DOMINGO XV DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Amós arandukápe oĩ háicha   7, 12-15

Upéi Amasías he’i Amóspe: Tereho ko’águi, mba’e rechahára. Tereho Judápe ha eñe’ẽ upépe, rehupityse ramo ne rembi’urã. Betélpe katu anive reñe’ẽ cháke kóva hína mburuvicha guasu tupao, ha avei ko tetã megua tupao guasu.

Amós he’i ichupe: Che ndaha’éi voi proféta, térã heseguakuéra. Che ajeheka añangarekóvo ovecha rehe ha ígo ñembyatýpe. Tupã katu che pe’a che ovechakuéragui ha he’i chéve: “Tereho eñe’ẽ che rérape Israel guápe”.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI   84, 9ab. 10-14

Opavave:  Ñandejára, ehechaukána oréve poriahuvereko ha ore salva.

Ajapysakáta Tupã he’ívare.

Ha’e he’i ome’ẽtaha py’a guapy hetãme ha umi hese ojeroviávape

Hi’aguĩ ára oporoguenohẽ haguã jejopy vaígui,

Tupã, nde reko mimbipa ojekuaáne ore yvýpe. O.

Mborayhu ha añete oñuguaitĩne,

py’a guapy ha teko joja oñoañuáne.

Añete heñóine upe yvýgui,

ha teko joja yvágagui oma’ẽne. O.

Ñandejára, ha’ete voi ome’ẽta ñandéve iporãva,

ha péicha ko ñande yvy ome’ẽta hi’a.

Teko joja ohóne henonderã, ombosako’ívo ichupe háperã. O.

LECTURA MOKÕIHA:

Ko’ágã ñahendúta Tupã Ñandejára ñe’ẽ Pablo ohai va’ekue Éfeso guápe    1, 3-14

Toñemomba’e guasu Tupã, Ñandejára Jesucrísto Túva. Cristo rupi niko ha’e ñande rovasa va’ekue opaichagua jehovasápe yvágagui oúva reheve.

Cristo rupi niko Tupã ñande poravo va’ekue opa mba’e ojapo mboyve, jaiko haguã henondépe, ichupe oñemboyke va’ekue ha imarã’ỹvaicha. Ha ha’e ñande rayhúgui, ymaite guive voi ñande poravo va’ekue, ñande rereko haguã ta’ýra tee ramo Jesucrísto  rupi, péicha ha’e ojaposégui ha oipotágui.

Péicha ha’e ojapo, opa árape ñamomba’e guasu haguã Tupãme imborayhu tuichaite rehe, ha heseve ñande rovasa hague rehe Ta’ýra ohayhu etéva rupi.

Cristo rupi, ha rei ete huguy oñohẽ hague rehe, ñane pysyrõ ha ojeheja rei ñandéve ñane angaipa. Tupã niko imba’e porã eterei ñane ndive ha ohekuavo ñande ári imborayhu.

Ome’ẽ ñandéve arandu ha akã porã, ha oikuaauka ñandéve upe ha’e ojapótava ha avave oikuaa’ỹva. Ha’e imba’e porãgui, oñemoĩ va’ekue ojapo haguã ko’ã mba’e Cristo rupi, ha omoĩ ára oguahẽ haguã hu’ãme upe ha’e oipotáva. Ha pe Tupã  oipotáva niko kóva: Omboatypase Cristo poguýpe opaite mba’e oĩva yvágape ha yvýpe.

Tupã péicha oipotágui, ha opa mba’e ojehúva ojehúgui ha’e oipota háicha niko ore poravo va’ekue ymaite guive Cristo rupi, roiko haguã imba’e teéva ramo. Ha’e niko oipota va’ekue ore raẽvete roju rojerovia Cristo rehe, ikatu haguãicha opavave romomba’e guasu ipokatu tuichaite.

Peẽ avei pehendu umi ñe’ẽ añetéva, marandu porã pene pysyrõva. Pejerovia Cristo rehe ha Tupã omoĩ pende rehe imba’eha, ome’ẽvo peẽme Espíritu Santo he’i haguéicha ome’ẽtaha. Jarekógui Tupã Espíritu, jaikuaa porã jahupytytaha umi mba’e Tupã ome’ẽtava umi imba’e teévape. Ha ñande jorapa itévo ha ojapóvo ñande hegui hetã imba’e teerã, opavave ñamomba’e guasúta ipokatu tuichaite.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA   Cf. Ef 1, 17-18

Aleluia.

Ajerure Ñandejára Jesucrísto Tupãme,

Túva tuichaitéva, pene moarandu ha oikuaaka haguã peẽme peikuaa porã haguã

mba’e peha’arõ haguãpa ha’e pene renói raka’e.

Aleluia.

EVANGELIO

Marandu porã Ñandejára Jesucrísto rekove ha hemimbo’e San Marcos omombe’u háicha 6, 7-13                                    

Opavave: Romomba’e guasu ndéve, Ñandejára.                                                     

Upérõ Jesús ombyaty umi 12 disípulope omondo haguã mokõi-mokõi, ha ome’ẽ chupekuéra pu’aka omosẽ haguã demóñokuéra.  He’i chupekuéra: — Ani peraha mba’eve pe’u va’erã tapére. Pláta ave ani peraha. Yvyra pende pópe, peguata haguãnte peraha,  ha sapatu pende pýre. Ao pembojopyru va’erã katu nahániri.

  He’i chupekuéra: — Peguãhẽ ramo peteĩ ógape, upépente pepyta pesẽtaha ára peve.  Ha na pene moguãhẽséi ramo térã na pene renduséi ramo katu, pesẽnte upégui. Ágã pesẽnguévo katu, peityvyro pende pýgui yvytĩmbo. Péicha oikuaáta hikuái Ñandejára okastigátaha chupe kuéra.

   Ha osẽ idisípulo kuéra oñemoñe’ẽ opavavépe he’ívo chupe kuéra ojevy haguã Ñandejára rendápe.  Omosẽ hikuái heta demóño, ha omonguera heta hasývape omonávo hesekuéra aséite.

Ñandejára Jesucrísto  Ñe’ẽ.

Opavave: Romomba’e guasu ndéve, Ñandejára Hesukrísto.