DOMINGO XIV DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Ezequiel arandukápe oĩ háicha 2, 2-5

Ahendu aja upe ñe’ẽ, añandu oikeha che pype Tupã Espíritu ha che rereko ñembo’yhápe, ha ahendu he’í ramo chéve: Nde, kuimba’e, romondóta Israelguakuéra rendápe, iñe’ẽ rendu’ỹva ha opu’ãva che rehe. Ha’ekuéra ha itúvakuéra ypykue opu’ã che rehe ko’ágã peve.

Yvypóra jejapo ha ipy’a hatãva hína umi romondoha ere haguã ichupekuéra: Péicha oñe’ẽ Ñandejára. Ne rendu ha nerendu’ỹme tekove jejapo ku hína umíva oikuaáne hikuái oĩha peteĩ maranduhára ijapytépekuéra.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI   122, 1-4

Opavave:  Nde rehe rojesaupi ore poriahuvereko peve.

Ndéve ajesaupi, ndéve, reguapýva yvágape. O.

Ku tembiguái ijára rehe omaña háicha, ku mitãkuña imongakuaahare rehe omaña háicha,

upéicha ore romaña Tupã, ore Jára rehe, ha’e, ore poriahuvereko peve. O.

Ore poriahuverekokena ore Jára, hetaitereíma niko rohasa asy.

Heta etereíma oñembohory ore rehe umi oñemoha’enteséva,

heta etereíma ojahéi ore rehe umi oñemombaretéva. O.

LECTURA MOKÕIHA:

Ko’ágã ñahendúta Tupã Ñandejára ñe’ẽ Pablo ohai va’ekue ikuatia mokõiháme Corinto guápe         12, 7-10

Che pehẽnguekuéra: Ahecha ha ahendu hague rehe umi mba’e guasuetéva. Upéva rehe, ani haguã che voi aimo’ã che mba’e guasuveha pe ha’évagui, areko che rete rehe peteĩ ñuatĩ che kutúva, Satanás remimboúicha che rereko asýva.

Mbohapy jevy ajerure va’ekue Ñandejárape oipe’a haguã che hegui ko jehasa asy. Ñandejára katu he’i chéve: “Che mborayhúnte upe reikotevẽva.

Che pokatu niko ojechaukapaite ne kangykuépe”. Aipo ramo, añemomba’e guasuseve che kangýgui, oguapy haguã che ári Cristo pu’aka. Ha avy’a avei che kangy ramo, ajeja’o ramo, aikotevẽ ramo, ojekaguai ramo che rehe, ha opaichagua hasýva arohasáva Cristo rehehápe. Che kangyve ramo niko añandu che mbareteveha.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA     Cf. Lc 4, 18

Aleluia.

Ñandejára Espíritu oĩ che ári, chéve niko che poravo araha haguã marandu porã opa imboriahúvape.

Aleluia.

EVANGELIO

Marandu porã Ñandejára Jesucrísto rekove ha hemimbo’e San Marcos omombe’u háicha    6, 1-6a

Opavave: Romomba’e guasu ndéve, Ñandejára.

 Jesús oho Nazarétpe, iválle okakuaa haguépe. Ha idisípulokuéra oho hendive. Ha oguãhẽvo pytu’uha ára, oñepyrũ ombo’e tupaópe. Ha umi ohendúva Jesúspe, ijurujaipa opytávo ha he’i joa: — Mba’éicha haguã piko oikuaa ko’ã mba’e.

Mba’éicha rupi piko peichaite iñarandu, ha ojapo umi milágro ojapóva.  Ndaha’éi nga’u piko kóva ku carpintéro María memby. Tyvýra niko Santiágo, José, Judas ha Simón. Ha jaikuaapa niko máva-mávapa heindy.

Ha ipochypa hikuái hendive.  Jesús katu he’i chupekuéra: — Opa rupi niko proféta kuéra oñemomba’e. Hógape, hogagua apytépe ha ivállepe katu nahániri.

 Ha upépe ndaikatúi ojapo heta milágro. Mbovymi hasývarente omoĩ ipo ha omonguera. Ha opondera Jesús umi upepegua ndojeroviaiha hese.

Ñandejára Jesucrísto  Ñe’ẽ.

Opavave: Romomba’e guasu ndéve, Ñandejára Hesukrísto.