LECTURA SÁBADO XI DEL TIEMPO ORDINARIO

LECTURA SÁBADO XI DEL TIEMPO ORDINARIO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue mokõiha Corintos guápe 12, 1-10

Che pehẽnguekuéra: Mba’eve nañanohẽi ñañe’ẽ porãrõ ñande jehe. Opáichavo tekotevẽ añe’ẽ umi mba’e ahecha ha oikuaauka va’ekue chéve Tupä Ñandejára. Aikuaa peteĩ Cristo moirũhárape, ojapo 14 áño ojereraha hague yvága mbohapyhápe.

Ndaikuaái hetépepa térã ijespíritupe, upéva Tupã Ñandejára oikuaa. Ha aikuaa upe kuimba’épe (hetépepa térã ijespíritupe ndaikuaái, Tupã Ñandejára mante oikuaa), ojereraha hague vy’a rendápe ha upépe ohendu Ñe’ẽ ñemimby, avaveichagua yvypóra ikatu’ỹva omombe’u.

Upéichagua yvypórare ikatúne añembotuicha. Che jehe katu ndarekói mba’érepa añembotuichávo, ndaha’éi ramo che kangy haguére. Opáichavo, añembotuichase ramo, upéva ndaha’éi chéne itarováva rembiapo, añetegua vante. Upéicharõ jepe ndajaposéi, ani haguã avave che apo tuichave upe ohechávagui che rehe, térã ohendúvagui che hegui, ahecha ha ahendu haguére umi mba’e guasu etéva.

Upévare, ani haguã che voi aimo’ã che mba’e guasuveha pe ha’évagui, areko che retére peteĩ ñuatĩ che kutúva, Satana remimboúicha che rereko asýva. Mbohapy jevy ajerure va’ekue Tupä Ñandejárape oipe’a haguã che hegui ko jehasa asy. Tupä Ñandejára katu he’i chéve: “Che mborayhúnte upe reikotevẽva.

Che pokatu niko ojechaukapaite ne kangykuépe.” Aipórõ, añemomba’e guasuseve che kangýgui, oguapy haguã che ári Cristo pokatu. Ha avy’a avei che kangy ramo, ajeja’o ramo, aikotevẽ ramo, ojekaguai ramo che rehe, ha opaichagua hasýva arohasáva Cristo rehehápe. Che kangyve ramo niko añandu che mbareteveha.

Tupã Ñandejára Ñe’ẽ.

SALMO ÑEMBOHOVÁI 33, 8-13

Opavave: Peha’ã ha pehecha Tupã Ñandejára imba’e porãha.

Tupä Ñandejára remimbou oñangareko ha oguenohẽ
jejopy vaígui opa umi hese ojeroviávape.
Peha’ã ha pehecha Ñandejára imba’e porãha.
Ovy’a rasa upe hese ojeroviáva. O.

To momba’e Tupä Ñandejárape, umi oñemboyke va’ekue
ichupe guarã, umíva noikotevẽi chéne mba’evére.
Umi opa mba’e orerekóva, imboriahu ha iñembyahýine.
Umi Ñandejárape oñembo’éva noikotevẽi chéne mba’eve. O.

Peju che ra’y kuéra ha pehendu:
pombo’éta pemomba’e haguã Tupä Ñandejárape.
Oĩpa oikove pukuséva?
Oĩpa vy’ápe oikoséva? O.

ALELUIA 2Cor 8, 9

Aleluia.
Ñandejára Jesucristo tuicha ha imba’e eta ramo jepe,
oñemomichï ha oñemomboriahu ñande rayhupápe,
ikatu haguäicha ñane mboheta imboriahukuépe.
Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 6, 24-34

Upe ramo guare péicha he’i Ñandejára hemimbo’ekuérape: Avave ndaikatúi ijára mokõivo. Nda ija’éine peteĩre ha ohayhúne pe ambuépe, térã ombojeroviáne peteĩme ha ojahéine pe ambuére. Ndaikatúi ñambojerovia Tupã Ñandejárape ha virúpe oñondive.

Upévare ha’e peẽme: Ani pejepy’apy mba’épa pe’úta térã mba’épa pemondéta peikove haguã. Ñande rekove nga’u piko namba’e guasuvéi tembi’úgui? Ha ñande rete umi aógui? Pema’ẽ umi guyra árare ovevéva. Ha’e kuéra noñemitỹi, nomono’õi ha noñongatúi mamove.

Opáichavo, pende Ru yvágape oĩva omongaru ichupe kuéra. Peẽ niko mba’e guasu eteve ichugui kuéra. Máva piko pende apytégui ojepy’apy haguére ikatúne ombojoapy hekove michĩ ra’ymínte jepe?

Ma’erã piko pejepy’apy pemonde va’erãre?

Pema’ẽ umi yvoty ñúme guáre, mba’éichapa okakuaa, omba’apo ha ojapo’ỹre mba’eve. Che ha’e peẽme, mburuvicha guasu Salomón jepe opa ijeguaka reheve naiporãi va’ekue umi yvoty iporã háicha. Ha Tupã Ñandejára péicha omondérõ umi ka’avo ñúme opu’ãva ko’ágã, ha ko’ẽrõ ojehapýtava tatakuápe, ko’yteve pene mondéta peẽme, peẽ tekove jerovia’ỹ.

Upévare, ani pejepy’apy ha peje: ‘Mba’éiko ja’úta? Mba’éiko ñamboy’úta? Mba’éiko ñamondéta?’ Opa ko’ã mba’ére niko ojepy’apy umi Tupãre ojerovia’ỹva.

Peẽ katu niko oĩ pende Ru yvágape oikuaáva peikotevẽha ko’ã mba’ére. Upévare, pejepy’apy uvei Tupã Ñandejára sãmbyhýre pejapo haguã hembipota. Upéi oñeme’ẽta peẽme opa ko’ã mba’e avei. Ani pejepy’apy ko’ẽrõguáre, peheja umíva ko’ẽrõrã. Ani pembojo’a jepy’apy peteĩ árape ijehegui voínte oguerúvape.

Ñandejára Jesucristo Ñe’ẽ.