguã. Pe oĩ háme ne mba’e reta, upépe avei remoĩta nde py’a.”

Ñande resa niko hína pe ñande rekove omoesakãva. Nde resa hesãi ramo, omoesakãta nde rekove. Nde resa nahesãi ramo katu, nde rekove iñipytũmbáta. Ha pe omoesakã va’erãva ndéve nde rekove iñypytũ ramo, piko mba’éicha iteve hypy’ũta ndéve pe pytũ.

Ñandejára Jesucristo Ñe’ẽ.